مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کو پودوں کی چمک دمک پسند تھی ۔
یہ روایت امام أحمد نے نقل کی ہے ۔ اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اہل جنت کے پودوں کا سردار ، مہندی کا پودا ہے “ ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں صرف عبداللہ بن أحمد بن حنبل کا معاملہ مختلف ہے وہ ثقہ اور مامون ہے ۔

سیدنا عبداللہ بن عباس رضی اللہ عنہما بیان کرتے ہیں : ایک مرتبہ نبی اکرم صلی اللہ علیہ وسلم ” اثانیہ “ میں موجود تھے اسی دوران آپ کے پاس مہندی کا پودا لایا گیا تو آپ نے فرمایا : یہ جنت کے پودے کے مشابہہ ہے ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہیعہ ہے ، اور اس کے علاوہ بھی ایسا راوی ہے جس کی ، توثیق کی گئی ہے اس کی نقل کردہ حدیث حسن ہے ، اور اس میں ضعف پایا جاتا ہے اس کے بقیہ رجال ثقہ ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی عورت اپنے شوہر کے علاوہ کسی اور کے لئے خوشبو لگاتی ہے ، تو وہ آگ ہے جو عیب میں ہو“ ۔
یہ روایت امام طبرانی نے معجم اوسط میں نقل کی ہے ۔ اس کی سند میں دو خواتین ایسی ہیں جن سے میں واقف نہیں ہوں اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” اس درخت سے سالن تیار کرو ( نبی اکرم صلی اللہ علیہ وسلم کی مراد زیتون کا درخت تھا ) اور جس شخص کے سامنے خوشبو پیش کی جائے وہ اسے لگا لے “ ۔
یہ روایت امام طبرانی نے معجم اوسط میں موسیٰ بن زکریا سے نقل کی ہے ۔ اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جب کسی شخص کے پاس خوشبو لائی جائے ، تو وہ اسے لگا لے اور جب حلوہ ( یا میٹھی چیز ) لائی جائے ، تو وہ اسے استعمال کرے “ ۔
یہ روایت امام طبرانی نے معجم اوسط میں اپنے استاد کے حوالے سے نقل کی ہے ۔ اس کی سند میں ایک راوی فضالہ بن حصین ہے ۔ ابوحاتم کہتے ہیں : یہ مضطرب الحدیث ہے ، اور ایک راوی ابراہیم بن عرعرہ ہے میں اس سے واقف نہیں ہوں اس روایت کے بقیہ رجال ثقہ ہیں ۔
یہ روایت امام بزار نے نقل کی ہے ۔ انہوں نے اس میں یہ الفاظ نقل کیے ہیں : جب تم میں سے کسی ایک کے سامنے خوشبو رکھی جائے ، تو وہ اس میں سے لگا لے “ اس کی سند میں ابراہیم بن عرعرہ نامی راوی نہیں ہے ۔

محمد بن عبداللہ بن جحش ، سیدہ زینب رضی اللہ عنہا کے حوالے سے نبی اکرم صلی اللہ علیہ وسلم تک مرفوع حدیث کے طور پر یہ بات نقل کرتے ہیں : وہ خاتون بیان کرتی ہیں : نبی اکرم صلی اللہ علیہ وسلم نے ارشاد فرمایا : ” عزت افزائی کو قبول کرو اور سب سے زیادہ فضیلت والی عزت افزائی خوشبو ہے جو ہلکی ہؤ ، وہ اٹھانے میں ہلکی ہو اور اس کی خوشبو زیادہ پاکیزہ ہو“ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کے سامنے جب بھی خوشبو پیش کی گئی ، تو آپ نے کبھی اسے واپس نہیں کیا ۔
یہ روایت امام بزار نے نقل کی ہے ۔ اس کی سند میں ایک راوی مبارک بن فضالہ ہے ، اور وہ ضعیف ہے ، اور اس کی ، توثیق کی گئی ہے اس روایت کے بقیہ رجال ثقہ ہیں ۔

سیدنا ابوموسی اشعری رضی اللہ عنہ بیان کرتے ہیں ایک شخص نے نبی اکرم صلی اللہ علیہ وسلم کی بیعت کرنے کا ارادہ کیا نبی اکرم صلی اللہ علیہ وسلم نے اسے ملاحظہ فرمایا کہ اس کے جسم پر زرد رنگ کا نشان موجود تھا تو آپ نے اس کی بیعت لینے سے انکار کر دیا آپ نے ارشاد فرمایا : ” مردوں کی خوشبو وہ ہوتی ہے جس کی خوشبو ظاہر ہو اور اس کا رنگ پوشیدہ رہے ، اور عورتوں کی خوشبو وہ ہوتی ہے جس کا رنگ ظاہر ہو اور اس کی خوشبو پوشیدہ رہے “ ۔
یہ روایت امام طبرانی نے نقل کی ہے ۔ اس کی سند میں ایک راوی ابراہیم بن بشار مادی ہے ، اور وہ ضعیف ہے اس کی ، توثیق کی گئی ہے اس روایت کے بقیہ رجال صحیح کے رجال ہیں ۔

ابوقیس اودی بیان کرتے ہیں : سیدنا عبداللہ رضی اللہ عنہ کو خوشبو پسند تھی ۔
یہ روایت امام طبرانی نے نقل کی ہے ۔ ابوقیس اودی نامی راوی نے سیدنا عبداللہ بن مسعود رضی اللہ عنہ سے سماع نہیں کیا ہے یہ اور اس کے پہلے کے راوی ثقہ ہیں ۔

سیدنا حرب بن حارث رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو جمعہ کے دن منبر پر یہ ارشاد فرماتے ہوئے سنا : ” ہم نے خواتین کے لئے ورس اور ابر کا حکم دیا ہے “ ۔ ( راوی بیان کرتے ہیں : ) جہاں تک ورس کا تعلق ہے ، تو یہ خواتین کے پاس یمن سے آتی تھی جہاں تک ابر کا تعلق ہے ، تو یہ لوگ ذمیوں سے لیا کرتے تھے جو اس چیز کے بدلے میں ہوتی تھی ، جو ان پر جزیہ لازم ہوتا تھا ۔
یہ روایت امام طبرانی نے نقل کی ہے ۔ اس کی سند میں ایک راوی ربیع بن زیاد محاربی ہے ۔ ابن ابوحاتم نے اس کا ذکر کیا ہے ۔ انہوں نے اسے ضعیف بھی قرار نہیں دیا اور اس کی ، توثیق بھی نہیں کی اس روایت کے بقیہ رجال ثقہ ہیں ۔