مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اے لوگو ! خوشحالی سامان زیادہ ہونے کی وجہ سے نہیں ہوتی بلکہ اصل خوشحالی نفس کی خوشحالی ہے اور اللہ تعالیٰ بندے کو وہ پورا رزق عطا کرتا ہے ، جو اس نے بندے کے لئے طے کیا ہوتا ہے ، تو تم رزق کے حصول میں احتیاط سے کام لو وہ چیز حاصل کرو جو حلال ہے اور اسے چھوڑ دو جسے اس نے حرام قرار دیا ہے “ ۔
یہ روایت امام ابویعلیٰ نے نقل کی ہے اس کی سند میں ایک راوی عبید بن نسطاس ہے ، جو کثیر بن صلت کا غلام ہے میں نے کسی کو اس کے حالات بیان کرتے ہوئے نہیں سنا ہے اس کے بقیہ رجال ثقہ ہیں ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم کھڑے ہوئے آپ نے لوگوں کو بلایا اور فرمایا : میری طرف آ جاؤ لوگ آپ کی طرف آ کر بیٹھ گئے آپ نے ارشاد فرمایا : یہ تمام جہانوں کے پروردگار کے قاصد سیدنا جبرائیل نے مجھے یہ بتایا ہے کہ کوئی بھی شخص اس وقت تک نہیں مرے گا جب تک وہ اپنا رزق مکمل حاصل نہیں کر لیتا خواہ وہ تاخیر سے اسے ملے تو تم لوگ اللہ تعالیٰ سے ڈرو اور رزق حاصل کرتے ہوئے احتیاط سے کام لو رزق کا تاخیر سے آنا تمہیں اس بات پر مجبور نہ کرے کہ تم اسے اللہ تعالیٰ کی نافرمانی کے ہمراہ حاصل کرو کیونکہ اس کے پاس جو چیز موجود ہے وہ صرف اس کی فرمانبرداری کے ذریعے ہی حاصل کی جا سکتی ہے “ ۔
یہ روایت امام بزار نے نقل کی ہے اس کی سند میں ایک راوی قدامہ بن زائدہ بن قدامہ ہے میں نے کسی کو اس کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں ۔

سیدنا عاصم بن عدی رضی اللہ عنہ بیان کرتے ہیں : خیبر کے حصوں میں سے ایک سو حصے میں نے خرید لئے نبی اکرم صلی اللہ علیہ وسلم کو اس بات کی اطلاع ملی تو آپ نے ارشاد فرمایا : ” دو بھیڑیے جو بکریوں پر حملہ آور ہوں تو ان بکریوں کے مالک کا اتنا نقصان نہیں ہوتا جتنا مال اور شرف کا حصول مسلمان کے دین کے لئے نقصان دہ ہوتا ہے “ ۔
یہ روایت امام طبرانی نے معجم اوسط میں نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔

سیدنا معاویہ بن ابوسفیان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم کسی ایسی چیز کی طرف جلدی نہ کرو جس کے بارے میں تم یہ گمان کرتے ہو کہ تم نے اگر اس کی طرف جلدی کی ، تو تم اس تک پہنچ جاؤ گے اگر وہ چیز اللہ تعالیٰ نے تمہارے مقدر میں نہ لکھی ہو اور نہ ہی تم کسی ایسی چیز کے حوالے سے تاخیر کرو کہ جس کے بارے میں تم یہ گمان رکھتے ہو کہ اگر تم نے اس سے تاخیر کی تو وہ تم سے پرے ہو جائے گی اگر اللہ تعالیٰ نے اسے تمہارے مقدر میں لکھا ہو “ ۔
یہ روایت امام طبرانی نے معجم اوسط اور معجم کبیر میں نقل کی ہے اس کی سند میں ایک راوی عبدالوہاب بن مجاہد ہے اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک کھجور پڑی ملاحظہ فرمائی ، تو اسے اٹھایا اور اسے ایک مانگنے والے کو دے دیا ، اور فرمایا : پھر آپ صلی اللہ علیہ وسلم نے فرمایا : اگر تم اس تک نہ آتے تو اس نے تم تک آ جانا تھا “ ۔
یہ روایت امام طبرانی نے نقل کی ہے اور اس کے رجال ثقہ ہیں اور صحیح کے رجال ہیں صرف عبداللہ بن أحمد کا معاملہ مختلف ہے اور وہ ثقہ اور مامون ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم اللہ کی ناراضگی کے ہمراہ کسی کو راضی کرنے کی کوشش ہرگز نہ کرو اور اللہ تعالی کے فضل کے حوالے سے کسی شخص کی حمد بیان نہ کرو اور اس چیز کے حوالے سے تم کسی کی مذمت نہ کرو جو اللہ تعالی نے تمہیں نہیں دی ہے کیونکہ کسی لالچی شخص کا لالچ اس رزق کو تمہاری طرف نہیں لے آئے گا اور کسی ناپسندیدہ شخص کی ناپسندیدگی اس رزق کو تم سے پھیر نہیں دے گی بے شک اللہ تعالیٰ نے انصاف اور عدل کے مطابق ، آرام اور خوشی کو رضا اور یقین میں رکھا ہے اور غم اور پریشانی کو ناراضگی میں رکھا ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی خالد بن یزید عمری ہے ، جس پر حدیث ایجاد کرنے کا الزام عائد کیا گیا ہے ۔

سیدنا امام حسن بن علی رضی اللہ عنہما بیان کرتے ہیں : نبی اکرم صلی اللہ علیہ وسلم غزوہ تبوک کے موقع پر منبر پر چڑھے آپ نے اللہ تعالی کی حمد و ثناء بیان کرنے کے بعد ارشاد فرمایا : ” اے لوگو ! اللہ کی قسم میں تمہیں اس بات کا حکم دیتا ہوں جس کے بارے میں اللہ تعالیٰ نے تمہیں حکم دیا ہے اور تمہیں اسی چیز سے منع کرتا ہوں جس اللہ تعالیٰ نے تمہیں منع کیا ہے ، تو تم ( رزق کے ) حصول میں احتیاط سے کام لو اس ذات کی قسم جس کے دست قدرت میں ابوالقاسم کی جان ہے تم میں سے کسی ایک شخص کو اس کا رزق یوں طلب کرتا ہے ، جس طرح اس کی موت اس کا پیچھا کرتی ہے اگر اس رزق میں سے کسی چیز کے تم تک آنے میں دشواری ہو ، تو تم اسے اللہ تعالیٰ کی فرمانبرداری میں تلاش کرو “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبدالرحمن بن عثمان حاطبی ہے ، جسے امام ابوحاتم نے ضعیف قرار دیا ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” روح القدس نے مجھے یہ بتایا ہے کہ کوئی بھی شخص دنیا سے اس وقت تک نہیں نکلے گا جب تک اس کا وقت مکمل نہیں ہو جاتا اور وہ اپنا پورا رزق حاصل نہیں کر لیتا اور تم اپنے ( رزق ) کے حصول میں احتیاط سے کام لو ! رزق کا تاخیر سے آنا تمہیں اس بات پر مجبور نہ کرے کہ تم اللہ تعالیٰ کی نافرمانی کے ہمراہ اسے حاصل کرنے کی کوشش کرو کیونکہ جو کچھ اس کے پاس موجود ہے اسے صرف اس کی فرمانبرداری کے ذریعے ہی حاصل کیا جا سکتا ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عفیر بن معدان ہے اور وہ ضعیف ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب بھی اللہ تعالیٰ کوئی صبح پیدا کرتا ہے ، تو اس میں آسمان میں موجود ہر فرشتہ اور زمین میں موجود ہر فرشتہ یہ بات جانتا ہے کہ اس دن میں اللہ تعالیٰ کیا کرے گا اور بندے کو اس کا رزق نصیب ہوتا ہے خواہ تمام جنات اور انسان دونوں گروہ اس کے خلاف اکٹھے ہو کر اس کے رزق کو اس سے روکنے کی کوشش کریں تو بھی وہ ایسا نہیں کر سکتے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی بقیہ ہے اور وہ حدیث میں کمزور ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” رزق بندے کا یوں پیچھا کرتا ہے ، جس طرح موت اس کا پیچھا کرتی ہے “ ۔
یہ روایت امام بزار نے اور امام طبرانی نے معجم کبیر میں نقل کی ہے تاہم انہوں نے ۔ انہوں نے یہ الفاظ نقل کیے ہیں : ” وہ اس سے زیادہ اس کا پیچھا کرتا ہے جتنا اس کی موت اس کا پیچھا کرتی ہے “ ۔ اس کے رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” رزق کو کوئی گناہ کم نہیں کرتا اور کوئی نیکی اس میں اضافہ نہیں کرتی اور دعا کو ترک کرنا معصیت ہے “ ۔
یہ روایت امام طبرانی نے معجم صغیر میں نقل کی ہے اس کی سند میں ایک راوی عطیہ عوفی ہے اور وہ ضعیف ہے ویسے اس کی توثیق کی گئی ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر کوئی شخص اپنے رزق سے فرار اختیار کرے تو وہ رزق اس تک اسی طرح پہنچ جائے گا جس طرح موت اس تک پہنچ جائے گی “ ۔
یہ روایت امام طبرانی نے معجم اوسط اور معجم صغیر میں نقل کی ہے اس کی سند میں ایک راوی عطیہ عوفی ہے اور وہ ضعیف ہے ویسے اس کی توثیق کی گئی ہے ۔