مجمع الزوائد ومنبع الفوائد

سیدنا فضالہ بن عبید رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اسلام کی حالت میں بوڑھا ہو جائے ( یا اس کے بال سفید ہو جائیں ) تو یہ اس کے لئے قیامت کے دن نور ہوں گے “ ۔ آپ کے پاس موجود ایک صاحب نے آپ کی خدمت میں عرض کی : کچھ لوگ سفید بال اکھاڑ لیتے ہیں ؟ نبی اکرم صلی اللہ علیہ وسلم نے ارشاد فرمایا : جو شخص چاہے وہ اپنے نور کو اکھاڑ لے ۔
یہ روایت امام بزار نے نقل کی ہے ۔ اور امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے ، اور اس میں ضعف پایا جاتا ہے اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : سیدنا عمر رضی اللہ عنہ اپنے سفید بال متغیر نہیں کرتے تھے ( یعنی ان پر خضاب نہیں لگاتے تھے ) ان سے اس بارے میں بات کی گئی ، اے امیرالمؤمنین ! آپ ان کا متغیر نہیں کرتے جبکہ سیدنا ابوبکر رضی اللہ عنہ متغیر کر لیتے تھے ( یعنی خضاب لگا لیتے تھے ) تو سیدنا عمر رضی اللہ عنہ نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس شخص کے اسلام کے دوران بال سفید ہو جائیں ، تو یہ اس کے لئے قیامت کے دن نور ہوں گے “ ۔ ( پھر سیدنا عمر رضی اللہ عنہ نے فرمایا : ) تو میں ، اس میں سے کچھ بھی تبدیل نہیں کروں گا ۔
یہ روایت امام طبرانی نے معجم کبیر میں نقل کی ہے ۔ اور معجم اوسط میں اس کی مانند نقل کی ہے ۔ اس کی سند میں ایک راوی سوید بن عبدالعزیز ہے ، اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص اسلام میں بوڑھا ہو جائے ( یعنی اس کے بال سفید ہو جائیں ) تو یہ اس کے لئے قیامت کے دن نور ہوں گے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی طریف بن زید ہے عقیلی کہتے ہیں : اس حدیث کی متابعت نہیں کی گئی ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم سفید بال نہ اکھیڑو کیونکہ یہ نور ہیں جو شخص اسلام میں سفید بالوں والا ہو جائے ، تو اس کے عوض میں اس شخص کے لئے دس نیکیاں نوٹ کی جائیں گی اور اس کے عوض میں اس کے ایک گناہ کو مٹا دیا جائے گا ، اور اس کے عوض میں اس کا ایک درجہ بلند کیا جائے گا “ ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے اختصار کے ساتھ نقل کی ہے ۔
یہ روایت امام طبرانی نے نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

سیدنا انس رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” اللہ تعالیٰ فرماتا ہے : ” مجھے اپنے بندے اور اپنی کنیز سے حیاء آتی ہے جن کے اسلام میں بال سفید ہو جاتے ہیں میرے بندے کی داڑھی کے بال سفید ہو جاتے ہیں اور میری کنیز کے سر کے بال اسلام میں سفید ہو جاتے ہیں ( تو مجھے اس بات سے حیاء آتی ہے ) کہ میں اس کے بعد بھی انہیں جہنم میں عذاب دوں “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی نوح بن ذکوان ہے ، اور اس کے علاوہ دیگر ضعیف راوی ہیں ۔

ابومالک اشجعی بیان کرتے ہیں : میں نے اپنے والد کو سنا میں نے ان سے سوال کیا ، تو انہوں نے بتایا کہ نبی اکرم صلی اللہ علیہ وسلم کے زمانے میں ہم ورس اور زعفران خضاب کے طور پر لگاتے تھے ۔
یہ روایت امام أحمد اور امام بزار نے نقل کی ہے ۔ اور اس کے رجال صحیح کے رجال ہیں صرف بکر بن عیسیٰ کا معاملہ مختلف ہے ، اور وہ ثقہ ہے ۔

حکم بن عمرو غفاری بیان کرتے ہیں : میں اور میرا بھائی رافع بن عمرو ، امیرالمؤمنین سیدنا عمر بن خطاب رضی اللہ عنہ کی خدمت میں حاضر ہوئے میں نے مہندی کا خضاب لگایا ہوا تھا ، اور میرے بھائی نے زرد خضاب لگایا ہوا تھا سیدنا عمر بن خطاب رضی اللہ عنہ نے میرے بارے میں فرمایا یہ اسلام کا خضاب ہے ، اور میرے بھائی کے لئے فرمایا یہ ایمان کا خضاب ہے ۔
یہ روایت امام أحمد نے نقل کی ہے ۔ اس کی سند میں ایک راوی عبدالصمد بن حبیب ہے یحیی بن معین نے اسے ثقہ قرار دیا ہے امام أحمد نے اسے ضعیف کہا: ہے اس روایت کے بقیہ رجال ثقہ ہیں ۔

محمد بن سیرین بیان کرتے ہیں : سیدنا انس رضی اللہ عنہ سے نبی اکرم صلی اللہ علیہ وسلم کے خضاب کے بارے میں دریافت کیا گیا : تو انہوں نے فرمایا : نبی اکرم صلی اللہ علیہ وسلم کے صرف معمولی سے بال سفید تھے ۔ آپ کے بعد سیدنا ابوبکر رضی اللہ عنہ اور سیدنا عمر رضی اللہ عنہ مہندی اور کتم کا خضاب لگایا کرتے تھے ۔ راوی بیان کرتے ہیں : سیدنا ابوبکر رضی اللہ عنہ فتح مکہ کے دن اپنے والد سیدنا ابوقحافہ رضی اللہ عنہ کو اٹھا کر لائے ، اور انہیں نبی اکرم صلی اللہ علیہ وسلم کے سامنے بٹھا دیا نبی اکرم صلی اللہ علیہ وسلم نے سیدنا ابوبکر رضی اللہ عنہ سے فرمایا : تم ان بزرگ کو اپنے گھر میں ہی رہنے دیتے ، ہم ان کے پاس چلے جاتے نبی اکرم صلی اللہ علیہ وسلم نے سیدنا ابوبکر رضی اللہ عنہ کی عزت افزائی کے لئے یہ بات ارشاد فرمائی ، سیدنا ابوقحافہ رضی اللہ عنہ نے اسلام قبول کر لیا ان کے سر اور داڑھی کے بال ثغامہ ( نامی پھول ) کی طرح سفید تھے ، تو نبی اکرم صلی اللہ علیہ وسلم نے فرمایا : انہیں تبدیل کر دو لیکن سیاہ رنگ استعمال کرنے سے اجتناب کرنا ۔
یہ روایت امام أحمد نے نقل کی ہے ۔ امام ابویعلیٰ نے اس کی مانند نقل کی ہے ۔ امام بزار نے اختصار کے ساتھ نقل کی ہے ۔ صحیح میں اس کا کچھ حصہ منقول ہے امام أحمد کے رجال صحیح کے رجال ہیں ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم کچھ انصاری بزرگوں کے پاس تشریف لائے جن کی داڑھیاں سفید تھیں نبی اکرم صلی اللہ علیہ وسلم نے فرمایا : اے انصار کے گروہ ! زرد رنگ لگا لو اور اہل کتاب کے برخلاف کرو ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے جو اس سے پہلے اس کو پہننے کی ممانعت سے متعلق باب میں گزر چکی ہے ۔
یہ روایت امام أحمد نے نقل کی ہے ۔ اس کے رجال صحیح کے رجال ہیں صرف قاسم نامی راوی کا معاملہ مختلف ہے ، اور وہ ثقہ ہے اس کے بارے میں ایسا کلام کیا گیا ہے جو نقصان دہ نہیں ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” عجمیوں کے ساتھ مشابہت اختیار نہ کرو اور داڑھی ( کا سفید رنگ ) تبدیل کر لو “ ۔
یہ روایت امام بزار نے نقل کی ہے ۔ اس کی سند میں ایک راوی رشدین بن کریب ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ہمیں مہندی لگانے کا حکم دیا تھا ، اور سیاہ ( خضاب ) سے منع کیا تھا ۔
یہ روایت امام بزار نے نقل کی ہے ۔ اس کی سند میں ایک راوی یوسف بن خالد سمتی ہے ، اور وہ ضعیف ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مہندی کو خضاب کے طور پر لگاؤ ! یہ تمہاری جوانی اور تمہارے نکاح ( کی صلاحیت ) میں اضافہ کرے گی“ ۔
یہ روایت امام بزار نے نقل کی ہے ۔ اس کی سند میں ایک راوی یحیی بن میمون تمار ہے ، اور وہ متروک ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سفید رنگ کو تبدیل کر دو اور جس چیز کے ذریعے تم اسے تبدیل کرو گے اس میں سب سے بہتر مہندی اور کتم ہے “ ۔
یہ روایت امام بزار نے نقل کی ہے ۔ اس کی سند میں ایک راوی سعید بن بشیر ہے ، اور وہ ثقہ ہے اس میں ضعف پایا جاتا ہے ۔

سیدنا ابوطفیل رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جس چیز کے ذریعے تم سفید بالوں کو تبدیل کرو گے اس میں سب سے بہتر مہندی اور کتم ہے ( راوی کو شک ہے شاید یہ الفاظ ہیں : ) نبی اکرم صلی اللہ علیہ وسلم مہندی اور کتم کا خضاب لگایا کرتے تھے ۔
یہ روایت امام بزار نے نقل کی ہے ۔ اس کی سند میں ایک راوی ابونضر ہے ، اور وہ انتہائی ضعیف ہے اس نے سیدنا ابوطفیل رضی اللہ عنہ سے سماع نہیں کیا ہے ۔

سیدنا انس رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس کے سر اور داڑھی کے بال سفید تھے نبی اکرم صلی اللہ علیہ وسلم نے دریافت کیا : کیا تم مسلمان نہیں ہو ؟ اس نے عرض کی : جی ہاں ! ہوں ، نبی اکرم صلی اللہ علیہ وسلم نے فرمایا : پھر تم خضاب لگاؤ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی علی بن ابوسارہ ہے ، اور وہ متروک ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ’ مہندی کو خضاب کے طور پر لگاؤ کیونکہ اس کی خوشبو پاکیزہ ہے ، اور یہ سر کے درد ( یا سر کو چکرانے ) کو سکون دیتی ہے “ ۔
یہ روایت امام ابویعلیٰ نے حسن بن دعامہ کے حوالے سے عمر بن شریک سے نقل کی ہے ۔ امام ذہبی کہتے ہیں : یہ دونوں مجہول ہیں ۔

سیدنا انس بن مالک رضی اللہ عنہ بیان کرتے ہیں : ہم لوگ ایک دن نبی اکرم صلی اللہ علیہ وسلم کے پاس موجود تھے یہودی آپ کی خدمت میں حاضر ہوئے نبی اکرم صلی اللہ علیہ وسلم نے ان کی سفید داڑھیاں دیکھیں ، تو ارشاد فرمایا تم لوگ ان کو تبدیل کیوں نہیں کرتے ہو ( یعنی خضاب کیوں نہیں لگاتے ہو ؟ ) آپ کو بتایا گیا یہ لوگ اس کو ناپسند کرتے ہیں ، تو نبی اکرم صلی اللہ علیہ وسلم نے ( مسلمانوں سے فرمایا : ) لیکن تم لوگ اس کا رنگ تبدیل کرو اور سیاہ رنگ استعمال کرنے سے بچنا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن لہیعہ ہے اس روایت کے بقیہ رجال ثقہ ہیں اور یہ حدیث حسن ہے ۔

سیدہ عائشہ صدیقہ رضی اللہ عنہا بیان کرتی ہیں ۔ نبی اکرم صلی اللہ علیہ وسلم نے ارشاد فرمایا : ” سفید رنگ کو تبدیل کر دو ! یہودیوں یا عیسائیوں کے ساتھ مشابہت اختیار نہ کرو “ ۔
یہ روایت امام طبرانی نے اپنے استاد کے حوالے سے نقل کی ہے ۔ جس کا نام أحمد ہے میں اس سے واقف نہیں ہوں بظاہر یہ لگتا ہے کہ وہ ثقہ ہیں کیونکہ امام طبرانی نے اس سے بکثرت روایات نقل کی ہیں اس روایت کے بقیہ رجال ثقہ ہیں ۔

سیدنا بریدہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کی کنپٹیوں پر مہندی لگی ہوئی دیکھی ہے ۔
یہ روایت امام طبرانی نے معجم اوسط میں نقل کی ہے ۔ اور اس کی سند میں ایک راوی ایسا ہے جس سے میں واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں : جب نبی اکرم صلی اللہ علیہ وسلم نے مکہ فتح کیا ، تو سیدنا ابوبکر رضی اللہ عنہ آپ کے سرہانے کھڑے ہوئے تھے انہوں نے عرض کی : یا رسول اللہ ! میرے ماں باپ آپ پر قربان ہوں سیدنا ابوقحافہ رضی اللہ عنہ ایک عمر رسیدہ شخص ہیں اور وہ مکہ کے کنارے پر موجود ہیں ۔ نبی اکرم صلی اللہ علیہ وسلم نے فرمایا : تم ہمیں لے کر ان کی طرف چلو انہوں نے عرض کی : یا رسول اللہ ! وہ اس بات کے زیادہ حق دار ہیں کہ وہ آپ کے پاس آئیں پھر سیدنا ابوقحافہ رضی اللہ عنہ کو لایا گیا تو ان کے سر اور داڑھی کے بال ثغامہ ( نامی پھول کی طرح سفید تھے ) نبی اکرم صلی اللہ علیہ وسلم نے فرمایا : اسے تبدیل کر دو ! لیکن سیاہ رنگ استعمال کرنے سے بچنا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی داؤد بن فراہیج ہے ، جسے یحیی القطان اور دیگر حضرات نے ثقہ قرار دیا ہے ، اور ایک جماعت نے اسے ضعیف کہا: ہے اس کی سند میں ایسے راوی ہیں جن سے میں واقف نہیں ہوں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” آخری زمانے میں ایسے لوگ ہوں گے جو اپنے بال سیاہ کر لیں گے ، اللہ تعالیٰ ان کی طرف نظر رحمت نہیں کرے گا “ ۔
( علامہ ہیثمی فرماتے ہیں : ) میں یہ کہتا ہوں
یہ روایت امام ابوداؤد نے نقل کی ہے ۔ تاہم اس میں یہ الفاظ نہیں ہے : ” اللہ تعالی ان کی طرف نظر رحمت نہیں کرے گا “ ۔
یہ روایت امام طبرانی نے معجم اوسط میں نقل کی ہے ۔ اور اس کی سند عمدہ ہے ۔

سیدنا عمر رضی اللہ عنہ کے بارے میں یہ بات منقول ہے کہ ان کنیز نے ان کے سامنے یہ پیشکش کی کہ وہ ان کی داڑھی کو رنگ دے ، تو انہوں نے فرمایا : کیا تم یہ چاہتی ہو کہ تم میرے نور کو بجھا دو ! جس طرح فلاں شخص نے اپنے نور کو بجھا دیا ہے ۔
یہ روایت امام طبرانی نے نقل کی ہے ۔ اس کی سند میں ایک راوی بقیہ بن ولید ہے ، اور وہ مدلس ہے اس روایت کے بقیہ رجال ثقہ ہیں ۔

ابوعامر سلیم بن عامر بیان کرتے ہیں : میں نے سیدنا عمر بن خطاب رضی اللہ عنہ کو دیکھا کہ وہ اپنی داڑھی کا رنگ تبدیل نہیں کرتے تھے ۔
یہ روایت امام طبرانی نے نقل کی ہے ۔ اور اس کے رجال ثقہ ہیں صرف بکر بن سہل کا معاملہ مختلف ہے امام ذہبی کہتے ہیں : یہ مقارب الحدیث ہے امام نسائی رحمہ اللہ نے اسے ضعیف قرار دیا ہے ۔

مستقیم بن عبدالملک بیان کرتے ہیں : میں نے سیدنا امام حسن رضی اللہ عنہ اور سیدنا امام حسین رضی اللہ عنہ کو دیکھا کہ ان دونوں کے بال بھی سفید نہیں ہوئے تھے اور یہ دونوں خضاب بھی نہیں لگاتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی جمہور بن منصور ہے ، اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدہ ام عیاش رضی اللہ عنہا بیان کرتی ہیں میں نے نبی اکرم صلی اللہ علیہ وسلم کو خضاب لگاتے ہوئے نہیں دیکھا یہاں تک کہ آپ کا وصال ہو گیا ۔
یہ روایت امام طبرانی نے نقل کی ہے ۔ اس کی سند میں ایک راوی عبدالکریم بن روح ہے ، جسے ابن حبان نے ثقہ قرار دیا ہے وہ کہتے ہیں : یہ غلطی کر جاتا ہے ، اور برخلاف روایت نقل کرتا ہے دیگر حضرات نے اسے ضعیف قرار دیا ہے اس روایت کے بقیہ رجال کے بارے میں کسی نے کلام نہیں کیا ہے ۔

سیدنا حسان بن ابوجابر سلمی رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ طائف میں موجود تھا آپ نے اپنے اصحاب میں سے کچھ افراد کو دیکھا کہ انہوں نے داڑھی پر سرخ رنگ لگایا ہے ، اور کچھ نے داڑھیوں پر زرد رنگ لگایا ہے ، تو آپ نے فرمایا : سرخ رنگ لگانے والوں اور زرد رنگ لگانے والوں کو خوش آمدید ہے ۔
یہ روایت امام طبرانی نے نقل کی ہے ۔ اس کی سند میں تابعی یوسف نامی شخص ہے جس کا نام بیان نہیں کیا گیا ہے اس میں ایک راوی بقیہ ہے جو مدلس ہے اس کے بقیہ رجال صحیح کے رجال ہیں ۔

سیدنا انس بن مالک رضی اللہ عنہ اور سیدنا شعیب بن عمرو رضی اللہ عنہ اور سیدنا ناجیہ بن عمرو رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کو دیکھا ہے کہ آپ نے خضاب لگایا تھا ۔
یہ روایت امام طبرانی نے نقل کی ہے ۔ اس کی سند میں ایک راوی عائذ بن شریح ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جب خضاب لگانے کا ارادہ کرتے تھے ، تو کچھ تیل اور زعفران لے کر اسے اپنے ہاتھ پر ملتے تھے اور پھر اسے اپنی داڑھی پر لگا لیتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی ابوتوبہ بشیر بن عبداللہ ہے ابن ابوحاتم نے اس کا ذکر کیا ہے ، اور اس پر جرح نہیں کی ہے اس روایت کے بقیہ رجال صحیح کے رجال ہیں ۔

سیدہ جہدمہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو دیکھا آپ نماز کے لئے تشریف لے گئے آپ کے سر اور داڑھی مبارک سے مہندی کی مہک پھوٹ رہی تھی ۔
یہ روایت امام طبرانی نے نقل کی ہے ۔ اس کی سند میں ایک راوی ابوبکر داہری ہے ، اور وہ ضعیف ہے ۔

سیدنا عتبہ بن عبد رضی اللہ عنہ بیان کرتے ہیں : نبی اکرم صلی اللہ علیہ وسلم بالوں کا رنگ تبدیل کرنے کا حکم دیتے تھے تاکہ عجمیوں کے برخلاف ہو ۔
یہ روایت امام طبرانی نے نقل کی ہے ۔ اس کی سند میں ایک راوی احوص بن حکیم ہے ، اور وہ ضعیف ہے ویسے اس کی توثیق کی گئی ہے ۔

عامر بن سعد بیان کرتے ہیں : سیدنا سعد رضی اللہ عنہ سیاہ رنگ کا خضاب لگاتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی سلیم بن مسلم ہے میں اس سے واقف نہیں ہوں اس روایت کے بقیہ رجال صحیح کے رجال ہیں انہوں نے اسے ایک سند کے ساتھ نقل کیا ہے جس میں ایک راوی رشدین بن سعد ہے ، اور وہ ضعیف ہے اس کی ، توثق کی گئی ہے ۔

سیدنا عبداللہ بن عمرو رضی اللہ عنہ بیان کرتے ہیں : سیدنا عمر بن خطاب رضی اللہ عنہ نے سیدنا عمرو بن العاص رضی اللہ عنہ کو دیکھا کہ انہوں نے سفید بالوں کو سیاہ خضاب لگایا ہوا تھا جو کوے کے پروں کی طرح تھا آپ نے فرمایا : اے ابوعبداللہ ! یہ کیا ہے ؟ انہوں نے جواب دیا : اے امیرالمؤمنین میں اس بات کو پسند کرتا ہوں کہ مجھ میں بقیہ ( شاید مراد ، گزری جوانی ہے ) نظر آئے ، تو سیدنا عمر رضی اللہ عنہ نے انہیں اس سے منع نہیں کیا اور اس حوالے سے ان پر اعتراض نہیں کیا ۔
یہ روایت امام طبرانی نے نقل کی ہے ۔ اس کی سند میں ایسا راوی ہے جس کا نام بیان نہیں کیا گیا ہے سعد بن ابومریم بیان کرتے ہیں : مجھے اس شخص نے حدیث بیان کی ہے ، جسے میں قابل اعتماد سمجھتا ہوں اس روایت کی سند میں ایک راوی عبدالرحمن بن ابوزناد ہے اس روایت کے بقیہ رجال ثقہ ہیں ۔

ابوعشانہ بیان کرتے ہیں : انہوں نے سیدنا عقبہ بن عامر رضی اللہ عنہ کو سیاہ خضاب لگاتے ہوئے دیکھا ہے وہ یہ کہتے تھے ہم اس ( سر یعنی بالوں ) کے اوپر والے حصے کو سیاہ کر دیتے ہیں لیکن اس کی جڑیں نہیں مانتی ہیں ۔ رادی کہتے ہیں : وہ صاحب شاعر تھے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں صرف ابوعشانہ کا معاملہ مختلف ہے ، اور وہ ثقہ ہے ۔

سیدنا محمد بن علی رضی اللہ عنہ بیان کرتے ہیں : انہوں نے سیدنا امام حسن بن علی رضی اللہ عنہ کو دیکھا کہ انہوں نے ( عمامہ میں سے ) باہر آئے ہوئے ، بالوں پر سیاہ خضاب لگایا ہوا تھا ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں صرف محمد بن اسماعیل بن رجاء کا معاملہ مختلف ہے اور وہ ثقہ ہے ۔

سلیم بن ہذیل بیان کرتے ہیں : میں نے سیدنا جریر بن عبداللہ رضی اللہ عنہ کو اپنے سر اور داڑھی میں سیاہ خضاب لگائے ہوئے دیکھا ہے ۔
یہ روایت امام طبرانی نے نقل کی ہے ۔ سلیم نامی راوی اور اس سے روایت کرنے والا شخص ان دونوں سے میں واقف نہیں ہوں ۔

سیدنا محمد بن علی رضی اللہ عنہ بیان کرتے ہیں : سیدنا امام حسین بن علی رضی اللہ عنہ سیاہ خضاب لگاتے تھے ۔
یہ روایت امام طبرانی نے نقل کی ہے ۔ اس کے رجال اور اس سے پہلی والی روایت کے رجال اور ان دونوں کو دیگر طرق سے بھی نقل کیا گیا ہے ، اور یہ زیادہ مستند ہے ، اور ان دونوں کے رجال صحیح کے رجال ہیں ۔

سیدنا انس رضی اللہ عنہ بیان کرتے ہیں : سیدنا امام حسین رضی اللہ عنہ وسمہ کا خضاب لگاتے تھے ۔
یہ روایت امام طبرانی نے مختلف طرق کے ساتھ نقل کی ہے ۔ اور یہ ان میں سب سے زیادہ مستند ہے ، اور اس کے رجال صحیح کے رجال ہیں ۔

سفیان بن عیینہ بیان کرتے ہیں : میں نے عبداللہ بن ابویزید سے دریافت کیا : کیا آپ نے سیدنا امام حسین بن علی رضی اللہ عنہ کی زیارت کی ہے ؟ تو انہوں نے جواب دیا : جی ہاں ! میں نے انہیں زمزم کے کنویں کے پاس بیٹھے ہوئے دیکھا تھا سفیان کہتے ہیں : میں نے دریافت کیا : کیا آپ نے انہیں دیکھا تھا کہ انہوں نے خضاب لگایا ہوا تھا ؟ انہوں نے جواب دیا : جی نہیں میں نے دیکھا تھا کہ ان کے سر کے اور داڑھی کے بال سیاہ ہیں ، البتہ اتنا سا حصہ نہیں تھا یعنی نچلے ہونٹ سے نیچے والا حصہ ، وہاں کچھ سفید بال تھے ۔ یہ بات ذکر کی گئی ہے : کہ نبی اکرم صلی اللہ علیہ وسلم کے بھی اس حصے کے سفید بال تھے ، تو ( اس حوالے سے ) سیدنا امام حسین رضی اللہ عنہ نبی اکرم صلی اللہ علیہ وسلم کے ساتھ مشابہت رکھتے تھے ۔
یہ روایت امام طبرانی نے نقل کی ہے ۔ اور عبداللہ بن ابویزید نامی راوی اگر تو مازنی ہے ، تو پھر یہ ثقہ ہے ، اور اگر یہ اس کے علاوہ کوئی اور ہے ، تو میں اس سے واقف نہیں ہوں اس روایت کے بقیہ رجال صحیح کے رجال ہیں صرف عبداللہ بن أحمد کا معاملہ مختلف ہے ، اور وہ ثقہ اور مامون ہے ۔

عبدالرحمن بن بزرج بیان کرتے ہیں : میں نے سیدنا امام حسن رضی اللہ عنہ اور سیدنا امام حسین رضی اللہ عنہ کو دیکھا ہے ، جو دونوں سیدہ فاطمہ رضی اللہ عنہا کے صاحبزادے ہیں وہ دونوں سیاہ خضاب لگاتے تھے البتہ امام حسین رضی اللہ عنہ نچلے ہونٹ سے نیچے والے حصے کو چھوڑ دیتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہعیہ ہے اس کی سند میں ضعف پایا جاتا ہے ، اور اس روایت کے بقیہ رجال ثقہ ہیں ۔

عبداللہ بن ابوزہیر بیان کرتے ہیں : میں نے سیدنا امام حسین بن علی رضی اللہ عنہ کو وسمہ کا خضاب لگاتے ہوئے دیکھا ہے ۔
یہ روایت امام طبرانی نے نقل کی ہے ۔ اور عبداللہ بن ابوزہیر نامی راوی سے میں واقف نہیں ہوں اس روایت کے بقیہ رجال ثقہ ہیں ۔