مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کا گزر اناج کے پاس سے ہوا جسے اس کے مالک نے سجا کے رکھا ہوا تھا نبی اکرم صلی اللہ علیہ وسلم نے اپنا دست مبارک اس میں داخل کیا ، تو اس میں کچھ خراب اناج بھی موجود تھا نبی اکرم صلی اللہ علیہ وسلم نے ارشاد فرمایا : اسے الگ سے فروخت کرو اور اسے الگ سے فروخت کرو کیونکہ جو شخص ہمارے ساتھ ملاوٹ کرے ( یا ہمیں دھوکہ دے ) وہ ہم میں سے نہیں ہے “ ۔
یہ روایت امام أحمد اور امام بزار نے اور امام طبرانی نے معجم اوسط میں نقل کی ہے اور اس کی سند میں ایک راوی ابومعشر ہے اور وہ صدوق ہے ایک جماعت نے اسے ضعیف قرار دیا ہے ۔

سیدنا ابوبردہ بن نیار رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ چلتے ہوئے ” بقیع مصلی “ کی طرف جا رہے تھے نبی اکرم صلی اللہ علیہ وسلم نے اپنا دست مبارک اناج میں داخل کیا پھر آپ نے اسے نکالا تو اس میں ملاوٹ ہوئی تھی ( راوی کو شک ہے شاید یہ الفاظ ہیں : ) وہ مختلف قسم کا تھا تو نبی اکرم صلی اللہ علیہ وسلم نے ارشاد فرمایا : وہ شخص ہم میں سے نہیں ہے ، جو ہمیں دھوکہ دے ۔
یہ روایت امام أحمد نے امام طبرانی نے معجم کبیر اور معجم اوسط میں نقل کی ہے اور امام بزار نے اختصار کے ساتھ نقل کی ہے اس کی سند میں ایک راوی جمیع بن عمیر ہے ، جسے ابوحاتم نے ثقہ قرار دیا ہے امام بخاری رحمہ اللہ اور دیگر حضرات نے اسے ضعیف کہا: ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” جو شخص ہمیں دھوکہ دے وہ ہم میں سے نہیں ہے “ ۔
یہ روایت امام بزار نے نقل کی ہے اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ہمیں دھوکہ دے وہ ہم میں سے نہیں ہے ، مکر اور دھوکہ جہنم میں ہوں گے “ ۔
یہ روایت امام طبرانی نے معجم کبیر اور معجم صغیر میں نقل کی ہے اور اس کے رجال ثقہ ہیں عاصم بن بہدلہ کے بارے میں اس کے حافظے کی خرابی کی وجہ سے کلام کیا گیا ہے ۔

سیدنا ابوموسی اشعری صلی اللہ علیہ وسلم نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص ہمیں دھوکہ دے وہ ہم میں سے نہیں ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی یحیی حمانی ہے اور وہ ضعیف ہے ۔

سیدنا ابوموسی اشعری رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ نقیع کے بازار کی طرف جا رہا تھا نبی اکرم صلی اللہ علیہ وسلم نے اپنا دست مبارک ایک ڈھیر میں داخل کیا ، تو آپ نے مختلف قسم کا اناج نکالا ( راوی کو شک ہے شاید یہ الفاظ ہیں : ) ملاوٹ والا اناج نکالا تو نبی اکرم صلی اللہ علیہ وسلم نے ارشاد فرمایا : وہ شخص ہم میں سے نہیں ہے ، جو ہمیں دھوکہ دے “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی یحیی بن عقبہ بن ابوغیراز ہے ایک قول کے مطابق وہ شخص حدیث ایجاد کیا کرتا تھا ۔

سیدنا قیس بن ابوغرزہ رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ایک شخص کے پاس سے ہوا جو اناج فروخت کر رہا تھا آپ نے ارشاد فرمایا : اے اناج والے شخص ! اس کا نیچے والا حصہ اس کے اوپر والے حصے کی مانند ہے ؟ اس نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے فرمایا : جو شخص مسلمانوں کو دھوکہ دے وہ ان میں سے نہیں ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ہمیں دھوکہ دے وہ ہم میں سے نہیں ہے اور جو شخص ہمیں تیر مارے ، وہ ہم میں سے نہیں ہے “ ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا براء بن عازب رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ہوا آپ نے اپنا دست مبارک ( اناج میں ) داخل کیا اور ارشاد فرمایا : ” وہ شخص ہم میں سے نہیں جو ہمیں دھوکہ دے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی سوار بن مصعب ہے اور وہ متروک ہے ۔

سیدنا حذیفہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ہمیں دھوکہ دے وہ ہم میں سے نہیں ہے “ ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں قیس بن ربیع نامی راوی کے بارے میں کلام کیا گیا ہے شعبہ اور ثوری نے اسے ثقہ قرار دیا ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم بازار کی طرف تشریف لے گئے آپ نے اناج کا ڈھیر دیکھا آپ نے اپنا دست مبارک اس میں داخل کیا ، تو آپ کا ہاتھ ایسے اناج تک پہنچا جو تر تھا جسے بارش لاحق ہوئی تھی نبی اکرم صلی اللہ علیہ وسلم نے اناج کے مالک سے دریافت کیا : تم نے ایسا کیوں کیا ہے ؟ اس نے عرض کی : اس ذات کی قسم ! جس نے آپ کو حق کے ہمراہ مبعوث کیا ہے یہ ایک ہی قسم کا اناج ہے ۔ نبی اکرم صلی اللہ علیہ وسلم نے فرمایا : پھر نے ترکو الگ کیوں نہیں رکھا اور خشک کو الگ کیوں نہیں رکھا ؟ تاکہ لوگ اسے پہچان کر خریدتے ، جو شخص ہمیں دھوکہ دے وہ ہم میں سے نہیں ہے ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

نبی اکرم صلی اللہ علیہ وسلم کے ایک صحابی سے یہ بات منقول ہے وہ بیان کرتے ہیں : نبی اکرم صلی اللہ علیہ وسلم نے یہ ارادہ کیا کہ آپ سودا کرنے سے منع کر دیں لوگوں نے عرض کی : یا رسول اللہ ! یہ ہمارا ذریعہ معاش ہے ۔ نبی اکرم صلی اللہ علیہ وسلم نے فرمایا : پھر کوئی دھوکہ نہیں دیا جائے گا ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔