مجمع الزوائد ومنبع الفوائد

سلیم مولیٰ بنو لیث جو پرانے آدمی ہیں ، اور انہوں نے سیدنا اسامہ بن زید رضی اللہ عنہ اور مروان سے ملاقات کی ہوئی ہے ۔ وہ بیان کرتے ہیں : ایک مرتبہ مروان بن حکم کا گزر سیدنا اسامہ بن زید رضی اللہ عنہما کے پاس سے ہوا جو نماز ادا کر رہے تھے ، مروان ان کے پاس آیا تو سیدنا اسامہ رضی اللہ عنہ نے فرمایا : اے مروان ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ ہر بدزبان بدکلام شخص کو ناپسند کرتا ہے ۔ “
یہ روایت امام أحمد نے امام طبرانی نے معجم کبیر اور معجم اوسط میں مختلف اسانید کے ساتھ نقل کی ہے امام طبرانی کی اسانید میں سے ایک کے رجال ثقہ ہیں ۔

عبیداللہ بن عبداللہ بن عتبہ بیان کرتے ہیں : میں نے سیدنا اسامہ بن زید رضی اللہ عنہ کو سیدہ عائشہ رضی اللہ عنہا کے حجرے کے پاس دعا کرتے ہوئے دیکھا ، اسی دوران مروان آیا اور اس نے ان کو کوئی بات کہی تو سیدنا اسامہ رضی اللہ عنہ نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ فحش گفتگو کرنے والے بدزبان شخص کو ناپسند کرتا ہے ۔ “
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : ” مومن کے اخلاق میں سب سے زیادہ قابل ملامت چیز فحش کلامی ہے ۔ “
یہ روایت امام طبرانی نے دو اسناد کے ساتھ نقل کی ہے ان دونوں میں سے ایک کے رجال صحیح کے رجال ہیں ۔