مجمع الزوائد ومنبع الفوائد

سیدنا رافع بن خدیج رضی اللہ عنہ کی اہلیہ بیان کرتی ہیں : غزوہ احد ( عمرو نامی راوی کو شک ہے ، شاید یہ الفاظ ہیں : ) غزوہ خیبر کے موقع پر جنگ میں حصہ لیتے ہوئے سیدنا رافع بن خدیج رضی اللہ عنہ کو ایک تیر سینے میں لگ گیا ، وہ نبی اکرم صلی اللہ علیہ وسلم کے پاس آئے ، انہوں نے عرض کی : یا رسول اللہ ! آپ یہ تیر نکال دیں ، نبی اکرم صلی اللہ علیہ وسلم نے فرمایا : اگر تم چاہو تو میں تیر نکال دیتا ہوں ، اور اس کا پھل بھی نکال دیتا ہوں ، لیکن اگر تم چاہو تو میں تیر نکال دیتا ہوں اور پھل اندر رہنے دیتا ہوں اور قیامت کے دن میں تمہارے حق میں یہ گواہی دوں گا کہ تم شہید ہو ، راوی کہتے ہیں : تو نبی اکرم صلی اللہ علیہ وسلم نے تیر نکال دیا اور پھل اندر رہنے دیا ، تو اس پھل سمیت سیدنا رافع رضی اللہ عنہ زندہ رہے یہاں تک کہ سیدنا معاویہ رضی اللہ عنہ کے عہد خلافت میں ، سیدنا رافع رضی اللہ عنہ کے اس زخم سے خون بہنا شروع ہوا ، تو عصر کے بعد ان کا انتقال ہو گیا ۔ کوئی شخص سیدنا عبداللہ بن عمر رضی اللہ عنہما کے پاس آیا اور انہیں یہ بتایا : اے ابوعبدالرحمن ! سیدنا رافع رضی اللہ عنہ کا انتقال ہو گیا ہے ، تو سیدنا عبداللہ بن عمر رضی اللہ عنہما نے اُن کے لئے رحمت کے کلمات کہے ، اور یہ کہا: سیدنا رافع رضی اللہ عنہ جیسے فرد کا جنازہ اُس وقت تک نہیں نکلنا چاہیے ، جب تک مدینہ منورہ کی نواحی بستیوں میں اعلان نہیں کر دیا جاتا ، راوی کہتے ہیں : جب ہم اُن کا جنازہ لے کر نکلے ، تاکہ ہم ان کی نماز جنازہ ادا کریں ، تو سیدنا عبداللہ بن عمر رضی اللہ عنہما بھی تشریف لے آئے ، یہاں تک کہ وہ اس کی قبر کے سرہانے بیٹھ گئے ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے ، سیدنا رافع رضی اللہ عنہ کی اہلیہ اگر تو صحابیہ ہیں ، تو ٹھیک ہے ، ورنہ میں اُس خاتون سے واقف نہیں ہوں ، اس روایت کے بقیہ رجال ثقہ ہیں ۔

یحیی بن بکیر بیان کرتے ہیں : سیدنا رافع بن خدیج رضی اللہ عنہ کا انتقال 73 ہجری میں مدینہ منورہ میں ہوا تھا ۔
یہ روایت امام طبرانی نے نقل کی ہے ۔

واقدی بیان کرتے ہیں : اسی سال میں سیدنا رافع بن خدیج رضی اللہ عنہ کا انتقال سال کے آغاز میں ہو گیا تھا ، سیدنا عبداللہ بن عمر رضی اللہ عنہما اُن کے جنازے میں شریک ہوئے تھے ، راوی کہتے ہیں : اس سے مراد 73 ہجری ہے ، جس وقت سیدنا رافع رضی اللہ عنہ کا انتقال ہوا ، اس وقت اُن کی عمر 86 برس تھی ۔
یہ روایت امام طبرانی نے نقل کی ہے ۔

محمد بن عبدالله بن نمیر بیان کرتے ہیں : سیدنا رافع بن خدیج رضی اللہ عنہ کا انتقال 74 ہجری کے آغاز میں ہوا تھا ۔
یہ روایت امام طبرانی نے نقل کی ہے ۔