مجمع الزوائد ومنبع الفوائد

سیدنا معاویہ رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے یہ حکم دیا تھا کہ میں مہینے کی ابتدائی تاریخوں میں اپنی بیوی کے ساتھ صحبت نہ کروں ، اور میں پیتل کے برتن سے وضو نہ کروں ، اور جب بھی میں نیند سے بیدار ہوؤں ، تو میں مسواک کر لوں ۔
یہ روایت امام طبرانی نے نقل کی ہے ۔ اس کی سند میں ایک راوی عبیدہ بن حسان ہے ، اور وہ منکر الحدیث ہے ۔

سیدنا ابوکبشہ انماری رضی اللہ عنہ بیان کرتے ہیں : نبی اکرم صلی اللہ علیہ وسلم اپنے اصحاب کے درمیان تشریف لائے پھر تشریف لے گئے آپ نے غسل کیا انہوں نے عرض کی : یا رسول اللہ ! کیا کوئی معاملہ در پیش ہوا تھا ۔ نبی اکرم صلی اللہ علیہ وسلم نے ارشاد فرمایا : جی ہاں میرے پاس سے ایک عورت گزری ، تو میرے دل میں بیوی کے لئے خواہش پیدا ہوئی ، تو میں اپنی بیوی کے پاس گیا اور میں نے اس کے ساتھ قربت کر لی تمہارے اعمال میں مثالی بچاؤ کا طریقہ یہی ہے کہ آدمی حلال طریقے سے ( خواہش پوری کر لے ) ۔
یہ روایت امام أحمد نے نقل کی ہے ۔ اور امام طبرانی نے نقل کی ہے ۔ انہوں نے یہ الفاظ نقل کیے ہیں : ” تو تم لوگ اسی طرح کر لو “ امام أحمد کے رجال ثقہ ہیں ۔

سیدنا انس رضی اللہ عنہ بیان کرتے ہیں : مدینہ منورہ میں ایک عورت تھی ، جو عطر فروش تھی ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے نبی اکرم صلی اللہ علیہ وسلم کے حوالے سے پوری حدیث ذکر کی ہے جو آدمی کے اپنی بیوی کے ساتھ صحبت کرنے کی فضیلت سے متعلق باب میں آئے گی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی جریر بن ایوب بجلی ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کے اصحاب میں سے ایک شخص سے آپ نے دریافت کیا : کیا تم نے آج کسی بیمار کی عیادت کی ہے ۔ انہوں نے جواب دیا : جی نہیں ۔ نبی اکرم صلی اللہ علیہ وسلم نے دریافت کیا : کیا تم نے کوئی چیز صدقہ کی ہے اس نے جواب دیا : جی نہیں ۔ نبی اکرم صلی اللہ علیہ وسلم نے دریافت کیا : کیا تم نے نماز جنازہ پڑھی ہے اس نے عرض کی : جی نہیں ۔ نبی اکرم صلی اللہ علیہ وسلم نے دریافت کیا : کیا تم نے اپنی بیوی کے ساتھ صحبت کی ہے اس نے عرض کی : جی نہیں ۔ نبی اکرم صلی اللہ علیہ وسلم نے فرمایا : تم نے یہ کر لینا تھا یہ تمہاری طرف سے اس پر صدقہ ہونا تھا ۔ راوی کہتے ہیں : یہ جمعہ کے دن کی بات ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی نصر بن عاصم بن ہلال بارقی ہے میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” کیا تم میں سے کوئی ایک شخص اس بات سے عاجز آ جاتا ہے کہ جب وہ اپنی بیوی کے پاس جائے ، تو یہ پڑھ لے : ” اللہ تعالیٰ کے نام سے برکت حاصل کرتے ہوئے اے اللہ ! تو مجھے ، اور جو رزق ( یعنی اولاد ) تو مجھے عطا کرے گا اسے مردود شیطان سے الگ رکھنا“ ۔ ( نبی اکرم صلی اللہ علیہ وسلم فرماتے ہیں : ) اگر ان دنوں میاں بیوی کے نصیب میں اولاد ہوئی ، تو شیطان اسے کبھی نقصان نہیں پہنچا سکے گا ۔
یہ روایت امام طبرانی نے نقل کی ہے ۔ اس کی سند میں ایک راوی علی بن یزید الہانی ہے ، اور وہ ضعیف ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم کو کفیت عطا کیا گیا تھا ۔ رادی کہتے ہیں : میں نے حسن سے دریافت کیا : کفیت سے مراد کیا ہے ؟ انہوں نے فرمایا : ٹکڑا ۔ ابن اثیر کہتے ہیں : کفات کا مطلب صحبت کرنا ہے ۔ اس روایت کے رجال صحیح کے رجال ہیں صرف عبدالسلام بن عاصم رازی کا معاملہ مختلف ہے ، اور وہ ثقہ ہے ۔

سیدنا عبداللہ بن عمر رضی اللہ عنہما فرماتے ہیں : مجھے اس حوالے سے جتنی صلاحیت عطا کی گئی ہے میرے علم کے مطابق کسی کو اتنی عطا نہیں کی گئی البتہ اللہ کے رسول کا معاملہ مختلف ہے ( راوی کہتے ہیں : ) سیدنا عبداللہ بن عمر رضی اللہ عنہما کی مراد صحبت کرنے کی صلاحیت تھی ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اور اس کے رجال ثقہ ہیں ۔

سیدنا عبدالله بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” گرفت اور نکاح کے حوالے سے مجھے چالیس آدمیوں جتنی قوت عطا کی گئی ہے ، اور ہر مومن کو دس افراد جتنی قوت دی جاتی ہے ، اور شہوت کے دس اجزا کیے گئے ہیں ، جن میں سے نو اجزاء خواتین میں ہوتے ہیں اور ایک جزء مردوں میں ہے ، اگر خواتین پر حیاء نہ ڈالی گئی ہوتی ، جو ان کی خواہش کے ساتھ ہوتی ہے ، تو ہر آدمی کے ساتھ نو ، بیویاں ہونی تھیں ، جن میں نکاح ( یعنی ازدواجی تعلق قائم رکھنے کی ) شدید خواہش ہوتی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مغیرہ بن قیس ہے ، اور وہ ضعیف ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عورت کی لذت اور مرد کی لذت کے درمیان اتنا فرق ہے جس طرح مٹی میں سوئی کا نشان ہوتا ہے ، البتہ اللہ تعالیٰ نے عورتوں پر حیاء کے ذریعے پردہ ڈال دیا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی أحمد بن علی بن شوذب ہے میں نے کسی کو اس کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم میں سے کوئی ایک شخص اپنی بیوی کے پاس جائے ، تو اسے پردہ کر لینا چاہیے اگر وہ پردہ نہیں کرے گا ، تو فرشتے اس سے حیا کرتے ہوئے باہر چلے جائیں گے ، اور اگر ان دونوں کے ہاں اولاد ہو گی ، تو شیطان کا اس میں سے حصہ ہو گا “ ۔
یہ روایت امام بزار نے اور امام طبرانی نے معجم اوسط میں نقل کی ہے ، امام بزار کی سند کو انہوں نے ضعیف قرار دیا ہے ، امام طبرانی کی سند میں ایک راوی ابومنیب ہے ، جو یحیی بن ابوکثیر کا شاگرد ہے ، میں نے کسی کو اس کے حالات بیان کرتے ہوئے نہیں پایا ہے ، امام طبرانی کے رجال ثقہ ہیں ، اس کے بعض راویوں کے بارے میں ایسا کلام کیا گیا ہے ، جو نقصان دہ نہیں ہے ۔

سیدنا عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم میں سے کوئی ایک شخص اپنی بیوی کے پاس آئے ، تو اسے پردہ کر لینا چاہیے ، اور اسے مکمل طور پر برہنہ نہیں ہونا چاہیے “ ۔
یہ روایت امام بزار نے اور امام طبرانی نے نقل کی ہے ۔ اس کی سند میں ایک راوی مندل بن علی ہے ، اور وہ ضعیف ہے ویسے اس کی توثیق کی گئی ہے ۔ امام بزار کہتے ہیں : مندل نے اس روایت کو ” مرفوع “ حدیث کے طور پر نقل کرنے میں غلطی کی ہے ، درست یہ ہے کہ
یہ روایت ” مرسل “ ہے ، اس روایت کے بقیہ رجال صحیح کے رجال ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم میں سے کوئی ایک شخص اپنی بیوی کے پاس آئے ، تو اسے اپنے اوپر ، اور اپنی بیوی پر پردہ کر لینا چاہیے ، اور گدھوں کی طرح مکمل برہنہ نہیں ہونا چاہیے “ ۔
یہ روایت امام طبرانی نے نقل کی ہے ۔ اس کی سند میں ایک راوی عفیر بن معدان ہے ، اور وہ ضعیف ہے ۔

سیدنا ابوامامہ رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم تشریف فرما تھے ، آپ کے پاس ایک خاتون موجود تھی ، نبی اکرم صلی اللہ علیہ وسلم نے اس خاتون سے کہا: تم خواتین کے بارے میں میرا یہ خیال ہے کہ تم ایک دوسرے کو یہ بات بتا دیتی ہو کہ تمہارے شوہروں نے تمہارے ساتھ کیا کیا ہے ؟ اس خاتون نے عرض کی : جی ہاں ! اللہ کی قسم ! میرے ماں باپ آپ پر قربان ہوں ، یا رسول اللہ ! ہم ( خواتین ) ایسا کرتی ہیں ۔ نبی اکرم صلی اللہ علیہ وسلم نے فرمایا : تم ایسا نہ کیا کرو ! کیونکہ اللہ تعالیٰ ایسا کرنے والے پر ناراض ہوتا ہے ۔ نبی اکرم صلی اللہ علیہ وسلم نے فرمایا : میرا خیال ہے تم خواتین میں سے کسی ایک کا شوہر جب اس کے پاس آتا ہے ، تو وہ اوپر سے لحاف ہٹا دیتے ہیں تاکہ ایک دوسرے کی شرمگاہ کو دیکھ لیں ، یوں جیسے وہ دونوں گدھے ہوں ، اس خاتون نے عرض کی : جی ہاں میرے ماں باپ آپ پر قربان ہوں ! ہم ایسا کرتے ہیں ۔ نبی اکرم صلی اللہ علیہ وسلم نے فرمایا : تم ایسا نہ کرو ! کیونکہ اللہ تعالیٰ اس بات پر ناراض ہوتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی علی بن یزید ہے ، اور وہ ضعیف ہے ۔

سیدنا سعد بن مسعود لیثی رضی اللہ عنہ بیان کرتے ہیں : سیدنا عثمان بن مظعون رضی اللہ عنہ نبی اکرم صلی اللہ علیہ وسلم کے پاس آئے ، اور عرض کی : یا رسول اللہ ! مجھے اس بات سے حیاء آتی ہے کہ میری بیوی میری شرمگاہ دیکھ لے نبی اکرم صلی اللہ علیہ وسلم نے دریافت کیا : وہ کیوں ؟ اللہ تعالیٰ نے تمہیں اس کا لباس بنایا ہے ، اور اسے تمہارا لباس بنایا ہے ۔ انہوں نے عرض کی : لیکن مجھے یہ بات پسند نہیں ہے ۔ نبی اکرم صلی اللہ علیہ وسلم نے فرمایا : لیکن میری بیویاں میری شرمگاہ کو دیکھ لیتی ہیں اور میں ان کی شرمگاہ کو دیکھ لیتا ہوں ان صاحب نے کہا: آپ اللہ کے رسول ہیں ۔ نبی اکرم صلی اللہ علیہ وسلم نے فرمایا : میں ہوں ۔ انہوں نے کہا: آپ کے بعد کیا ہو سکتا ہے ؟ راوی کہتے ہیں : جب سیدنا عثمان رضی اللہ عنہ چلے گئے ، تو نبی اکرم صلی اللہ علیہ وسلم نے فرمایا : ابن مظعون شرمیلا اور پردے والا شخص ہے ۔
یہ روایت امام طبرانی نے نقل کی ہے ۔ اس کی سند میں ایک راوی یحیی بن العلاء ہے ، اور وہ متروک ہے ۔