مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم یہ دعا کیا کرتے تھے : ” اے اللہ ! تو نے میری ظاہری تخلیق کو عمدہ کیا ہے ، تو میرے اخلاق کو بھی عمدہ رکھنا“ ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

سیدنا عمار بن یاسر رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” اچھے اخلاق اللہ تعالیٰ کی مخلوق میں سب سے زیادہ عظمت والی تخلیق ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اور اس کی سند میں ایک راوی عمرو بن حصین ہے ، اور وہ متروک ہے ۔

سیدنا جابر بن عبداللہ رضی اللہ عنہ نے نبی اکرم صلی اللہ علیہ وسلم کے حوالے سے سیدنا جبرائیل علیہ السلام کے حوالے سے اللہ تعالیٰ کا یہ فرمان نقل کیا ہے : ” یہ دین ، میں اس کے اپنے لئے ہونے سے راضی ہوں اور اس کے لئے صرف سخاوت اور اچھے اخلاق مناسب ہیں ، تو تم ان دونوں کے ذریعے اس دین کی عزت افزائی کرو اور اس کے ساتھ رہو ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابراہیم بن ابوبکر بن منکدر ہے اور وہ ضعیف ہے ۔ مقدام بن داؤد نامی راوی کا معاملہ بھی اسی طرح ہے ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے اس دین کو اپنی ذات کے لئے خالص کر لیا ہے اور تمہارے دین کے لئے صرف سخاوت اور اچھے اخلاق ہی مناسب ہیں ، تو تم ان دونوں کے ذریعے دین کو آراستہ کرو ۔ “
یہ روایت امام طبرانی نے نقل کی ہے ، اور اس کی سند میں ایک راوی عمرو بن حصین ہے ، اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” یہ اخلاق اللہ تعالیٰ کی طرف سے ہیں جس شخص کے بارے میں اللہ تعالیٰ بھلائی کا ارادہ کرتا ہے ، اسے اچھے اخلاق عطا کر دیتا ہے ، اور جس شخص کے بارے میں برائی کا ارادہ کرتا ہے ، اسے برے اخلاق عطا کر دیتا ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مسلمہ بن علی ہے اور وہ ضعیف ہے ۔

ان کے حوالے سے یہ بات منقول ہے : نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے سیدنا ابراہیم علیہ السلام کی طرف یہ وحی کی : اے میرے خلیل ! تم اپنے اخلاق کو اچھے رکھو ، خواہ کافروں کے ساتھ ہی کیوں نہ ہو ، تم نیک لوگوں کی جگہ پر داخل ہو جاؤ گے ، اور میرا فرمان ان لوگوں کے لئے سبقت لے جا چکا ہے ، جن کے اخلاق اچھے ہوں کہ میں انہیں اپنے عرش کے ساتھ رکھوں گا ، اور میں انہیں اپنے حظيرة القدس سے پلاؤں گا ، اور انہیں اپنے پڑوس میں رکھوں گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مؤمل بن عبدالرحمن ثقفی ہے اور وہ ضعیف ہے ۔

ان کے حوالے سے یہ بات منقول ہے ۔ وہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس بھی شخص کے اخلاق اور ظاہری خلقت کو اللہ تعالیٰ نے اچھا رکھا ہو ، اللہ تعالیٰ اسے کبھی جہنم میں نہیں ڈالے گا ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن یزید بکری ہے اور وہ ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اچھے اخلاق کی طرف رہنمائی کرنے والا اور برے اخلاق کو پھیرنے والا وہی ( یعنی اللہ تعالیٰ ) ہے ۔ “
یہ روایت امام طبرانی نے نقل کی ہے ۔

سیدنا ابوثعلبہ خشنی رضی اللہ عنہ اور روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آخرت میں میرے نزدیک تم میں سے سب سے زیادہ محبوب اور میرے سب سے زیادہ قریب وہ لوگ ہوں گے ، جن کے اخلاق زیادہ اچھے ہوں گے ، اور آخرت میں میرے نزدیک سب سے زیادہ ناپسندیدہ اور تم میں سے مجھ سے سب سے زیادہ دور وہ لوگ ہوں گے ، جن کے اخلاق برے ہوں گے ، وہ لوگ جو بکثرت کلام کرنے والے اور بنا سنوار کے منہ چبا چبا کے باتیں کرنے والے ہوں گے ۔ “
یہ روایت امام أحمد اور امام طبرانی نے نقل کی ہے ، اور امام أحمد کے رجال صحیح کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” کیا میں تمہیں ان لوگوں کے بارے میں نہ بتاؤں جو قیامت کے دن میرے نزدیک سب سے زیادہ محبوب ہوں گے ، اور تم میں سے بیٹھنے کے اعتبار سے میرے سب سے زیادہ قریب ہوں گے ؟ یہ بات نبی اکرم صلی اللہ علیہ وسلم نے تین یا شاید دو مرتبہ دہرائی ، لوگوں نے عرض کی : جی ہاں یا رسول اللہ ! نبی اکرم صلی اللہ علیہ وسلم نے فرمایا : جن کے اخلاق زیادہ اچھے ہوں گے ۔ “ ( علامہ ہیثمی فرماتے ہیں : ) میں یہ کہتا ہوں ان صحابی کے حوالے سے ” صحیح “ میں صرف یہ الفاظ منقول ہیں : ” میرے نزدیک تم میں سب سے زیادہ محبوب وہ ہوں گے ، جن کے اخلاق زیادہ اچھے ہوں گے ۔ “
یہ روایت امام أحمد نے عمدہ سند کے ساتھ نقل کی ہے ۔

سیدنا عبداللہ بن مسعود رضی اللہ عنہ مرفوع حدیث کے طور پر یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن تم میں سے میرے سب سے زیادہ محبوب وہ لوگ ہوں گے جو اخلاق کے اعتبار سے زیادہ بہتر ہوں گے ، اور قیامت کے دن میرے نزدیک سب سے زیادہ ناپسندیدہ وہ لوگ ہوں گے جو چبا چبا کر بنا سنوار کے باتیں کریں گے ( یا تکبر کا اظہار کریں گے ) ۔ “ اس روایت کے ایک راوی بیان کرتے ہیں : میں نے اپنے استاد ابن بہدلہ سے دریافت کیا : لفظ متفیہقون سے مراد کیا ہے ؟ انہوں نے جواب دیا : تکبر کرنے والے لوگ ۔
یہ روایت امام طبرانی نے نقل کی ہے ، اور امام بزار نے نقل کی ہے ، اور ان کی روایت کے الفاظ یہ ہیں ، راوی بیان کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں تمہارے بہترین لوگوں کے بارے میں نہ بتاؤں ؟ لوگوں نے عرض کی : جی ہاں نبی اکرم صلی اللہ علیہ وسلم نے فرمایا : تمہارے بہترین لوگ وہ ہوں جن کے اخلاق زیادہ اچھے ہوں “ ۔
( راوی بیان کرتے ہیں ) میرا خیال ہے روایت میں یہ الفاظ بھی ہیں کہ ” جن کے اطراف بچھے ہوئے ہوں ( یعنی وہ نرمی اختیار کئے ہوں ) ۔ “
امام بزار کی سند میں ایک راوی صدقہ بن موسیٰ ہے اور وہ ضعیف ہے ۔ امام طبرانی کی سند میں ایک راوی عبداللہ رمادی ہے اور میں اس سے واقف نہیں ہوں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے میرے زیادہ محبوب وہ لوگ ہوں گے ، جن کے اخلاق زیادہ اچھے ہوں گے ، اور جن کے اطراف بچھے ہوئے ہوں گے ، جو الفت رکھتے ہوں گے اور ان سے الفت رکھی جاتی ہو گی ، اور تم میں سے میرے نزدیک سب سے زیادہ ناپسندیدہ وہ لوگ ہوں گے جو چغلی کرنے والے ہوں گے ، اور دوستوں کے درمیان جدائی ڈالنے والے ہوں گے ، اور لوگوں کے عیوب تلاش کرنے والے ہوں گے ۔ “
یہ روایت امام طبرانی نے معجم صغیر اور معجم اوسط میں نقل کی ہے ، اور اس کی سند میں ایک راوی صالح بن بشیر مری ہے اور وہ ضعیف ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل ایمان میں سے سب سے زیادہ کامل ایمان والے وہ لوگ ہوں گے ، جن کے اخلاق زیادہ اچھے ہوں گے ، اور جن کے اطراف بچھے ہوئے ہوں گے جو ( لوگوں کے ساتھ ) الفت رکھتے ہوں گے ، اور ان سے الفت رکھی جاتی ہو گی اور وہ شخص ہم میں سے نہیں ہے ( جو لوگوں کے ساتھ ) الفت نہ رکھتا ہو ، اور اس کے ساتھ الفت نہ رکھی جاتی ہو ۔ “
یہ روایت امام طبرانی نے معجم اوسط میں نقل کی ہے اور معجم صغیر میں اس کی مانند نقل کی ہے ۔ اس کی سند میں ایک راوی یعقوب بن عباد قلزمی ہے ، اور میں اس سے واقف نہیں ہوں ۔

سیدنا عبداللہ بن عمرو رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اچھے اخلاق والا مسلمان روزہ دار اور نوافل پڑھنے والے شخص کے درجہ تک پہنچ جاتا ہے یہ اس کے اچھے اخلاق کی وجہ سے اور نرم طبیعت کی وجہ سے ہوتا ہے ۔ “
یہ روایت امام أحمد اور امام طبرانی نے معجم کبیر اور معجم اوسط میں نقل کی ہے ، اور اس کی سند میں ایک راوی ابن لہیعہ ہے ، جس میں ضعف پایا جاتا ہے ۔ اس روایت کے بقیہ رجال صحیح کے رجال ہیں ۔

سیدنا رافع بن مکیث رضی اللہ عنہ ، جنہیں غزوہ حدیبیہ میں شرکت کا شرف حاصل ہے ۔ وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اچھے اخلاق نمونے کا باعث ہیں اور برے اخلاق نحوست ہیں ، نیکی عمر میں اضافہ کرتی ہے اور صدقہ بری موت کو روک دیتا ہے ۔ “ ( علامہ ہیثمی فرماتے ہیں : ) میں یہ کہتا ہوں امام ابوداؤد نے ان صحابی کے حوالے سے صرف یہ الفاظ نقل کے ہیں : ” برے اخلاق نحوست ہیں ۔ “
یہ روایت امام أحمد نے سیدنا رافع رضی اللہ عنہ کی اولاد میں سے کسی کے حوالے سے نقل کی ہے ۔ انہوں نے ان صاحب کا نام بیان نہیں کیا اس روایت کے بقیہ رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کی ملاقات سیدنا ابوذر غفاری رضی اللہ عنہ سے ہوئی ، آپ نے ارشاد فرمایا : اے ابوذر ! کیا میں تمہاری رہنمائی دو خصلتوں کی طرف نہ کروں ، جو کرنے کے اعتبار سے ہلکی ہیں اور میزان میں ان کے علاوہ باقی چیزوں سے زیادہ بھاری ہوں گی ۔ انہوں نے عرض کی : جی ہاں یا رسول اللہ ! نبی اکرم صلی اللہ علیہ وسلم نے فرمایا : تم پر اچھے اخلاق اختیار کرنا اور زیادہ تر خاموش رہنا لازم ہے ۔ اس ذات کی قسم ! جس کے دست قدرت میں میری جان ہے ، مخلوق نے ان جیسی چیزوں سے آراستگی اختیار نہیں کی ہو گی ۔ “
یہ روایت امام ابویعلیٰ نے نقل کی ہے ، اور امام طبرانی نے معجم اوسط میں نقل کی ہے ، امام ابویعلیٰ کے رجال ثقہ ہیں ۔

ان کے حوالے سے یہ بات منقول ہے ۔ وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اہل ایمان میں سب سے زیادہ کامل ایمان والے وہ لوگ ہیں جن کے اخلاق زیادہ اچھے ہوں اور اچھے اخلاق کے ذریعے آدمی نماز اور روزے کے درجہ تک پہنچ جاتا ہے ۔ “
یہ روایت امام ابویعلیٰ نے نقل کی ہے ۔ اس کی سند میں ایک راوی زکریا بن یحیی ابومالک طائی ہے اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ آدمی کے اچھے اخلاق کے ذریعے اسے نماز اور روزے کے درجہ تک پہنچا دیتا ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی علی بن سعید بن بشیر ہے امام دارقطنی رحمہ اللہ کہتے ہیں : یہ اتنے پائے کا نہیں ہے ۔ اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم اپنے اموال کے حوالے سے لوگوں کے لئے گنجائش والے نہیں ہوتے ہو ، بلکہ خندہ پیشانی کی وجہ سے ان کے لئے گنجائش والے ہوتے ہو ۔ “
یہ روایت امام ابویعلیٰ اور امام بزار نے نقل کی ہے ، اور یہ الفاظ زائد نقل کے ہیں : ” اور اچھے اخلاق ۔ “ اس روایت کی سند میں ایک راوی عبداللہ بن سعید مقبری ہے اور وہ ضعیف ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں تمہارے بہترین لوگوں کے بارے میں نہ بتاؤں لوگوں نے عرض کی : جی ہاں آپ نے ارشاد فرمایا : زیادہ اچھے اخلاق والے ( راوی کو شک ہے شاید یہ الفاظ ہیں : ) جو تم میں سے زیادہ اچھے اخلاق والا ہو ۔ “
یہ روایت امام بزار نے نقل کی ہے ۔ اس کی سند میں ایک راوی سہیل بن ابوحزم ہے ، جسے یحیی بن معین نے ثقہ قرار دیا ہے ، اور ایک جماعت نے اسے ضعیف کہا: ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سب سے بہتر وہ لوگ ہیں جن کی عمر سب سے زیادہ طویل ہو اور اخلاق زیادہ اچھے ہوں ۔ “
یہ روایت امام بزار نے نقل کی ہے ۔ اس کی سند میں ایک راوی ابن اسحاق ہے اور وہ مدلس ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میزان میں کوئی ایسی چیز نہیں رکھی جائے گی جو اچھے اخلاق سے زیادہ وزنی ہو ، اور اچھا اخلاق اپنے متعلقہ فرد کو نماز اور روزے کے درجہ تک پہنچا دے گا ۔ “
( علامہ ہیثمی فرماتے ہیں : ) میں یہ کہتا ہوں
یہ روایت امام ترمذی نے اختصار کے ساتھ نقل کی ہے ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں جنت کے اطراف کے حصے میں ایک گھر کا اور جنت کے درمیان میں ایک گھر کا اور جنت کے بالائی حصے میں ایک گھر کا ضامن ہوں اس شخص کے لئے جو بحث کرنے کو ترک کر دیتا ہے ، اگرچہ وہ حق پر ہو ، اور جھوٹ کو ترک کر دیتا ہے اگرچہ وہ مزاح کے طور پر ہو ، اور جس کے اخلاق اچھے ہوں ۔ “
یہ روایت امام طبرانی نے تینوں کتابوں میں نقل کی ہے ، اور امام بزار نے نقل کی ہے ، امام طبرانی کی سند میں ایک راوی محمد بن حصین ہے ، اور میں اس سے واقف نہیں ہوں ، بظاہر یہ لگتا ہے کہ یہ تمیمی ہے ، اور وہ ثقہ ہے ۔ اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” میں جنت کے باغات میں ایک گھر کا اور اس کے بالائی حصے میں ایک گھر کا اور اس کے زیریں حصے میں ایک گھر کا ضامن ہوں اس شخص کے لئے جو حق پر ہونے کے باوجود بحث کو ترک کر دیتا ہے ، اور جھوٹ کو ترک کر دیتا ہے ، جبکہ وہ مذاق کے طور پر ہو ، اور اس کے اخلاق اچھے ہوں ۔ “
یہ روایت امام طبرانی نے نقل کی ہے ، اور اس کی سند میں ایک راوی ابوحاتم سوید بن ابراہیم ہے ، جسے جمہور نے ضعیف قرار دیا ہے ، ایک روایت کے مطابق یحیی بن معین نے اسے ثقہ کہا: ہے ۔ اس روایت کے بقیہ رجال صحیح کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک گھر جنت کے بالاخانوں میں ، ایک گھر جنت کے اطراف کے حصے میں اور ایک گھر جنت کے درمیانی حصے میں ہو گا ، اس شخص کے لئے جو جھوٹ کو ترک کر دیتا ہے ، خواہ وہ مزاح کے طور پر ہی کیوں نہ ہو ، اور بحث کو ترک کر دیتا ہے ، خواہ وہ حق پر ہی کیوں نہ ہو ، اور اس شخص کے لئے جس کے اخلاق اچھے ہوں ۔ “
یہ روایت امام بزار نے نقل کی ہے ۔ اس کی سند میں ایک راوی عبدالواحد بن سلیم ہے ، جسے ابن حبان نے ثقہ قرار دیا ہے ، اور ایک جماعت نے اسے ضعیف قرار دیا ہے ۔

سیدنا معاذ بن جبل رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! میں جمال کو پسند کرتا ہوں اور اس بات کو بھی پسند کرتا ہوں کہ میری تعریف کی جائے ، راوی بیان کرتے ہیں : گویا اس شخص نے اپنی ذات کے حوالے سے ( تکبر کے حوالے سے ) اندیشے کا اظہار کیا ، تو نبی اکرم صلی اللہ علیہ وسلم نے ارشاد فرمایا : ” تمہارے لے کیا چیز رکاوٹ ہے کہ تم اس بات کو پسند کرو کہ تم قابل تعریف زندگی بسر کرو اور سعادت مندی والی موت مر جاؤ ، مجھے اچھے اخلاق کی تکمیل کے لئے مبعوث کیا گیا ہے ۔ “
یہ روایت امام طبرانی اور امام بزار نے نقل کی ہے ، تاہم انہوں نے یہ الفاظ نقل کے ہیں : ” مجھے عمدہ اخلاق کے ہمراہ مبعوث کیا گیا ہے ۔ “
اس روایت کی سند میں ایک راوی عبدالرحمن بن ابوبکر جدعانی ہے اور وہ ضعیف ہے ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے انہیں ایک قوم کی طرف بھیجا ، انہوں نے عرض کی : یا رسول اللہ ! آپ مجھے کوئی تلقین کیجئے ، نبی اکرم صلی اللہ علیہ وسلم نے ارشاد فرمایا : تم سلام کو پھیلانا ، کھانا خرچ کرنا اور اللہ تعالیٰ سے یوں حیاء کرنا جس طرح اپنے خاندان کے کسی بارعب شخص سے حیاء کرتے ہو ، اور جب تم برائی کر لو تو اچھائی کرنا اور جہاں تک ہو سکے اپنے اخلاق کو اچھا رکھنا ۔ “
یہ روایت امام بزار نے نقل کی ہے ۔ اس کی سند میں ایک راوی ابن لہیعہ ہے ۔ اس میں کمزور ہونا پایا جاتا ہے ۔ اس روایت کے بقیہ رجال ثقہ ہیں ۔

سیدنا عبداللہ بن عمرو بن العاص رضی اللہ عنہ بیان کرتے ہیں : سیدنا معاذ بن جبل رضی اللہ عنہ نے عرض کی : یا رسول اللہ ! آپ مجھے تلقین کیجئے ، آپ نے ارشاد فرمایا : تم اللہ کی عبادت کرنا اور کسی کو اس کا شریک نہ ٹھہرانا ، انہوں نے عرض کی : یا رسول اللہ ! مزید عطا کیجئے ، آپ نے فرمایا : جب تم برائی کر لو تو اچھائی کر لینا ، انہوں نے عرض کی : یا رسول اللہ ! مزید عطا کیجئے ، نبی اکرم صلی اللہ علیہ وسلم نے فرمایا : تم سیدھے رہنا اور اپنے اخلاق اچھے رکھنا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن صالح ہے ، جس کی توثیق کی گئی ہے ، ایک جماعت نے اسے ضعیف قرار دیا ہے ، ایک راوی ابوسمیط سعید بن ابوسوید ہے جو مہری کا آزاد کردہ غلام ہے ، اور میں اس سے واقف نہیں ہوں ۔

سیدنا انس رضی اللہ عنہ بیان کرتے ہیں : سیدہ ام حبیبہ رضی اللہ عنہا نے عرض کی : یا رسول اللہ ! بعض اوقات ( دنیا میں ) کسی عورت کے دو شوہر رہے ہوتے ہیں ، پھر وہ عورت انتقال کر جاتی ہے ، اور جنت میں داخل ہو جاتی ہے ، اور اس کے دونوں شوہر بھی جنت میں داخل ہو جاتے ہیں ، تو وہ عورت ان دونوں میں سے کس کو ملے گی ، پہلے والے شوہر کو ؟ یا دوسرے والے شوہر کو ؟ نبی اکرم صلی اللہ علیہ وسلم نے ارشاد فرمایا : اس عورت کو یہ اختیار دیا جائے گا کہ دنیا میں جو شخص اس کے ساتھ زیادہ اچھے اخلاق کے ساتھ تھا ، وہی جنت میں اس کا شوہر ہو گا ۔ اے اُمّ حبیبہ ! اچھے اخلاق دنیا اور آخرت کی بھلائی لے گئے ہیں ۔ “
یہ روایت امام طبرانی نے نقل کی ہے اور امام بزار نے اختصار کے ساتھ نقل کی ہے ۔ اس کی سند میں ایک راوی عبید بن اسحاق ہے ، اور وہ متروک ہے ۔ ابوحاتم اس سے راضی تھے اور حالت کے اعتبار سے ، سند میں وہ تمام راویوں سے برا ہے ۔ اس سے پہلے اس حدیث کے مختلف طرق کتاب النکاح میں گزر چکے ہیں ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ پر ایمان رکھنے کے بعد سب سے زیادہ سمجھ داری لوگوں سے محبت رکھنا ہے ۔ “ راوی بیان کرتے ہیں : اس سند کے ساتھ یہ بات منقول ہے ۔ نبی اکرم صلی اللہ علیہ وسلم نے ارشاد فرمایا : ” تین چیزیں جس شخص میں نہیں ہوں گی اس کا مجھ سے کوئی واسطہ نہیں ہو گا ، اور اللہ تعالیٰ سے کوئی واسطہ نہیں ہو گا ، عرض کی گئی : یا رسول اللہ ! وہ کیا ہیں ؟ نبی اکرم صلی اللہ علیہ وسلم نے ارشاد فرمایا : ایسی بردباری جس کے ذریعے وہ جاہل کی جہالت کو پرے کر سکے اور ایسے اچھے اخلاق جن کے ہمراہ وہ لوگوں سے ملے اور ایسی پرہیزگاری جو اس کو اللہ تعالیٰ کی نافرمانی سے روک کے رکھے ۔ “ یہ تمام روایات امام طبرانی نے معجم اوسط اور معجم صغیر میں نقل کی ہے ، اور اس کی سند میں ایک جماعت ایسی ہے ، میں جن سے واقف نہیں ہوں ۔

سیدنا علی بن ابوطالب رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” آدمی بردباری کے ذریعے روزہ دار اور نوافل پڑھنے والے شخص کے درجہ تک پہنچ جاتا ہے ، اور کبھی کوئی شخص متکبر ہونے کے طور پر نوٹ کیا جاتا ہے حالانکہ وہ صرف اپنے اہل خانہ کا مالک ہوتا ہے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالعزیز بن عبیداللہ بن حمزہ ہے ، اور وہ انتہائی ضعیف ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں زیادہ فضیلت والے وہ لوگ ہیں ، جو زیادہ اچھے اخلاق کے مالک ہوں اور اچھے اخلاق کا ہونا ایمان کا حصہ ہے ۔ “
یہ روایت امام طبرانی نے معجم اوسط میں نقل کی ہے ، اور معجم کبیر میں اس کی مانند نقل کی ہے ۔ اس کی سند میں ایک راوی سوید بن عبدالعزیز ہے ، اور وہ متروک ہے ۔

ان کے حوالے سے نبی اکرم صلی اللہ علیہ وسلم کا یہ فرمان منقول ہے : ” قیامت کے دن تم میں سے میرے سب سے زیادہ قریب وہ لوگ ہوں گے جو زیادہ اچھے اخلاق کے مالک ہوں گے ۔ “
یہ روایت امام طبرانی نے ایک طویل حدیث میں نقل کی ہے ، اور دو اسناد کے ساتھ نقل کی ہے ان دونوں میں سے ایک کے رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اچھے اخلاق گناہوں کو یوں پگھلا دیتے ہیں جس طرح پانی ، جمے ہوئے پانی کو پگھلا دیتا ہے ، اور برے اخلاق عمل کو یوں خراب کر دیتے ہیں ، جس طرح سرکہ شہد کو خراب کر دیتا ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عیسیٰ بن میمون مدنی ہے اور وہ ضعیف ہے ۔

سیدنا اسامہ بن شریک رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس بیٹھے ہوئے تھے ، یوں لگتا تھا جیسے ہمارے سروں پر پرندے موجود ہیں ، ہم میں سے کوئی شخص کلام نہیں کر رہا تھا ، اسی دوران کچھ لوگ آپ کی خدمت میں حاضر ہوئے ، انہوں نے عرض کی : اللہ تعالیٰ کے نزدیک اللہ کے بندوں میں سب سے زیادہ محبوب کون ہے ؟ نبی اکرم صلی اللہ علیہ وسلم نے ارشاد فرمایا : جس کے اخلاق سب سے زیادہ اچھے ہوں ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بندہ اپنے اچھے اخلاق کی وجہ سے آخرت کے عظیم درجات اور شریف منازل تک پہنچ جاتا ہے حالانکہ وہ عبادت کے اعتبار سے کمزور ہوتا ہے ، اور بعض اوقات وہ اپنے برے اخلاق کی وجہ سے جہنم کے نیچے والے درجہ تک پہنچ جاتا ہے ۔ “
یہ روایت امام طبرانی نے اپنے استاد مقدام بن داؤد کے حوالے سے نقل کی ہے اور وہ ضعیف ہے ۔ ابن دقیق العید ” امام “ یہ فرماتے ہیں : اس کی توثیق کی گئی ہے ۔ اس روایت کے بقیہ رجال ثقہ ہیں ۔

سیدنا جابر بن سمرہ رضی اللہ عنہ بیان کرتے ہیں : میں ایک محفل میں موجود تھا جس میں نبی اکرم صلی اللہ علیہ وسلم تھے ، سیدنا سمرہ رضی اللہ عنہ تھے اور سیدنا ابوامامہ رضی اللہ عنہ تھے ۔ نبی اکرم صلی اللہ علیہ وسلم نے ارشاد فرمایا : ” فحاشی اور فحش کلامی ، یہ دونوں اسلام سے کوئی واسطہ نہیں رکھتی ہیں ، لوگوں میں سب سے زیادہ عمدہ اسلام والا شخص وہ ہے ، جس کے اخلاق سب سے عمدہ ہوں ۔ “
یہ روایت امام طبرانی نے نقل کی ہے ، روایت کے الفاظ ان کے نقل کردہ ہیں ، اسے امام أحمد اور ان کے صاحبزادے نے بھی نقل کیا ہے ان کے الفاظ یہ ہیں : ” لوگوں میں سب سے بہتر اسلام والے وہ لوگ ہیں جن کے اخلاق سب سے اچھے ہوں ۔ “
یہ روایت امام ابویعلیٰ نے اس کی مانند نقل کی ہے ، اور اس کے رجال ثقہ ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آدمی اپنے اچھے اخلاق کے ذریعے رات کے وقت نفل پڑھنے والے اور دن کے وقت پیاسے رہنے والے ( یعنی نفلی روزہ دار ) کے مرتبے تک پہنچ جاتا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی عفیر بن معدان ہے اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم سے سوال کیا گیا : لوگوں میں کون زیادہ بہتر ہے ؟ آپ نے فرمایا : جس کے اخلاق زیادہ اچھے ہوں ۔
یہ روایت امام طبرانی نے نقل کی ہے ۔ اس کی سند میں ایسے راوی ہیں جو کتابوں کے رجال میں سے ہیں لیکن ان کی توثیق نہیں کی گئی ہے ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے یمن بھیجا ، میں نے عرض کی : یا رسول اللہ ! آپ مجھے کوئی تلقین کیجئے ، آپ نے ارشاد فرمایا : ” تم پر اچھے اخلاق اختیار کرنا لازم ہے ، کیونکہ لوگوں میں زیادہ اچھے اخلاق کے مالک لوگ ہی زیادہ اچھے دین دار ہوتے ہیں ۔ “
یہ روایت امام طبرانی نے نقل کی ہے ۔ اس کی سند میں ایک راوی عبدالغفار بن قاسم ہے ، اور وہ حدیث ایجاد کرنے والا شخص ہے ۔