مجمع الزوائد ومنبع الفوائد

عیزار بن حریث بیان کرتے ہیں : میں نے سیدنا امام حسن رضی اللہ عنہ اور سیدنا امام حسین رضی اللہ عنہ کو مہندی اور کتم کا خضاب لگاتے ہوئے دیکھا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا ابودرداء رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص سیاہ خضاب لگائے گا اللہ تعالیٰ قیامت کے دن اس کے چہرے کو سیاہ کر دے گا“ ۔
یہ روایت امام طبرانی نے نقل کی ہے ۔ اس کی سند میں ایک راوی وضین بن عطاء ہے ، جسے امام أحمد ، یحیی بن معین اور ابن حبان نے ثقہ قرار دیا ہے ، اور ان سے نیچے کے مرتبے کے افراد نے اسے ضعیف قرار دیا ہے اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” زرد رنگ مؤمن کا خضاب ہے ، اور سرخ رنگ مسلمان کا خضاب ہے ، اور سیاہ رنگ کافر کا خضاب ہے “ ۔
یہ روایت امام طبرانی نے نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

اسماعیل بن ابوخالد بیان کرتے ہیں : سیدنا انس بن مالک رضی اللہ عنہ سر میں مہندی کے ذریعے خضاب لگاتے تھے ۔
یہ روایت امام طبرانی نے مختلف طرق کے ساتھ نقل کی ہے ۔ اور اس کے رجال صحیح کے رجال ہیں ۔

اسماعیل بن ابوخالد بیان کرتے ہیں : سیدنا انس رضی اللہ عنہ اپنی داڑھی پر ورس کا خضاب لگاتے تھے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں صرف خالد بن عقبہ کا معاملہ مختلف ہے ، اور وہ ثقہ ہے ۔

عثمان بن عبیداللہ بیان کرتے ہیں : میں نے سیدنا جابر بن عبداللہ رضی اللہ عنہ کو زرد رنگ کا خضاب لگاتے ہوئے دیکھا ہے ۔ انہوں نے بیعت عقبہ میں شرکت کی ہے ۔
یہ روایت امام طبرانی نے نقل کی ہے ۔ اور عثمان نامی راوی کا ذکر ابن ابوحاتم نے کیا ہے یہ عثمان بن عبداللہ بن ابورافع ہے کسی نے اس پر جرح نہیں کی ہے اس روایت کے بقیہ رجال صحیح کے رجال ہیں ۔

عمر بن ابوزائدہ بیان کرتے ہیں : میں نے حکیم بن جابر کو دیکھا کہ انہوں نے زر درنگ کا خضاب لگایا تھا ۔ اس روایت کے رجال صحیح کے رجال ہیں ۔

عبدالملک بن عمیر بیان کرتے ہیں : میں نے سیدنا جریر رضی اللہ عنہ کو زرد اور زعفران کا خضاب لگائے دیکھا ہے ۔
یہ روایت امام طبرانی نے دو اسناد کے ساتھ نقل کی ہے ۔ ان دونوں میں سے ایک کے رجال صحیح کے رجال ہیں ۔

عثمان بن عبیداللہ بن ابورافع بیان کرتے ہیں : میں نے سیدنا رافع بن خدیج رضی اللہ عنہ کو زرد خضاب لگائے ہوئے دیکھا ہے ۔
یہ روایت امام طبرانی نے نقل کی ہے ۔ عثمان نامی راوی کا ذکر ابن ابوحاتم نے کیا ہے کسی نے اسے ضعیف قرار نہیں دیا ہے اس روایت کے بقیہ رجال صحیح کے رجال ہیں ۔

عثمان بن عبداللہ بن سراقہ بیان کرتے ہیں : میں نے سیدنا ابوقتادہ رضی اللہ عنہ سیدنا ابوہریرہ رضی اللہ عنہ سیدنا عبداللہ بن عمر رضی اللہ عنہما اور سیدنا ابواسید رضی اللہ عنہ کو دیکھا کہ یہ حضرات ہمارے پاس سے گزرے ہم اس وقت فوجی دستے میں تھے ہم نے ان حضرات میں سے عنبر کی خوشبو پائی انہوں نے اپنی داڑھیوں پر زرد خضاب لگایا ہوا تھا ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

عمار بن ابوعمار بیان کرتے ہیں : میں نے سیدنا عبدالرحمن بن ابوبکر رضی اللہ عنہ کو مہندی اور کتم کا خضاب لگائے ہوئے دیکھا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

اسماعیل بن ابوخالد بیان کرتے ہیں : میں نے سیدنا عبداللہ بن ابواوفی رضی اللہ عنہ کو دیکھا انہوں نے اپنی داڑھی پر مہندی لگائی ہوئی تھی ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

محمد بن اسحاق بیان کرتے ہیں ؟ سیدنا عبداللہ بن جعفر رضی اللہ عنہ مہندی لگایا کرتے تھے ۔
یہ روایت امام طبرانی نے نقل کی ہے ۔ ابن اسحاق نامی راوی نے سیدنا عبداللہ بن جعفر رضی اللہ عنہ کا زمانہ نہیں پایا ہے اس روایت کے بقیہ رجال ثقہ ہیں ۔