مجمع الزوائد ومنبع الفوائد

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ رفیق ہے اور وہ نرمی کو پسند کرتا ہے ، اور وہ نرمی پر وہ چیز عطا کرتا ہے جو وہ سختی پر عطا نہیں کرتا ہے ۔ “
یہ روایت امام أحمد ، امام بزار اور امام ابویعلیٰ نے نقل کی ہے ۔ ابوخلیفہ نامی راوی کو کسی نے ضعیف قرار نہیں دیا ہے ۔ اس روایت کے بقیہ رجال ثقہ ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ رفیق ہے ۔ وہ نرمی کو پسند کرتا ہے اور وہ نرمی پر وہ چیز عطا کرتا ہے ، جو وہ سختی پر عطا نہیں کرتا ہے ۔ “
یہ روایت امام بزار نے ، امام طبرانی نے معجم اوسط اور معجم صغیر میں نقل کی ہے ، امام بزار کی دو اسناد میں سے ایک کے رجال ثقہ ہیں ، اور اس کے بعض راویوں کے بارے میں اختلاف پایا جاتا ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” نرمی جس بھی چیز میں ہو گی اسے آراستہ کر دے گی اور سختی جس بھی چیز میں ہو گی ، اسے معیوب کر دے گی ، بے شک اللہ تعالی رفیق ہے ، اور وہ نرمی کو پسند کرتا ہے ۔ “
یہ روایت امام بزار نے نقل کی ہے ۔ اس کی سند میں ایک راوی کثیر بن حبیب ہے ، جسے ابن ابوحاتم نے ثقہ قرار دیا ہے ۔ اس میں کمزور ہونا پایا جاتا ہے ۔ اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ رفیق ہے ۔ وہ نرمی کو پسند کرتا ہے اور وہ نرمی پر وہ کچھ عطا کرتا ہے ، جو وہ سختی پر عطا نہیں کرتا ہے ۔ “
یہ روایت امام بزار نے نقل کی ہے ۔ اس کی سند میں ایک راوی عبدالرحمن بن ابوبکر جدعانی ہے اور وہ ضعیف ہے ۔

سیدنا جریر بن عبدالله رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نرمی پر وہ چیز عطا کرتا ہے ، جو وہ سختی پر عطا نہیں کرتا ہے ، اور جب اللہ تعالیٰ کسی بندے سے محبت رکھتا ہے ، تو اسے نرمی عطا کر دیتا ہے ، جس بھی گھرانے کے لوگ نرمی سے محروم رہیں وہ حقیقی محروم ہوتے ہیں ۔ “ ( علامہ ہیثمی فرماتے ہیں : ) میں یہ کہتا ہوں ان صحابی کے حوالے سے ” صحیح “ میں
یہ روایت مذکور ہے ، جس میں صرف یہ الفاظ ہیں : ” جو شخص نرمی سے محروم رہا وہ بھلائی سے محروم رہا ۔ “
یہ روایت امام طبرانی نے نقل کی ہے ، اور اس کے رجال ثقہ ہیں ۔

ان کے حوالے سے یہ بات منقول ہے ۔ وہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” نرمی میں اضافہ اور برکت ہے ، اور جو شخص نرمی سے محروم رہے وہ بھلائی سے محروم ہوتا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی عمرو بن ثابت ہے اور وہ متروک ہے ۔

خالد بن معدان اپنے والد کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ رفیق ہے ۔ وہ نرمی کو پسند کرتا ہے اور نرمی سے راضی ہوتا ہے ، اور نرمی پر اس طرح مدد کرتا ہے ، جو مدد وہ سختی پر نہیں کرتا ہے ۔ “ اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما فرماتے ہیں : جب زمین ہریالی ہو ، تو تم آرام سے سفر کرو اور سواریوں کو ان کا حق دو ، بے شک اللہ تعالیٰ مہربان ہے اور نرمی کو پسند کرتا ہے ۔
یہ روایت امام طبرانی نے نقل کی ہے اور اس کی سند میں ایسا راوی ہے ، جس کا نام بیان نہیں کیا گیا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نرمی سے محبت کرتا ہے ، اور اس سے راضی ہوتا ہے ، اور نرمی پر وہ مدد کرتا ہے ، جو مدد وہ سختی پر نہیں کرتا ہے ۔ “
یہ روایت امام طبرانی نے نقل کی ہے ۔ اس کی سند میں ایک راوی صدقہ بن عبداللہ سمین ہے ، جسے ابوحاتم رازی نے ثقہ قرار دیا ہے ، اور جمہور نے اسے ضعیف کہا: ہے ۔ اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ان سے فرمایا : ” اے عائشہ ! نرمی اختیار کرو بے شک اللہ تعالیٰ جب کسی گھرانے کے بارے میں بھلائی کا ارادہ کرتا ہے تو ان کی رہنمائی نرمی کی طرف کرتا ہے ۔ “

ایک روایت میں یہ الفاظ ہیں : ” جب اللہ تعالیٰ کسی گھرانے کے بارے میں بھلائی کا ارداہ کر لے تو ان پر نرمی کو داخل کر دیتا ہے ۔ “
یہ روایت امام أحمد نے نقل کی ہے ، اور دوسری روایت کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے مجھے ایک سیاہ اونٹنی عطا کی ، جو سواری کے اعتبار سے دشوار تھی ، اس میں لگام بھی نہیں ڈالی گئی تھی ۔ نبی اکرم صلی اللہ علیہ وسلم نے اس پر ہاتھ پھیرا پھر آپ نے اس کے لئے برکت کی دعا کی ، پھر آپ نے ارشاد فرمایا : اے عائشہ ! سوار ہو جاؤ اور نرمی سے کام لینا ۔ ایک روایت میں یہ الفاظ ہیں : میں نے اسے مارنا شروع کیا ۔
یہ روایت امام بزار نے دو اسناد کے ساتھ نقل کی ہے ، اور ان دونوں میں سے ایک کے رجال صحیح کے رجال ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب اللہ تعالیٰ کسی قوم کے بارے میں بھلائی کا ارادہ کر لے تو ان پر نرمی کو داخل کر دیتا ہے ۔ “
یہ روایت امام بزار نے نقل کی ہے ، اور اس کے رجال صحیح کے رجال ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اطمینان سے کام کرنا اللہ تعالیٰ کی طرف سے ہوتا ہے ، اور جلدبازی شیطان کی طرف سے ہوتی ہے ، اور اللہ تعالیٰ سے زیادہ معذرت قبول کرنے والا اور کوئی نہیں ہے ، اور اللہ تعالیٰ کے نزدیک حمد سے زیادہ پسندیدہ چیز اور کوئی نہیں ہے ۔ “
یہ روایت امام ابویعلیٰ نے نقل کی ہے ، اور اس کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” نرمی برکت ہے ، اور سختی نحوست ہے ۔ “
یہ روایت امام طبرانی نے معجم اوسط میں نقل کی ہے اور اس کی سند میں ایک راوی معلیٰ بن عرفان ہے ، اور وہ متروک ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جس بھی گھرانے کو نرمی عطا کی گئی اس نے انہیں فائدہ ہی دیا ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، البتہ ابراہیم بن حجاج سامی کا معاملہ مختلف ہے اور وہ ثقہ ہے ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اطمینان سے کام کرتا ہے وہ نتیجہ تک پہنچ جاتا ہے یا اس کے قریب پہنچ جاتا ہے ، اور جو شخص جلدبازی کرتا ہے وہ غلطی کرتا ہے یا اس کے قریب پہنچ جاتا ہے ۔ “
یہ روایت امام طبرانی نے معجم کبیر میں نقل کی ہے ، اور معجم اوسط میں نقل کی ہے ۔ انہوں نے اسے اپنے استاد بکر بن سہل کے حوالے سے نقل کیا ہے ۔ وہ مقارب الحال ہے امام نسائی رحمہ اللہ نے اسے ضعیف قرار دیا ہے ، اور ایک راوی ابن لہیعہ ہے ، اور اس میں بھی ضعف پایا جاتا ہے ۔ اس سے پہلے سیدنا جابر رضی اللہ عنہ اور سیدنا انس رضی اللہ عنہ کے حوالے سے حدیث گزر چکی ہے ، جو خرید و فروخت کرتے ہوئے نرمی کرنے سے متعلق ہے ، اور کتاب البیوع میں گزری ہے ۔