مجمع الزوائد ومنبع الفوائد

عراک بن مالک بیان کرتے ہیں : سیدنا حکیم بن حزام رضی اللہ عنہ بیان کرتے ہیں : پہلے زمانہ جاہلیت میں سیدنا محمد صلی اللہ علیہ وسلم میرے نزدیک سب سے زیادہ محبوب تھے ، جب آپ نے نبوت کا اعلان کیا اور آپ مدینہ منورہ تشریف لے گئے ، تو حج کے موقع پر سیدنا حکیم بن حزام رضی اللہ عنہ آئے وہ اس وقت کافر تھے ، انہوں نے ذی یزن کا صلہ فروخت ہوتے ہوئے دیکھا ، تو اسے پچاس دینار کے عوض میں خرید لیا تاکہ وہ اسے نبی اکرم صلی اللہ علیہ وسلم کو تحفے کے طور پر دے دیں ، پھر وہ اسے ساتھ لے کر مدینہ منورہ آئے ، ان کی یہ خواہش تھی کہ نبی اکرم صلی اللہ علیہ وسلم تحفے کے طور پر اسے قبول کر لیں ، لیکن نبی اکرم صلی اللہ علیہ وسلم نے اسے قبول نہیں کیا ۔ عبیداللہ نامی راوی کہتے ہیں : میرا خیال ہے روایت میں یہ الفاظ بھی ہیں : نبی اکرم صلی اللہ علیہ وسلم نے فرمایا : ہم مشرکین سے کوئی چیز قبول نہیں کرتے ہیں ، البتہ اگر تم چاہو ، تو ہم قیمت کے عوض میں حاصل کر لیتے ہیں ، تو جب نبی اکرم صلی اللہ علیہ وسلم نے میرا تحفہ قبول کرنے سے انکار کر دیا ، تو وہ میں نے آپ کو دے دیا ( یعنی قیمت کے عوض میں دے دیا ) ۔
یہ روایت امام أحمد نے اور امام طبرانی نے معجم کبیر میں نقل کی ہے ، انہوں نے یہ الفاظ زائد نقل کیے ہیں : نبی اکرم صلی اللہ علیہ وسلم نے اسے پہنا ، میں نے آپ کو دیکھا کہ آپ اسے پہن کر منبر پر تشریف فرما ہوئے ، اس دن اس جبہ میں آپ سے زیادہ خوبصورت کوئی چیز میں نے نہیں دیکھی ، پھر نبی اکرم صلی اللہ علیہ وسلم نے وہ سیدنا اسامہ بن زید رضی اللہ عنہ کو دے دیا ، جب سیدنا حکیم بن حزام رضی اللہ عنہ نے اُسے سیدنا اسامہ بن زید رضی اللہ عنہ کو پہنے ہوئے دیکھا ، تو بولے : اے اسامہ : کیا تم ذی یزن کا حلہ پہنے ہوئے ہو ؟ انہوں نے فرمایا : جی ہاں ! میں ذی یزن سے بہتر ہوں ، اور میرے والد اس کے والد سے زیادہ بہتر ہیں ، سیدنا حکیم رضی اللہ عنہ بیان کرتے ہیں : پھر میں اہل مکہ کی طرف چلا گیا اور سیدنا اسامہ رضی اللہ عنہ کے قول کے حوالے سے انہیں بتایا ، تو وہ بڑے حیران ہوئے ۔ اس روایت کی سند عمدہ ہے اور اس کے رجال ثقہ ہیں ، اس کی ایک اور سند بھی ہے ، جو علامات نبوت کے باب میں زیادہ احسن طریقے سے آئے گی ، اور یہاں سے زیادہ واضح ہو گی ، جو نبی اکرم صلی اللہ علیہ وسلم کی صفات کے بارے میں ہے ۔

سیدنا عمران بن حصین رضی اللہ عنہ بیان کرتے ہیں : سیدنا عیاض بن حمار مجاشعی ثم نہشلی رضی اللہ عنہ نے نبی اکرم صلی اللہ علیہ وسلم کو ایک گھوڑا تحفے کے طور پر پیش کیا ، یہ ان کے اسلام قبول کرنے سے پہلے کی بات ہے ، تو نبی اکرم صلی اللہ علیہ وسلم نے ارشاد فرمایا : میں مشرکین کے تحفے کو ناپسند کرتا ہوں ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی صلت بن عبدالرحمن زبیدی ہے اور وہ ضعیف ہے ۔

عامر بن مالک ، جنہیں ” ملاعب الاسنہ “ کہا: جاتا ہے ، وہ بیان کرتے ہیں : میں تحفہ لے کر نبی اکرم صلی اللہ علیہ وسلم کی خدمت میں حاضر ہوا ، تو آپ نے ارشاد فرمایا : ہم کسی مشرک کا تحفہ قبول نہیں کرتے ہیں ۔
یہ روایت امام بزار نے نقل کی ہے اور اس کے رجال صحیح کے رجال ہیں ، صرف امام بزار کے استاد ابراہیم بن عبداللہ بن جنید کا معاملہ مختلف ہے وہ ثقہ ہے ، انہوں نے
یہ روایت عبدالرحمن بن کعب کے حوالے سے نقل کی ہے کہ عامر بن مالک کے ساتھ یہ واقعہ پیش آیا ، پہلی روایت کی سند میں یہ بات مذکور ہے کہ یہ عبدالرحمن بن کعب کے حوالے سے عامر بن مالک سے منقول ہے ، وہ کہتے ہیں : عبداللہ بن مبارک نے اسے موصول روایت کے طور پر اور امام عبدالرزاق نے اسے ” مرسل “ روایت کے طور پر نقل کیا ہے ۔

سیدنا عبداللہ بن زبیر رضی اللہ عنہما بیان کرتے ہیں : قتیلہ بنت عبدالعزیٰ بن اسعد بن مالک بن حسل ، اپنی صاحبزادی سیدہ اسماء بنت ابوبکر کے پاس تحائف لے کے آئیں ، جن میں گوہ ، ترمس ( اناج کی ایک قسم جو کڑوا ہوتا ہے ) اور گھی شامل تھا ، سیدہ اسماء رضی اللہ عنہا نے ان کا تحفہ قبول کرنے سے ، اور انہیں اپنے گھر میں داخل کرنے سے انکار کر دیا ، سیدہ عائشہ رضی اللہ عنہا نے اس بارے میں نبی اکرم صلی اللہ علیہ وسلم سے دریافت کیا ، تو اللہ تعالیٰ نے یہ آیت نازل کی : ” اللہ تعالی تمہیں ان لوگوں سے نہیں روکتا ہے ، جو تمہارے ساتھ دین کے بارے میں جنگ نہیں کرتے ہیں ۔ ۔ ۔ ۔ ۔ ۔ ۔ ۔ ۔ ۔ “ یہ آیت کے آخر تک ہے ۔ تو نبی اکرم صلی اللہ علیہ وسلم نے انہیں یہ ہدایت کی کہ وہ اس خاتون کا ہدیہ قبول کر لیں اور اسے اپنے گھر میں آنے دیں ۔
یہ روایت امام أحمد نے اور امام طبرانی نے معجم کبیر میں نقل کی ہے ، انہوں نے اسے عمدہ قرار دیا ہے ۔ انہوں نے یہ الفاظ نقل کیے ہیں : قتیلہ بنت عبدالعزیٰ آ گئیں ۔ ۔ ۔ ۔ ۔ ۔ ۔ ۔ ۔ ۔ اس روایت کی سند میں ایک راوی مصعب بن ثابت ہے ، جسے امام أحمد اور دیگر حضرات نے ضعیف قرار دیا ہے اور ابن حبان نے اسے ثقہ کہا: ہے ۔

سیدنا بریدہ رضی اللہ عنہ بیان کرتے ہیں : مقوقس قبطی نے ، نبی اکرم صلی اللہ علیہ وسلم کو دو کنیزیں تحفے کے طور پر بھیجوائیں ، جن میں سے ایک سیدہ ماریہ رضی اللہ عنہ تھیں ، جو نبی اکرم صلی اللہ علیہ وسلم کے صاحبزادے سیدنا ابراہیم رضی اللہ عنہ کی والدہ ہیں ، اور دوسری خاتون کو نبی اکرم صلی اللہ علیہ وسلم نے سیدنا حسان بن ثابت رضی اللہ عنہ کو دے دیا تھا ، جو سیدنا حسان رضی اللہ عنہ کے صاحبزادے عبدالرحمن کی والدہ ہیں ، اس نے نبی اکرم صلی اللہ علیہ وسلم کو ایک خچر بھی تحفے کے طور پر بھجوایا تھا ، نبی اکرم صلی اللہ علیہ وسلم نے اسے قبول کر لیا تھا ۔
یہ روایت امام بزار نے اور امام طبرانی نے معجم اوسط میں نقل کی ہے اور امام بزار کے رجال صحیح کے رجال ہیں ۔

سیدنا انس بن مالک رضی اللہ عنہ بیان کرتے ہیں : ذی یزن کے حکمران نے نبی اکرم صلی اللہ علیہ وسلم کو تحفے کے طور پر ” من“ کا مٹکا بھیجا تھا ، تو نبی اکرم صلی اللہ علیہ وسلم نے اسے قبول کر لیا تھا ۔
یہ روایت امام بزار نے نقل کی ہے اس کی سند میں ایک راوی علی بن زید بن جدعان ہے ، اس میں ضعف پایا جاتا ہے ، ویسے اس کی توثیق کی گئی ہے ۔

سیدہ عائشہ صدیقہ رضی اللہ عنہا بیان کرتی ہیں : اسکندریہ کے حکمران مقوقس نے نبی اکرم صلی اللہ علیہ وسلم کی خدمت میں ” عیدان “ کی بنی ہوئی شامی سرمہ دانی ، شیشہ اور کنگھی بھجوائی تھی ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا حنظلہ بن ربیع کاتب رضی اللہ عنہ بیان کرتے ہیں : قبط کے حکمران مقوقس نے نبی اکرم صلی اللہ علیہ وسلم کو تحائف اور شہباء نامی خچر بھجوایا تھا تو نبی اکرم صلی اللہ علیہ وسلم نے اسے قبول فرما لیا تھا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی زکریا بن یحیی کسائی ہے اور وہ انتہائی ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : مقوقس نے نبی اکرم صلی اللہ علیہ وسلم کو شیشہ کا پیالہ تحفے کے طور پر بھیجوایا تھا ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام بزار نے نقل کی ہے ، اس کی سند میں ایک راوی مندل بن علی ہے ، جس کی توثیق کی گئی ہے اور اس میں ضعف پایا جاتا ہے ۔

سیدنا انس رضی اللہ عنہ بیان کرتے ہیں : اکیدر نے نبی اکرم صلی اللہ علیہ وسلم کی خدمت میں ” من“ کا گھڑا بھیجا تھا ، جب نبی اکرم صلی اللہ علیہ وسلم نماز پڑھ کر فارغ ہوئے اور آپ کا گزر لوگوں کے پاس سے ہوا تو آپ نے ان میں سے ہر ایک شخص کو کچھ نہ کچھ دیا ، آپ نے سیدنا جابر رضی اللہ عنہ کو ایک حصہ دیا ، پھر جب آپ واپس ان کے پاس سے گزرے ، تو آپ نے انہیں ایک اور حصہ دیا ، انہوں نے عرض کی : آپ مجھے پہلے ایک مرتبہ عطا کر چکے ہیں ، نبی اکرم صلی اللہ علیہ وسلم نے فرمایا : یہ ( تمہارے والد ) عبداللہ کی صاحبزادیوں کے لئے ہے ۔
یہ روایت امام أحمد نے نقل کی ہے اس کی سند میں ایک راوی علی بن زید ہے اور وہ ضعیف ہے ، ویسے اس کی توثیق کی گئی ہے ۔