مجمع الزوائد ومنبع الفوائد

سیدنا ابوبکرہ رضی اللہ عنہ بیان کرتے ہیں : نبی اکرم صلی اللہ علیہ وسلم کچھ لوگوں کے پاس تشریف لائے ، جو ایک دوسرے کو ننگی تلواریں پکڑا رہے تھے ، تو نبی اکرم صلی اللہ علیہ وسلم نے ارشاد فرمایا : ” اللہ تعالیٰ اُس شخص پر لعنت کرے ، جو ایسا کرتا ہے ، کیا تمہیں اس بات سے منع نہیں کیا گیا ؟ پھر آپ نے ارشاد فرمایا : جب کسی شخص نے تلوار میان سے نکالی ہوئی ہو ، وہ اُس کی طرف دیکھے ، پھر وہ تلوار اپنے بھائی کو پکڑانے کا ارادہ کرے ، تو پہلے اسے میان میں ڈالے ، پھر وہ اُس کو پکڑائے ۔ “
یہ روایت امام أحمد اور امام طبرانی نے نقل کی ہے ، اس کی سند میں ایک راوی مبارک بن فضالہ ہے اور وہ ثقہ ہے ، لیکن وہ مدلس ہے ، امام أحمد کے بقیہ رجال صحیح کے رجال ہیں ۔

سیدنا بنہ جہنی رضی اللہ عنہ بیان کرتے ہیں : نبی اکرم صلی اللہ علیہ وسلم مسجد میں ( راوی کو شک ہے ، شاید یہ الفاظ ہیں : ) کسی محفل میں ، کچھ لوگوں کے پاس سے گزرے ، جنہوں نے تلواریں میان سے نکالی ہوئی تھیں ، اور وہ ایک دوسرے کو پکڑا رہے تھے ، جو میان کے بغیر تھیں ، تو نبی اکرم صلی اللہ علیہ وسلم نے فرمایا : جو شخص ایسا کرتا ہے ، اللہ تعالیٰ اس پر لعنت کرے ، اگر میں نے تمہیں اس سے پہلے منع نہ کیا ہوتا ( تو میں تمہیں سزا دیتا ) جب تم نے تلوار میان سے نکالی ہوئی ہو ، تو آدمی پہلے اسے میان میں ڈالے اور پھر وہ دوسرے شخص کو اس حالت میں دے ( کہ وہ تلوار میان میں موجود ہو ) ۔ “
یہ روایت امام أحمد نے ، امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی ابن لہیعہ ہے ، اس میں کمزور ہونا پایا جاتا ہے ، اس روایت کے بقیہ رجال صحیح کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم ایک محفل میں کچھ لوگوں کے پاس سے گزرے ، جنہوں نے تلواریں میانوں سے نکالی ہوئی تھیں اور وہ میان میں ڈالے بغیر ایک دوسرے کو وہ تلواریں پکڑا رہے تھے ، نبی اکرم صلی اللہ علیہ وسلم نے ارشاد فرمایا : کیا میں نے اس سے تمہیں منع نہیں کیا ہے ؟ اگر تم میں سے کسی شخص نے تلوار میان سے نکالی ہوئی ہو ، تو وہ پہلے اُسے میان میں ڈالے اور پھر وہ اس کو اپنے بھائی کو دے ۔ “ ( علامہ ہیثمی فرماتے ہیں ) میں یہ کہتا ہوں صحیح میں اس روایت کا ایک حصہ مذکور ہے ۔
یہ روایت امام أحمد اور امام بزار نے نقل کی ہے اور اس کے رجال ثقہ ہیں ۔