مجمع الزوائد ومنبع الفوائد

سیدنا براء بن عازب رضی اللہ عنہ نبی اکرم صلی اللہ علیہ وسلم کے حوالے سے اللہ تعالیٰ کے اس فرمان کے بارے میں نقل کرتے ہیں : ” تمہارے پروردگار نے تمہارے نیچے بہنے والی چیز بنائی ہے “ ۔ نبی اکرم صلی اللہ علیہ وسلم نے فرمایا : اس سے مراد نہر ہے ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی معاویہ بن یحیی صدفی ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” وہ بہتا پانی جس کے بارے میں اللہ تعالیٰ نے سیدہ مریم علیہا السلام سے یہ فرمایا تھا : ” تمہارے پروردگار نے تمہارے نیچے بہتا ہوا پانی بنایا ہے “ ۔ نبی اکرم صلی اللہ علیہ وسلم فرماتے ہیں : یہ ایک نہر تھی جو اللہ تعالیٰ نے جاری کی تھی تاکہ سیدہ مریم علیہا السلام اس سے پانی پی لیں ۔
یہ روایت امام طبرانی نے نقل کی ہے ۔ اس کی سند میں ایک راوی یحیی بن عبداللہ بابلتی ہے ، اور وہ ضعیف ہے ۔