المطالب العالية بزوائد المسانيد الثمانية

امام حسن بصری رحمہ اللہ سے روایت ہے کہ امیر المؤمنین سیدنا عمر بن خطاب رضی اللہ عنہ نے ارادہ فرمایا کہ کعبۃ اللہ کے خزانے کو نکال کر اللہ تعالیٰ کی راہ میں خرچ کر دیں۔ سیدنا اُبی بن کعب رضی اللہ عنہ نے ان سے عرض کیا: ”آپ کے دونوں ساتھی، رسول اللہ ﷺ اور سیدنا ابوبکر رضی اللہ عنہ، آپ سے پہلے گزر چکے ہیں لیکن انہوں نے ایسا نہیں کیا؛ اگر اس میں خیر ہوتی تو وہ ضرور یہ کام کرتے۔“ چنانچہ سیدنا عمر رضی اللہ عنہ نے اپنا ارادہ ترک کر دیا۔
یہ روایت منقطع ہے۔

سیدنا عطا رحمہ اللہ سے روایت ہے کہ انہوں نے فرمایا: ”عرشِ الٰہی حرمِ مکی کے اوپر ہے۔“
اس اثر کی سند صحیح ہے۔

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے ارشاد فرمایا: ”اللہ تعالیٰ ہر روز سو رحمتیں نازل فرماتا ہے؛ ان میں سے ساٹھ رحمتیں بیت اللہ کا طواف کرنے والوں کے لیے، بیس اہلِ مکہ کے لیے اور بیس باقی تمام لوگوں کے لیے ہوتی ہیں۔“
اس روایت کی سند نہایت ضعیف ہے۔

سیدنا علی بن ابی طالب رضی اللہ عنہ سے روایت ہے کہ انہوں نے فرمایا: ”میں زمین کے اس مقام کو خوب جانتا ہوں جو اللہ تعالیٰ کو سب سے زیادہ محبوب ہے، اور وہ بیت اللہ اور اس کے اردگرد کا علاقہ ہے۔“
اس اثر کی سند ضعیف ہے۔

ابن ابی ملیکہ رحمہ اللہ سے روایت ہے کہ سیدنا عروہ رحمہ اللہ نے سیدنا ابن عباس رضی اللہ عنہما سے کہا: ”افسوس تم پر! کیا تم بہک گئے ہو؟ تم ذوالحجہ کے ان دس دنوں میں عمرہ کرنے کا حکم دیتے ہو حالانکہ ان میں عمرہ (مشروع) نہیں ہے!“ تو ابن عباس رضی اللہ عنہما نے جواباً فرمایا: ”اے عُریہ (عروہ کا شفقت بھرا نام)! جاؤ اپنی والدہ (سیدہ اسماء بنتِ ابی بکر رضی اللہ عنہا) سے پوچھو!“ عروہ نے کہا: ”سیدنا ابوبکر اور سیدنا عمر رضی اللہ عنہما تو ایسا نہیں کہتے تھے، حالانکہ وہ آپ کی نسبت رسول اللہ ﷺ کے حالات کو زیادہ بہتر جاننے والے اور ان کے نقشِ قدم کی زیادہ پیروی کرنے والے تھے“، اس پر ابن عباس رضی اللہ عنہما نے فرمایا: ”تمہیں یہیں سے ضرب لگ رہی ہے (یعنی تمہاری دلیل کمزور ہے) کہ ہم تمہیں رسول اللہ ﷺ کی حدیث سناتے ہیں اور تم جواب میں ابوبکر و عمر رضی اللہ عنہما کے اقوال پیش کرتے ہو!“
اس اثر کی سند صحیح ہے، اور اس کا کچھ حصہ جو ایامِ حج میں عمرہ کرنے سے متعلق ہے وہ صحیح مسلم میں بھی موجود ہے، اور اسی کی طرف صحیحین میں ابن عباس رضی اللہ عنہما کے اس قول میں اشارہ ہے کہ ”یہ ابوالقاسم ﷺ کی سنت ہے“ جب ابوجمرہ نے ان سے عرض کیا تھا کہ انہوں نے خواب میں کسی کو یہ کہتے سنا ہے کہ: آپ کا عمرہ یا حجِ تمتع بارگاہِ الٰہی میں مقبول ہے۔