مجمع الزوائد ومنبع الفوائد

سیدنا ابوزید رضی اللہ عنہ کے بارے میں یہ بات منقول ہے : انہوں نے نبی اکرم صلی اللہ علیہ وسلم کے ہمراہ سات غزوات میں شرکت کی ہے ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا ابوزید رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کے ساتھ تیرہ مرتبہ جنگ میں حصہ لیا ہے ۔ شعبہ نامی راوی کہتے ہیں : یہ عزرہ نامی راوی کے دادا ہیں ۔
یہ روایت امام طبرانی نے نقل کی ہے اور اس کے رجال صحیح کے رجال ہیں البتہ تمیم بن حویص کا معاملہ مختلف ہے اور وہ ثقہ ہے ۔

سیدنا ابوزید عمرو بن اخطب انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نے پینے کے لئے کچھ مانگا ، تو میں آپ کی خدمت میں پانی لے کے آیا ، اس میں ایک بال موجود تھا ، وہ میں نے نکال لیا ، تو نبی اکرم صلی اللہ علیہ وسلم نے فرمایا : اے اللہ ! تو اسے آراستہ کر دے ! “ ۔ راوی بیان کرتے ہیں : میں نے انہیں دیکھا اس وقت اُن کی عمر 94 سال تھی ، اس وقت بھی اُن کی داڑھی میں کوئی سفید بال نہیں تھا ۔
یہ روایت امام أحمد اور امام طبرانی نے نقل کی ہے ، تاہم انہوں نے یہ الفاظ نقل کئے ہیں : 60 سال تھی ، اس کی سند حسن ہے ۔

سیدنا ابوزید بن اخطب رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : ” اللہ تعالیٰ تمہیں آراستہ کرے “ راوی کہتے ہیں : وہ ایک خوبصورت وجیہ و شکیل شخصیت کے مالک تھے ۔
یہ روایت امام أحمد نے اپنے استاد حجاج بن نصیر کے حوالے سے نقل کی ہے ، جسے ایک سے زیادہ افراد نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔