مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے منبر پر ارشاد فرمایا ، اس وقت آپ کے اردگرد لوگ موجود تھے : ” اے لوگو ! اللہ تعالیٰ سے یوں حیاء کرو ، جو حیاء کرنے کا حق ہے ۔ “ ایک صاحب نے عرض کی : یا رسول اللہ ! ہم اللہ تعالیٰ سے حیاء کرتے ہیں ، نبی اکرم صلی اللہ علیہ وسلم نے ارشاد فرمایا : ” تم میں سے جو شخص حیاء کرنے والا ہو ، وہ رات نہ گزارے ، مگر یہ کہ اس کی اجل اس کی دونوں آنکھوں کے درمیان ہو اور وہ پیٹ اور جو پیٹ کے اندر ہے اور سر اور جو سر میں ہے ، اس کی حفاظت کرے اور وہ موت اور ( اپنے جسم کے ) بوسیدہ ہو جانے کو یاد کرے ، اور دنیا کی زینت ترک کر دے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی ابراہیم بن اسماعیل بن ابوحبیبہ ہے اور وہ متروک ہے ۔

سیدنا حکم بن عمیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالی سے یوں حیاء کرو ، جو حیاء کرنے کا حق ہے ، سر اور جو اس میں ہے ، پیٹ اور جو اس میں ہے ، ان کی حفاظت کرو ، موت اور بوسیدہ ہو جانے کو یاد رکھو ، جو شخص ایسا کرے گا ، اس کا ثواب جنت الماویٰ ہو گی ۔ “
یہ روایت امام طبرانی نے نقل کی ہے اس کی سند میں ایک راوی عیسیٰ بن ابراہیم قرشی ہے اور وہ متروک ہے ۔

سیده ام ولید بنت عمر رضی اللہ عنہا بیان کرتی ہیں : ایک شام نبی اکرم صلی اللہ علیہ وسلم نے متوجہ ہو کر ارشاد فرمایا : ” اے لوگو ! کیا تم حیاء نہیں کرتے ہو ؟ لوگوں نے عرض کی : یا رسول اللہ ! کس سے ؟ نبی اکرم صلی اللہ علیہ وسلم نے ارشاد فرمایا : تم اس کو جمع کرتے ہو جو تم نے کھانا نہیں ہو گا ، ایسی تعمیر کرتے ہو ، جسے تم نے ( ہمیشہ ) آباد نہیں رکھنا ، اس چیز کے بارے میں خواہش رکھتے ہو ، جس تک تم نہیں پہنچ پاؤ گے ، کیا تم اس سے حیاء نہیں کرتے ہو ۔ “
یہ روایت امام طبرانی نے نقل کی ہے اس کی سند میں ایک راوی وازع بن نافع ہے اور وہ متروک ہے ۔

سیدنا سعید بن یزید ازدی رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کی خدمت میں گزارش کی ، آپ مجھے کوئی تلقین کیجئے ، نبی اکرم صلی اللہ علیہ وسلم نے ارشاد فرمایا : ” میں تمہیں یہ تلقین کرتا ہوں کہ تم اللہ تعالی سے یوں حیاء کرنا ، جس طرح تم اپنی قوم کے کسی نیک شخص سے حیاء کرتے ہو ۔ “
یہ روایت امام طبرانی نے نقل کی ہے اور اس کے رجال کی توثیق کی ہے ، اگرچہ ان میں سے بعض میں ضعف پایا جاتا ہے ۔

سیدنا سہل بن سعد رضی اللہ عنہ بیان کرتے ہیں : ہم میں سے کوئی ایک شخص کسی چیز سے رک جاتا تھا حالانکہ وہ شخص اور وہ چیز ایک ہی کپڑے میں ہوتے تھے ، وہ اس خوف کی وجہ سے رک جاتا تھا کہ کہیں اس کے بارے میں قرآن کا کوئی حکم نازل نہ ہو جائے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔