مجمع الزوائد ومنبع الفوائد

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” ہر کام کے لئے توبہ کی گنجائش ہوتی ہے البتہ برے اخلاق والے شخص کا معاملہ مختلف ہے کیونکہ جب بھی وہ کسی ایک گناہ سے توبہ کرتا ہے ، تو دوبارہ اس سے زیادہ برا گناہ کر لیتا ہے ۔ “
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی عمرو بن جمیع ہے اور وہ کذاب ہے ۔

ان کے حوالے سے یہ بات منقول ہے ۔ وہ بیان کرتی ہیں : نبی اکرم صلی اللہ علیہ وسلم نے ارشاد فرمایا : ” نحوست ، برے اخلاق ہیں ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوبکر بن ابومریم ہے ، اور وہ ضعیف ہے ۔

سیدنا جابر رضی اللہ عنہ بیان کرتے ہیں : عرض کی گئی : یا رسول اللہ ! نحوست کیا ہے ؟ آپ نے ارشاد فرمایا : برے اخلاق ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی فضل بن عیسیٰ رقاشی ہے ، اور وہ ضعیف ہے ۔ اس سے پہلے سیدنا رافع بن مکیث رضی اللہ عنہ سے منقول ایک حدیث گزر چکی ہے ۔
یہ روایت امام ابن ماجہ نے اختصار کے ساتھ نقل کی ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” لوگوں میں سب سے برا وہ ہے جو اپنے اہلِ خانہ کے لئے زیادہ تنگی والا ہو ۔ لوگوں نے عرض کی : یا رسول اللہ ! وہ اپنے اہلِ خانہ کے لئے کیسے تنگی والا ہو گا ؟ “ آپ نے ارشاد فرمایا : ” آدمی جب گھر میں داخل ہو ، تو اس کی بیوی اس سے خوف زدہ ہو ، اس کا بچہ اسے چھوڑ کر بھاگے اور فرار ہو جائے اور جب وہ باہر چلا جائے تو اس کی بیوی بھی بنسنے لگے ، اور اس کے اہل خانہ بھی آرام محسوس کریں ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن یزید بن صلت ہے اور وہ متروک ہے ۔