مجمع الزوائد ومنبع الفوائد

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص رات کے وقت اُٹھے اور دس مرتبہ بسم اللہ پڑھے ، دس مرتبہ سبحان اللہ پڑھے اور پھر دس مرتبہ یہ پڑھے :
«آمَنْتُ بِاللَّهِ ، وَكَفَرْتُ بِالْجِبْتِ وَالطَّاغُوتِ» ” میں اللہ تعالیٰ پر ایمان رکھتا ہوں اور جبت اور طاغوت کا انکار کرتا ہوں ۔ “
( نبی اکرم صلی اللہ علیہ وسلم فرماتے ہیں ) تو ایسا شخص ہر اس چیز سے محفوظ رہے گا جس کے حوالے سے اُسے کوئی اندیشہ ہو ، اور اگلی رات آنے تک کوئی گناہ اُس تک نہیں پہنچ سکے گا ۔ “
یہ روایت امام طبرانی نے معجم اوسط میں اپنے استاد مقدام بن داؤد کے حوالے سے نقل کی ہے اور وہ ضعیف ہے ، ابن دقیق العید کہتے ہیں : اس کی توثیق کی گئی ہے ، اس بنیاد پر
یہ روایت حسن ہو گی ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو مسلمان شخص رات کی نیند سے بیدار ہو کر یہ پڑھے :
«لَا إِلَهَ إِلَّا اللَّهُ ، وَاللَّهُ أَكْبَرُ ، وَسُبْحَانَ اللَّهِ ، وَالْحَمْدُ لِلَّهِ رَبِّ الْعَالَمِينَ ۔ اللَّهُمَّ اغْفِرْ لِي»
” اللہ تعالیٰ کے علاوہ اور کوئی معبود نہیں ہے ، اللہ تعالیٰ سب سے بڑا ہے ، اللہ تعالیٰ کی ذات ہر عیب سے پاک ہے ، ہر طرح کی حمد اللہ تعالیٰ کے لیے مخصوص ہے ، جو تمام جہانوں کا پروردگار ہے ، اے اللہ ! تو میری مغفرت کر دے ۔ “ ( نبی اکرم صلی اللہ علیہ وسلم فرماتے ہیں : ) تو اس شخص کی مغفرت ہو جائے گی ، اگر وہ عزم کرے اور اُٹھ کر وضو کر لے اور اللہ تعالیٰ سے دعا مانگے تو اس کی دعا مستجاب ہو گی ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابان بن ابوعیاش ہے اور وہ متروک ہے ۔