مجمع الزوائد ومنبع الفوائد

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آدمی کی اپنے بھائی کے لیے اس کی غیر موجودگی میں کی جانے والی دعا رد نہیں ہوتی ہے ۔ “
یہ روایت امام بزار نے نقل کی ہے ۔

ابوعبداللہ اسدی بیان کرتے ہیں : میں نے سیدنا انس بن مالک رضی اللہ عنہ کو یہ بیان کرتے ہوئے سنا ہے : نبی اکرم صلی اللہ علیہ وسلم نے ارشاد فرمایا ہے : ” مظلوم کی دعا ، خواہ وہ کافر ہی کیوں نہ ہو ، اُس کے لیے کوئی رکاوٹ نہیں ہوتی ہے ۔ “ نبی اکرم صلی اللہ علیہ وسلم نے یہ بھی ارشاد فرمایا ہے : ” جو چیز تمہیں شک میں مبتلا کرتی ہے ، اُسے چھوڑ کر اس چیز کی طرف جاؤ ، جو تمہیں شک میں مبتلا نہیں کرتی ہے ۔ “
یہ روایت امام أحمد نے نقل کی ہے اور ابوعبداللہ اسدی نامی راوی سے میں واقف نہیں ہوں ، اس روایت کے بقیہ رجال ” صحیح “ کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب آدمی اپنے بھائی کے لیے اس کی غیر موجودگی میں دعا کرتا ہے ، تو فرشتے کہتے ہیں : آمین ! اور تمہیں بھی اس کی مانند نصیب ہو ۔ “
یہ روایت امام بزار نے نقل کی ہے اور اس کے رجال ” ثقہ “ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سلام پھیرنے کے بعد سر اٹھایا ، آپ صلی اللہ علیہ وسلم کا رخ قبلہ کی طرف تھا ، آپ نے یہ کہا: ( یعنی یہ دعا کی : ) ” اے اللہ ! سلمہ بن ہشام اور عیاش بن ابوربیعہ اور ولید بن ولید اور کمزور مسلمانوں کو خلاصی نصیب فرما ، جو کوئی حیلہ کرنے کی استطاعت نہیں رکھتے ہیں اور کوئی راستہ نہیں پاتے ہیں ۔ “
( علامہ ہیثمی فرماتے ہیں : ) میں یہ کہتا ہوں ” صحیح “ میں یہ روایت مذکور ہے : ” نبی اکرم صلی اللہ علیہ وسلم نے قنوت نازلہ پڑھی تھی ۔ “
یہ روایت امام بزار نے نقل کی ہے ، اس کی سند میں ایک راوی علی بن یزد ہے اور اس کے بارے میں اختلاف پایا جاتا ہے ، اس روایت کے بقیہ رجال ” ثقہ “ ہیں ۔