مجمع الزوائد ومنبع الفوائد

مجاہد نے اپنے مالک کے حوالے سے یہ بات نقل کی ہے : ان کے مالک نے انہیں یہ بات بتائی ہے : جب وہ لوگ زمانہ جاہلیت میں خانہ کعبہ کی تعمیر کر رہے تھے ، تو حجر اسود رکھنے کے حوالے سے ان لوگوں کے درمیان اختلاف ہو گیا ، تو انہوں نے کہا: تم اپنے درمیان کسی کو ثالث بنا لو ، انہوں نے کہا: اس راستے سے جو شخص سب سے پہلے آئے گا ( وہ ہمارا ثالث ہو گا ) راوی بیان کرتے ہیں : تو نبی اکرم صلی اللہ علیہ وسلم تشریف لے آئے ، تو انہوں نے کہا: ” امین “ فرد تمہارے پاس آ گئے ہیں ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔ اس سے پہلے خانہ کعبہ سے متعلق روایت گزر چکی ہے ، اور اس کے رجال ” صحیح “ کے رجال ہیں ، صرف ہلال بن خباب کا معاملہ مختلف ہے ، اور وہ ثقہ ہے ۔

سیدنا علی بن ابوطالب رضی اللہ عنہ خانہ کعبہ کی تعمیر کے بارے میں بیان کرتے ہیں : جب ان لوگوں نے نبی اکرم صلی اللہ علیہ وسلم کو اندر آتے ہوئے دیکھا ، تو بولے : ” امین “ فرد تشریف لے آئے ہیں ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح“ کے رجال ہیں ، صرف حفص بن عمر ضریر اور خالد بن عرعرہ کا معاملہ مختلف ہے ، اور یہ دونوں ثقہ ہیں ۔