مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کی زوجہ محترمہ سیدہ حفصہ رضی اللہ عنہا کی کنیز نے ان پر جادو کر دیا پھر اس نے اپنے بارے میں اس چیز کا اعتراف بھی کر لیا تو سیدہ حفصہ رضی اللہ عنہا نے عبدالرحمن بن یزید کو حکم دیا تو انہوں نے اس کنیز کو قتل کر دیا سیدنا عثمان غنی رضی اللہ عنہ اس حوالے سے سیدہ حفصہ رضی اللہ عنہا پر اعتراض کیا تو سیدنا عبداللہ رضی اللہ عنہ ان کے پاس آئے اور انہوں نے بتایا کہ اس کنیز نے ان پر جادو کیا تھا اور اس کا اعتراف بھی کر لیا تھا ( راوی بیان کرتے ہیں : ) یوں لگتا ہے کہ سیدنا عثمان غنی رضی اللہ عنہ نے اس حوالے سے اعتراض کیا تھا کہ انہوں نے حاکم وقت کے بغیر خود ایسا کیا تھا ( یعنی اسے سزا دے دی تھی ) ۔
یہ روایت امام طبرانی نے اسماعیل بن عیاش کی اہل مدینہ سے نقل کردہ روایت کے طور پر نقل کی ہے ، اور
یہ روایت ضعیف ہے اس روایت کے بقیہ رجال ثقہ ہیں ۔

سیدنا زید بن ارقم رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کے پاس آیا اس نے نبی اکرم صلی اللہ علیہ وسلم کے لئے گرہ لگائی اور اس گرہ والی چیز کو انصار سے تعلق رکھنے والے ایک شخص کے کنویں میں ڈال دیا ( یعنی نبی اکرم صلی اللہ علیہ وسلم پر جادو کر دیا ) دو فرشتے نبی اکرم صلی اللہ علیہ وسلم کی عیادت کرنے کے لئے آئے ان میں سے ایک آپ کے سرہانے کی طرف بیٹھ گیا اور دوسرا پائنتی کی طرف بیٹھ گیا ان میں سے ایک نے کہا: کیا تم جانتے ہو کہ انہیں کیا تکلیف ہے دوسرے نے بتایا کہ فلاں شخص ان کے پاس آیا اور اس نے ان کے لئے گرہ لگائی اور اس چیز کو فلاں انصاری کے کنویں میں ڈال دیا ( یعنی ان پر جادو کر دیا ) اگر یہ اس کنویں کی طرف کسی کو بھیجیں تو وہ شخص وہاں کے پانی کو زرد پائے گا ۔ راوی کہتے ہیں : نبی اکرم صلی اللہ علیہ وسلم نے ایک شخص کو بھیجا اس نے گرہوں والی چیز کو لیا اور اسے کھول دیا تو نبی اکرم صلی اللہ علیہ وسلم ٹھیک ہو گئے اس کے بعد بھی وہ ( جادو کرنے والا ) شخص نبی اکرم صلی اللہ علیہ وسلم کے پاس آتا رہا لیکن نبی اکرم صلی اللہ علیہ وسلم نے اس کے سامنے اس حوالے سے کوئی بات ذکر نہیں کی اور اسے کوئی سزا نہیں دی ۔

ایک روایت میں یہ الفاظ ہیں : راوی بیان کرتے ہیں : یہودیوں سے تعلق رکھنے والے ایک شخص نے نبی اکرم صلی اللہ علیہ وسلم پر جادو کر دیا آپ اس کی وجہ سے کچھ دن بیمار رہے سیدنا جبرائیل علیہ السلام آپ کے پاس آئے اور بولے : یہودیوں سے تعلق رکھنے والے ایک شخص نے آپ پر جادو کیا ہے ، اور اس نے آپ کے لئے گرہیں لگائی ہیں نبی اکرم صلی اللہ علیہ وسلم نے سیدنا علی رضی اللہ عنہ کو اس کی طرف بھیجا انہوں نے اس چیز کو نکالا تو وہ جیسے جیسے گرہ کھولتے گئے نبی اکرم صلی اللہ علیہ وسلم کی طبیعت میں بہتری ہوتی گئی ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق روایت ذکر کی ہے ۔ ( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اسے اختصار کے ساتھ نقل کیا ہے ۔
یہ روایت امام طبرانی نے مختلف اسانید کے ساتھ نقل کی ہے جن میں سے ایک کے رجال صحیح کے رجال ہیں ۔ اس سے پہلے طب سے متعلق باب میں سیدہ عائشہ رضی اللہ عنہا اور ان کی کنیز کا واقعہ گزر چکا ہے ۔