مجمع الزوائد ومنبع الفوائد

سیدہ ام کبشہ رضی اللہ عنہا جو بنو قضاعہ کی شاخ عذرہ سے تعلق رکھنے والی ایک خاتون ہیں وہ بیان کرتی ہیں : انہوں نے عرض کی : یا رسول اللہ ! آپ مجھے اجازت دیجئے کہ میں فلاں فلاں لشکر کے ساتھ نکلوں نبی اکرم صلی اللہ علیہ وسلم نے فرمایا : جی نہیں انہوں نے عرض کی : یا رسول اللہ ! میں جنگ نہیں کروں گی میں زخمیوں اور بیماروں کی تیمارداری کروں گی ۔ بیماروں کو پانی پلاؤں گی نبی اکرم صلی اللہ علیہ وسلم نے ارشاد فرمایا : اگر اس بات کا اندیشہ نہ ہوتا کہ یہ بات سنت بن جائے گی اور یہ کہا: جائے گا کہ فلاں خاتون بھی تو نکلی تھی تو میں تمہیں اجازت دے دیتا لیکن تم بیٹھی رہو ۔
یہ روایت امام طبرانی نے معجم کبیر اور معجم اوسط میں نقل کی ہے ان دونوں کے رجال صحیح کے رجال ہیں ۔

سیده لیلی غفاریہ رضی اللہ عنہا بیان کرتی ہیں : میں نبی اکرم صلی اللہ علیہ وسلم کے ساتھ نکا کرتی تھی اور زخمیوں کی دیکھ بھال کیا کرتی تھی ۔
یہ روایت امام طبرانی نے نقل کی ہے ۔ اس کی سند میں ایک راوی قاسم بن محمد بن ابوشیبہ ہے اور وہ ضعیف ہے ۔

سیدہ ام سلیم رضی اللہ عنہا بیان کرتی ہیں : نبی اکرم صلی اللہ علیہ وسلم ہمیں یعنی انصار سے تعلق رکھنے والی کچھ خواتین کو جنگ میں ساتھ لے کر جایا کرتے تھے ہم بیماروں کو پانی پلایا کرتی تھیں اور زخمیوں کی دیکھ بھال کیا کرتی تھیں ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا انس بن مالک رضی اللہ عنہ بیان کرتے ہیں : سیدہ ام سلیم رضی اللہ عنہا نے عرض کی : یا رسول اللہ ! کیا میں آپ کے ساتھ جنگ میں شرکت کے لئے نکلوں ؟ نبی اکرم صلی اللہ علیہ وسلم نے فرمایا : اے ام سلیم خواتین پر جہاد لازم قرار نہیں دیا گیا ہے انہوں نے عرض کی : میں زخمیوں کی دیکھ بھال کروں گی ، چشمے کی دیکھ بھال کروں گی اور پانی پلاؤں گی ، نبی اکرم صلی اللہ علیہ وسلم نے فرمایا : پھر ٹھیک ہے ۔ ( علامہ ہیثمی فرماتے ہیں : ) میں یہ کہتا ہوں ۔ سیدنا انس رضی اللہ عنہ کے حوالے سے منقول حدیث ” صحیح “ اور دیگر کتابوں میں مذکور ہے ، لیکن وہ اس سیاق کے بغیر ہے ۔
یہ روایت امام طبرانی نے اپنے استاد جعفر بن سلیمان بن حاجب کے حوالے سے نقل کی ہے اور میں ان سے واقف نہیں ہوں اس روایت کے بقیہ رجال ثقہ ہیں ۔