مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : سیدنا سلمان فارسی رضی اللہ عنہ ( طویل عرصہ ) غیر موجود رہنے کے بعد تشریف لائے ان کی ملاقات سیدنا عمر رضی اللہ عنہ سے ہوئی ، تو انہوں نے کہا: اللہ تعالیٰ آپ کو راضی کرے راوی بیان کرتے ہیں : انہوں نے کندہ میں شادی کر لی تھی جب وہ رات آئی جس میں ان کی بیوی کی رخصتی ہوئی ، تو گھر بھرا ہوا تھا اس میں خواتین موجود تھیں انہوں نے دریافت کیا : کعبہ منتقل ہو کے کندہ میں آ گیا ہے یا پھر میری یہ عورت سرخ فام ہے میرے خلیل سیدنا ، ابوالقاسم صلی اللہ علیہ وسلم نے مجھے یہ حکم دیا تھا کہ ہم ساز و سامان میں سے صرف اتنا اثاثہ رکھیں جتنا مسافر کا سامان ہوتا ہے ، اور خواتین میں سے صرف اتنی خواتین رکھیں جن کے ساتھ ہم نکاح کرتے ہیں ، تو خواتین گھر سے باہر چلی گئیں وہ اپنی اہلیہ کے پاس تشریف لائے ، اور بولے : اے خاتون ! کیا تم میری اطاعت کرو گی یا میری نافرمانی کرو گی اس نے جواب دیا : آپ جیسے چاہیں گے میں آپ کی اطاعت کروں گی سیدنا سلمان فارسی رضی اللہ عنہ نے بتایا مجھے میرے خلیل نے یہ حکم دیا تھا کہ جب ہم میں سے کوئی ایک شخص اپنی بیوی کے پاس جائے ، تو کھڑا ہو کر نماز ادا کرے اور عورت کو یہ ہدایت کرے کہ وہ اس کے پیچھے کھڑی ہو کر نماز ادا کرے وہ شخص دعا کرے اور عورت آمین کہے ۔ راوی کہتے ہیں : تو سیدنا سلمان فارسی رضی اللہ عنہ نے بھی ایسا ہی کیا اور ان کی اہلیہ نے بھی ایسا ہی کیا اگلے دن جب وہ کندہ میں لوگوں کی محفل میں بیٹھے ہوئے تھے ، تو ایک شخص نے ان سے پوچھا: اے ابوعبداللہ ! آپ کا کیا حال ہے آپ نے اپنی بیوی کو کیسا پایا ؟ تو وہ خاموش رہے اس شخص نے دوبارہ پوچھا: تو سیدنا سلمان رضی اللہ عنہ نے اس سے فرمایا تم میں سے کسی ایک شخص کا کیا معاملہ ہے کہ وہ ایک ایسی چیز کے بارے میں دریافت کرتا ہے ، جسے دیواروں اور دروازوں نے چھپایا ہوا تھا تم میں سے کسی ایک کے لئے یہ کافی ہے کہ اگر وہ کسی چیز کے بارے میں دریافت کرتا ہے ، تو اگر اسے جواب دیدیا جاتا ہے ، تو ٹھیک ہے اگر جواب نہیں دیا جاتا ( تو وہ بھی ٹھیک ہے )
یہ روایت امام طبرانی نے اسی طرح نقل کی ہے ۔

یہ روایت امام بزار نے نقل کی ہے ۔ وہ فرماتے ہیں : سیدنا سلمان فارسی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم میں سے کوئی ایک شخص شادی کر لے ، تو رخصتی کی رات اسے دو رکعت ادا کرنی چاہیں اور اپنی بیوی کو بھی یہ ہدایت کرنی چاہیے کہ وہ بھی اس کے پیچھے نماز ادا کرے ، تو اس طرح اللہ تعالیٰ اس کے گھر میں بھلائی رکھ دے گا “ ۔ ان دونوں روایات کی سند میں ایک راوی حجاج بن فروخ ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب عورت رخصت ہو کر شوہر کے پاس آتی ہے ، تو آدمی کھڑا ہو اور عورت اس کے پیچھے کھڑی ہو اور وہ دونوں دو رکعت ادا کریں اور پھر یہ دعا کریں : ” اے اللہ ! میرے اہل خانہ میں میرے لئے برکت رکھ دے اور میرے اہل خانہ کے لئے مجھ میں برکت رکھ دے اے اللہ ! انہیں مجھ سے رزق عطا فرما اور مجھے ان سے رزق عطا فرما : اے اللہ ! تو ہمارے درمیان ہر قسم کی بھلائی رکھنا اور جب ، تو ہمیں ایک دوسرے سے الگ کرے ، تو بھلائی کی طرف الگ کرنا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اسماعیل بن ابراہیم بن مغیرہ مروزی ہے میں نے کسی کو اس کا ذکر کرتے ہوئے نہیں پایا ہے ، اور ایک راوی عطاء بن سائب ہے جو اختلاط کا شکار ہو گیا تھا اس روایت کے بقیہ رجال ثقہ ہیں ۔

ابووائل بیان کرتے ہیں : بجیلہ سے تعلق رکھنے والا ایک شخص سیدنا عبداللہ بن مسعود رضی اللہ عنہ کے پاس آیا اور بولا: میں نے ایک کنواری لڑکی کے ساتھ شادی کر لی ہے مجھے اس بات کا اندیشہ ہے کہ وہ مجھ سے جدا ہو جائے گی سیدنا عبداللہ رضی اللہ عنہ نے فرمایا : خبردار الفت اللہ تعالیٰ کی طرف سے ہوتی ہے ، اور علیحدگی شیطان کی طرف سے ہوتی ہے ، تاکہ وہ اس چیز کو انسان کے نزدیک پسندیدہ کروا دے جو چیز اللہ تعالیٰ نے حلال قرار دی ہے ، جب تم اس عورت کی رخصتی کروا لو ، تو تم اسے یہ ہدایت کرنا کہ وہ تمہارے پیچھے نماز ادا کرے ۔ اعمش بیان کرتے ہیں : میں نے اس بات کا تذکرہ ابراہیم سے کیا تو انہوں نے فرمایا : سیدنا عبداللہ رضی اللہ عنہ نے فرمایا تھا : تم یہ دعا کرنا ” اے اللہ ! تو میرے لئے میرے اہل خانہ میں برکت رکھ دے اور ان کے لئے مجھ میں برکت رکھ دے ۔ اے اللہ ! تو ان کو مجھ سے رزق عطا فرما اور مجھے ان سے رزق عطا فرما ۔ اے اللہ ! جب تک ، تو ہمیں اکٹھا رکھے گا بھلائی کی طرف اکٹھا رکھنا اور جب ، تو ہمارے درمیان علیحدگی کروائے گا ، تو بھلائی کی طرف علیحدگی کروانا “ ۔
یہ روایت امام طبرانی نے نقل کی ہے ۔ اور اس کے جال صحیح کے رجال ہیں ۔