مجمع الزوائد ومنبع الفوائد

ابوقتادہ اور ابودہماء بیان کرتے ہیں : ہم ایک دیہاتی کے پاس آئے ، ہم نے دریافت کیا : کیا آپ نے نبی اکرم صلی اللہ علیہ وسلم کی زبانی کوئی بات سنی ہے ؟ انہوں نے جواب دیا : جی ہاں ! میں نے آپ صلی اللہ علیہ وسلم کو یہ ارشاد فرماتے ہوئے سنا ہے : ” اگر تم اللہ تعالیٰ کے لیے کوئی چیز ترک کر دو گے تو اللہ تعالیٰ اس کے بدلے میں تمہیں وہ چیز دے گا جو تمہارے لیے اس سے زیادہ بہتر ہو گی ۔ “

ایک روایت میں یہ الفاظ ہیں : ” نبی اکرم صلی اللہ علیہ وسلم نے میرا ہاتھ پکڑا اور مجھے اس چیز کی تعلیم دینے لگے جو علم اللہ تعالیٰ نے آپ کو عطا کیا تھا ، نبی اکرم صلی اللہ علیہ وسلم نے ارشاد فرمایا : ” تم اللہ تعالی سے ڈرتے ہوئے جو چیز تم چھوڑ دو گے تو اللہ تعالی تمہیں اُس سے بہتر چیز عطا کر دے گا ۔ “ یہ تمام روایات امام أحمد نے مختلف اسانید کے ساتھ نقل کی ہیں اور ان کے رجال صحیح کے رجال ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص دنیاوی لالچ سے متعلق کسی پہلو پر قدرت رکھتا ہو اور وہ اسے ادا کر دے ، حالانکہ اگر وہ چاہتا تو اسے ادا نہ کرتا ، تو جس حورعین کے ساتھ وہ چاہے گا ، اُس کے ساتھ اللہ تعالی اس کی شادی کروا دے گا ۔ “
یہ روایت امام طبرانی نے نقل کی ہے ۔