مجمع الزوائد ومنبع الفوائد

سیدنا عبدالرحمن بن عوف رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم ہمارے پاس سے گزرے ، اس وقت ہم پیلو کے پھل کو چن رہے تھے ، نبی اکرم صلی اللہ علیہ وسلم نے فرمایا : تم سیاہ رنگ کے چننا ، میں بھی انہیں چنا کرتا تھا ، جب میں بکریاں چرایا کرتا تھا ، لوگوں نے عرض کی : یا رسول اللہ ! آپ نے بکریاں چرائی ہیں ؟ نبی اکرم صلی اللہ علیہ وسلم نے فرمایا : جی ہاں ! ہر نبی نے بکریاں چرائی ہیں ۔
یہ روایت امام طبرانی نے معجم اوسط میں نقل کی ہے ، اور اس کی سند میں ایک راوی ابوسلمہ ہے ، اس نے اپنے والد سے سماع نہیں کیا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب سیدنا موسیٰ علیہ السلام کو مبعوث کیا گیا ، تو وہ اپنے اہل خانہ کی بکریاں چراتے تھے اور جب مجھے مبعوث کیا گیا ، تو میں اپنے اہل خانہ کی بکریاں ” جیاد “ کے مقام پر چراتا تھا ۔ “
یہ روایت امام أحمد نے ایک طویل حدیث کے ضمن میں نقل کی ہے ، جو اس سے پہلے خرید و فروخت سے متعلق باب میں گزر چکی ہے ، جو اس باب میں ہے ، جس میں ان جانوروں کا ذکر ہے جن کو رکھنا چاہیے ۔