مجمع الزوائد ومنبع الفوائد

سیدنا عبداللہ بن صخر بن لوذان رضی اللہ عنہ ، جوان افراد میں سے ایک ہیں ، جنہیں نبی اکرم صلی اللہ علیہ وسلم نے عمال کے ہمراہ یمن بھیجا تھا ، وہ بیان کرتے ہیں : جب نبی اکرم صلی اللہ علیہ وسلم نے سیدنا معاذ رضی اللہ عنہ کو معلم بنا کے یمن کی طرف بھیجا تو آپ نے ان سے فرمایا : دین کے بارے میں تمہاری آزمائش سے میں واقف ہوں ، اور میں تمہارے تحفے کو پاکیزہ قرار دیتا ہوں ، اگر تمہیں کوئی چیز تحفے کے طور پر دی جائے ، تو تم قبول کر لینا ۔ جب سیدنا معاذ رضی اللہ عنہ واپس آئے تو ان کے پاس تیس جانور تھے ( یا غلام تھے ) جو انہیں تحفے کے طور پر دیے گئے تھے ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی سیف بن عمر تمیمی ہے اور وہ ضعیف ہے ، اس سے پہلے اس روایت کے مختلف طرق گزر چکے ہیں ، مفلس ہونے کی حالت میں تصرف سے روکنے سے متعلق اس کی سند جید ہے ۔

سیدنا ابوحمید ساعدی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” امراء کو دیے جانے والے تحائف ، خیانت ہوتے ہیں “ ۔
یہ روایت امام طبرانی نے معجم اوسط میں نقل کی ہے ، اور امام أحمد نے اسماعیل بن عیاش کے حوالے سے اہل حجاز سے نقل کی ہے اور
یہ روایت ضعیف ہے ۔

سیدنا جابر بن عبداللہ رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” امراء کو دیے جانے والے تحائف ، خیانت ہوتے ہیں “ ۔
یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

سیدنا عبداللہ بن عباس ہی نبی اکرم صلی اللہ علیہ وسلم کا یہ فرمان نقل کرتے ہیں : حکمران کو دیا جانے والا تحفہ خیانت ہوتا ہے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی ثمان بن سعید ہے اور وہ ضعیف ہے ۔

سیدنا ابوہریرہ رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” امراء کو دیے جانے والے تحائف ، خیانت ہوتے ہیں “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی حمید بن معاویہ باہلی ہے اور وہ ضعیف ہے ۔

سیدنا عصمہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تحفہ ، سماعت اور بصارت کو رخصت کر دیتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی فضل بن مختار ہے اور وہ انتہائی ضعیف ہے ۔ اس موضوع سے متعلق دیگر احادیث اپنے مخصوص مقامات پر آئیں گی ۔