مجمع الزوائد ومنبع الفوائد

سیدنا عقبہ بن عبد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اگر کسی شخص کو اس کی پیدائش کے دن سے لے کر ، اُس کے مرنے کے دن تک ، چہرے کے بل گرایا جاتا رہے ، تاکہ اس کے ذریعے اللہ تعالیٰ کی رضامندی حاصل ہو ، تو قیامت کے دن وہ شخص اس کو بھی حقیر سمجھے گا ۔ “
یہ روایت امام أحمد نے نقل کی ہے اور اس کی سند عمدہ ہے ۔

سیدنا محمد بن ابوعمیرہ رضی اللہ عنہ ، جو نبی اکرم صلی اللہ علیہ وسلم کے اصحاب میں سے ہیں ، وہ فرماتے ہیں : ” اگر کسی شخص کو اللہ تعالیٰ کی رضامندی کی خاطر ، اس کی پیدائش کے دن سے لے کر ، بڑھاپے کی حالت میں ، اس کے انتقال کے دن تک ، چہرے کے بل گھسیٹا جائے ، تو اس ( یعنی قیامت کے ) دن وہ اس کو بھی حقیر سمجھے گا اور یہ خواہش کرے گا کہ اسے دنیا کی طرف لوٹا دیا جائے وہ ایسا اس لئے چاہے گا ، تاکہ اس کے اجر و ثواب میں اضافہ ہو ۔ “
یہ روایت امام أحمد نے موقوف روایت کے طور پر نقل کی ہے اور اس کے رجال صحیح کے رجال ہیں ۔