مجمع الزوائد ومنبع الفوائد

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب اللہ تعالیٰ کسی بندے کے بارے میں خرابی کا ارادہ فرما لے تو اس کے لئے اینٹ اور گارے میں دلچسپی رکھ دیتا ہے یہاں تک کہ وہ شخص تعمیر کرنا شروع کرتا ہے “ ۔
یہ روایت امام طبرانی نے تینوں کتابوں میں نقل کی ہے اس کے رجال صحیح کے رجال ہیں صرف امام طبرانی کے استاد کا معاملہ مختلف ہے تاہم میں نے کسی کو اسے ضعیف قرار دیتے ہوئے نہیں پایا ہے ۔

سیدنا ابوبشیر انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب اللہ تعالیٰ کسی بندے کو رسواء کرنے کا ارادہ کرے تو اس کے مال کو تعمیر میں خرچ کرواتا ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایسا راوی ہے ، جس سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم انصار سے تعلق رکھنے والے ایک شخص کے تعمیر کردہ قبہ کے پاس سے گزرے تو آپ نے دریافت کیا : یہ کیا ہے ؟ لوگوں نے عرض کی : قبہ ہے ۔ نبی اکرم صلی اللہ علیہ وسلم نے فرمایا : ہر وہ تعمیر ، آپ نے اپنے دست مبارک کے ذریعے اپنے سر کی طرف اشارہ کر کے فرمایا کہ جو اس سے زیادہ اونچی ہو وہ قیامت کے دن اپنے متعلقہ فرد کے لئے وبال ہو گی ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو بندہ اپنی کفایت ( یا ضرورت ) سے اوپر تعمیر کرے گا اسے قیامت کے دن اس بات کا پابند کیا جائے گا کہ وہ اس تعمیر کو اپنی گردن پر اٹھائے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی مسیب بن واضح ہے ، جسے امام نسائی رحمہ اللہ نے ثقہ قرار دیا ہے اور ایک جماعت نے اسے ضعیف کہا: ہے ۔

ابوالعالیہ بیان کرتے ہیں : سیدنا عباس بن عبدالمطلب رضی اللہ عنہ نے ایک بالاخانہ بنایا تو نبی اکرم صلی اللہ علیہ وسلم نے ان سے فرمایا تم اسے منہدم کر دو انہوں نے کہا: کیا میں اسے منہدم کر دوں یا میں اس کی قیمت صدقہ کر دوں ؟ نبی اکرم صلی اللہ علیہ وسلم نے فرمایا : تم اسے منہدم کر دو ۔
یہ روایت امام طبرانی نے معجم کبیر میں نقل کی ہے اور یہ روایت ” مرسل “ ہے اور اس کے رجال صحیح کے رجال ہیں ۔

سیدنا معاویہ بن ابوسفیان رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو درندوں کی کھال پر سوار ہونے ( یا بیٹھنے ) اور عمارتیں تعمیر کرنے سے منع کرتے ہوئے سنا ہے ۔ ( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اس میں سے صرف درندوں کی کھال کی ممانعت والا حصہ نقل کیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی یزید بن سفیان ابومہزم ہے امام أحمد کہتے ہیں یہ کتنا مقارب الحدیث ہے امام نسائی رحمہ اللہ کہتے ہیں : یہ متروک ہے لوگوں نے اسے ضعیف قرار دیا ہے ۔

سیدنا معاذ بن انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کسی ظلم اور زیادتی کے بغیر کوئی عمارت تعمیر کرتا ہے یا کسی ظلم اور زیادتی کے بغیر کوئی درخت لگاتا ہے ، تو اس شخص کو ایسا اجر ملے گا جو اس وقت تک جاری رہے گا جب تک رحمان کی مخلوق اس چیز سے نفع حاصل کرتی رہے گی “ ۔
یہ روایت امام أحمد نے اور امام طبرانی نے معجم کبیر میں نقل کی ہے اس کی سند میں ایک راوی زبان بن فائد ہے ، جسے امام أحمد اور دیگر حضرات نے ضعیف قرار دیا ہے امام ابوحاتم نے اسے ثقہ کہا: ہے ۔