مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں ۔ نبی اکرم صلی اللہ علیہ وسلم نے ارشاد فرمایا : ” بالوں کا اکرام کرو ! “ ۔
یہ روایت امام بزار نے نقل کی ہے ۔ اس کی سند میں ایک راوی خالد بن الیاس ہے ، اور وہ متروک ہے ۔

سیدنا ابوقتادہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جس شخص نے بال رکھے ہوں وہ ان کے ساتھ اچھا سلوک کرے ورنہ انہیں مونڈوا دے “ راوی بیان کرتے ہیں : سیدنا ابوقتادہ رضی اللہ عنہ ایک دن کے وقفے کے ساتھ بال سنوارا کرتے تھے ۔
یہ روایت امام طبرانی نے معجم اوسط میں اپنے استاد علی بن سعید رازی سے نقل کی ہے ۔ امام دارقطنی رحمہ اللہ کہتے ہیں : یہ قوی نہیں ہے اس روایت کے بقیہ رجال صحیح کے رجال ہیں ۔

سیدنا جابر رضی اللہ عنہ بیان کرتے ہیں : سیدنا ابوقتادہ رضی اللہ عنہ کے بال لمبے تھے نبی اکرم صلی اللہ علیہ وسلم سے انہوں نے دریافت کیا : تو آپ نے فرمایا : تم ان کا اکرام کرو اور انہیں تیل لگاؤ ۔
یہ روایت امام طبرانی نے معجم اوسط میں اسماعیل بن عیاش کی اہل حجاز سے نقل کردہ روایت کے طور پر نقل کی ہے ۔ اور
یہ روایت ضعیف ہے اس روایت کے بقیہ رجال ثقہ ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کو دیکھا جس کے بال بکھرے ہوئے تھے آپ نے ارشاد فرمایا تم میں سے کوئی ایک شخص اپنے آپ کو کیوں قبیح کرتا ہے ؟ نبی اکرم صلی اللہ علیہ وسلم نے اپنے دست مبارک کے ذریعے اسے اشارہ کیا کہ تم انہیں کاٹ لو ۔
یہ روایت امام طبرانی نے معجم اوسط میں اپنے استاد موسیٰ بن زکریا بن تستری کے حوالے سے نقل کی ہے ۔ اور وہ ضعیف ہے ۔

سیدنا انس رضی اللہ عنہ بیان کرتے ہیں : پہلے نبی اکرم صلی اللہ علیہ وسلم بال سیدھے پیچھے کی طرف لے جایا کرتے تھے ( یعنی مانگ نہیں نکالتے تھے ) جتنا عرصہ اللہ کو منظور تھا آپ ایسا کرتے رہے پھر آپ نے بعد میں مانگ نکالنا شروع کر دی ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” مومن کی سعات مندی میں یہ بات شامل ہے کہ اس کی داڑھی ہلکی ہو “ ۔
یہ روایت امام طبرانی نے نقل کی ہے ۔ اس کی سند میں ایک راوی یوسف بن غرق ہے ازدی کہتے ہیں : یہ کذاب ہے ۔

سیدہ صفیہ بنت مجزاۃ رضی اللہ عنہا بیان کرتی ہیں : سیدنا ابومحذورہ رضی اللہ عنہ کے سر کے آگے کی طرف اتنے لمبے بال تھے جب وہ بیٹھتے تھے ، اور انہیں کھولتے تھے ، تو وہ زمین تک پہنچ جاتے تھے لوگ انہیں کہتے آپ انہیں کٹواتے کیوں نہیں ہیں ؟ انہوں نے فرمایا : نبی اکرم صلی اللہ علیہ وسلم نے اپنا دست مبارک ان پر پھیرا تھا تو میں مرتے دم تک انہیں نہیں مونڈواؤں گا ، تو انہوں نے مرتے دم تک انہیں نہیں مونڈوایا ۔ پہ روایت امام طبرانی نے نقل کی ہے ۔ اس کی سند میں ایک راوی ایوب بن ثابت مکی ہے ۔ ابوحاتم کہتے ہیں : اس کی حدیث کی تعریف نہیں کی گئی ۔

سیدنا سالم رضی اللہ عنہ بیان کرتے ہیں : وہ ایک وفد کے ساتھ نبی اکرم صلی اللہ علیہ وسلم کی خدمت میں حاضر ہوئے وہ ایک کمسن لڑکے تھے نبی اکرم صلی اللہ علیہ وسلم نے انہیں برکت کی دعا دی اور اُن کے لیے دعا کی ، نبی اکرم صلی اللہ علیہ وسلم کے وضو کے بچے ہوئے پانی سے انہوں نے وضو کیا ، ان دنوں اُن کے بال لمبے تھے اور وہ بالغ ہو چکے تھے یا بالغ ہونے کے قریب تھے ۔
یہ روایت امام طبرانی نے نقل کی ہے ۔ اس میں راویوں کی ایک جماعت ایسی ہے جن سے میں واقف نہیں ہوں ۔

ہبیرہ بن یریم بیان کرتے ہیں : سیدنا عبداللہ بن مسعود رضی اللہ عنہ اپنا سر دھوتے تھے اور پھر اپنے بال کان کے پیچھے چھوڑ دیتے تھے ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

ابومعمر بیان کرتے ہیں : سیدنا عبداللہ بن مسعود رضی اللہ عنہ کی گندھے ہوئے بالوں کی دو چوٹیاں ہوتی تھیں ، ان کا حلیہ زمانہ جاہلیت ( کے سادہ افراد ) کی طرح کا تھا ، اور ان کی پنڈلیاں کمزور تھیں ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن ابوذباب ہے میں اس سے واقف نہیں ہوں اس راویت کے بقیہ رجال ثقہ ہیں ۔

عبدالرحمن نامی راوی بیان کرتے ہیں : انہوں نے سیدنا امام حسن بن علی رضی اللہ عنہما کو دیکھا کہ ان کے بال کندھوں تک نہیں آتے تے ۔
یہ روایت امام طبرانی نے نقل کی ہے ۔ اس کی سند میں ایک راوی محتسب ابوعائذ ہے ، اور وہ کمزور ہے ، اور اس کا استاد شجاع ہے ، اور اس سے میں واقف نہیں ہوں اس روایت کے بقیہ رجال ثقہ ہیں ۔

حسن بن زید اپنے والد کا یہ بیان نقل کرتے ہیں : میں نے سیدنا حسن رضی اللہ عنہ کے سر میں کچھ لمبے بال دیکھے میں نے سیدنا حسن رضی اللہ عنہ کو دیکھا کہ وہ انہیں سمیٹ لیتے تھے ۔
یہ روایت امام طبرانی نے نقل کی ہے ۔ اس کی سند میں ایک ابن اسحاق ہے وہ ثقہ ہے ، لیکن وہ مدلس ہے اس راویت کے بقیہ رجال ثقہ ہیں ۔

عبید بن زیادہ بکری بیان کرتے ہیں : میں سیدنا بشر مازنی رضی اللہ عنہ کے دو صاحبزادوں کے پاس گیا میں نے دریافت کیا : کیا آپ دونوں نے نبی اکرم صلی اللہ علیہ وسلم کی زیارت کی ہے ۔ انہوں نے جواب دیا : جی ہاں نبی اکرم صلی اللہ علیہ وسلم ہماری رہائشی جگہ پر ہمارے پاس تشریف لائے تھے ہم نے کھانا آپ کی خدمت میں پیش کیا تھا تو آپ نے ہمارے کھانے میں سے کچھ کھایا تھا آپ نے ہم میں سے ایک کی پیشانی پر کچھ بال لپٹے ہوئے دیکھے ، تو اپنا دست مبارک اس پر رکھ دیا اور فرمایا : ” ہر طرح کی حمد اس اللہ کے لئے مخصوص ہے جس نے میری امت میں اس کی مانند بنائے ہیں “ ۔
یہ روایت امام طبرانی نے اپنے استاد طالب بن قرہ اذنی سے نقل کی ہے ۔ اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا بشر رضی اللہ عنہ کے دونوں صاحبزادے بیان کرتے ہیں : نبی اکرم صلی اللہ علیہ وسلم ہمارے پاس تشریف لائے ہم نے آپ کے لئے چٹائی بچھائی ہم نے اسے پھیلا دیا آپ تشریف فرما ہوئے آپ پر ہمارے گھر میں وحی بھی نازل ہوئی ہم نے آپ کے سامنے پنیر اور کھجوریں پیش کیں آپ پنیر کو پسند کرتے تھے ، ان لوگوں میں سے ایک شخص کے سر میں کچھ بالوں کی چوٹی تھے ، وہ اکٹھے تھے ، یوں جیسے سینگ ہوں ، تو نبی اکرم صلی اللہ علیہ وسلم نے فرمایا : کیا میں اپنی امت میں سینگ نہیں دیکھ رہا ہوں ۔ اس کے بعد راوی نے پوری حدیث ذکر کی ہے ، اور
یہ روایت امام ابوداؤد نے بھی نقل کی ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔