مجمع الزوائد ومنبع الفوائد

سیدنا عمرو بن العاص رضی اللہ عنہ بیان کرتے ہیں : جب نبی اکرم صلی اللہ علیہ وسلم نے انہیں جنگ ذات سلاسل کی طرف بھیجا تو سیدنا عمرو رضی اللہ عنہ نے لوگوں کو تین دن تک آگ جلانے سے منع کیے رکھا راوی بیان کرتے ہیں : لوگوں نے سیدنا ابوبکر رضی اللہ عنہ کے ساتھ اس بارے میں بات چیت کی اور یہ کہا: کہ آپ ان سے ہمارے بارے میں بات چیت کریں سیدنا ابوبکر رضی اللہ عنہ ان کے پاس آئے تو سیدنا عمرو رضی اللہ عنہ بولے : لوگوں نے آپ کو میری طرف بھیجا ہے ! جو شخص آگ جلائے گا ، میں اُسے اس ( آگ ) میں ڈال دوں گا ، اس کے بعد ان لوگوں کا دشمن سے مقابلہ ہوا ان لوگوں نے دشمن کو پسپا کر دیا پھر سیدنا عمرو بن العاص رضی اللہ عنہ نے انہیں دشمن کا پیچھا کرنے کی اجازت بھی نہیں دی ، جب وہ لوگ نبی اکرم صلی اللہ علیہ وسلم کی خدمت میں واپس آئے تو لوگوں نے آپ کو اس بارے میں بتایا اور آپ کو اس بارے میں شکایت کی انہوں نے عرض کی : یا رسول اللہ ! یہ لوگ کم تھے ، مجھے اندیشہ ہوا کہ یہ دشمن کا پیچھا کریں گے اور مجھے یہ بھی اندیشہ ہوا کہ دشمن کے پاس کمک ہو اور وہ ان پر پلٹ کر حملہ کر دیں ، تو نبی اکرم صلی اللہ علیہ وسلم نے ان کے فیصلے کی تعریف کی ۔

ایک روایت میں یہ الفاظ ہیں : سیدنا عمرو رضی اللہ عنہ نے عرض کی : میں نے انہیں اس اندیشے کے تحت آگ جلانے سے منع کیا تھا کہ دشمن ان کی کم تعداد کا اندازہ نہ لگا لے ۔
یہ روایت امام طبرانی نے دو اسناد کے ساتھ نقل کی ہے پہلی کے رجال صحیح کے رجال ہیں ۔