مجمع الزوائد ومنبع الفوائد

انصار سے تعلق رکھنے والے ایک صحابی ، جن کی کنیت ابوشعیب تھی ، وہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا مجھے آپ کے چہرے سے بھوک کا اندازہ ہو گیا میں اپنے قصاب غلام کے پاس آیا میں نے اسے حکم دیا کہ وہ پانچ افراد کے لئے کھانا تیار کرے ، پھر میں نے نبی اکرم صلی اللہ علیہ وسلم کو دعوت دے دی نبی اکرم صلی اللہ علیہ وسلم سمیت پانچ افراد آئے ان کے ساتھ ایک اور فرد بھی آ گیا جب وہ دروازے پر پہنچے تو آپ نے فرمایا : یہ ہمارے ساتھ آ گیا ہے اگر تم چاہو ، تو اسے اجازت دے دو ! ورنہ یہ واپس چلا جاتا ہے ، تو میں نے اسے اجازت دے دی ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں نبی اکرم صلی اللہ علیہ وسلم نے ارشاد فرمایا : ” جو شخص کسی قوم کے کھانے میں داخل ہوتا ہے حالانکہ اسے بلایا نہ گیا ہو ، تو وہ فاسق ہونے کے طور پر اندر آتا ہے اور حرام کھاتا ہے “ ۔
یہ روایت امام بزار نے نقل کی ہے اس کی سند میں ایک راوی یحیی بن خالد ہے اور وہ مجہول ہے اور یہ امام طبرانی نے معجم اوسط میں اسی حوالے سے نقل کی ہے تاہم اس میں ۔ انہوں نے یہ الفاظ نقل کیے ہیں : ” جو شخص کسی قوم کے کھانے میں آتا ہے ، جس کی طرف اسے دعوت نہ دی گئی ہو پھر وہ کچھ کھا لیتا ہے ، تو وہ حرام کھاتا ہے “ ۔

سیدنا عبداللہ بن عمر رضی اللہ عنہما ” مرفوع “ حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا : ) ” جو شخص کسی ایسے کھانے کی طرف آتا ہے ، جس کی اسے دعوت نہ دی گئی ہو ، تو وہ چور ہونے کے طور پر اندر آتا ہے اور حرام کھاتا ہے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے نقل کی ہے تاہم انہوں نے یہ الفاظ نقل نہیں کیے ہیں : ” اور وہ حرام کھاتا ہے “ ۔
یہ روایت امام بزار نے نقل کی ہے اس کی سند میں ایک راوی ابان بن طارق ہے اور وہ ضعیف ہے ۔

حضرت عبداللہ بن مسعود رضی اللہ عنہ فرماتے ہیں : زمانہ جاہلیت میں ہم اس شخص کو ’’ امعہ ‘‘ کا نام دیتے تھے جو ایسے کھانے میں شریک ہوتا تھا جس کی اسے دعوت نہ دی گئی ہو اور تمہارے درمیان امعہ وہ شخص ہوتا ہے ‘ جو اپنے دین کو پس پشت ڈال دیتا ہے ۔

ایک روایت میں ان سے منقول ہے اس میں یہ بات مذکور ہے ہم زمانہ جاہلیت میں امعہ اسے کہتے تھے کہ جسے کھانے کی دعوت دی گئی ہو اور اس کے ساتھ ایک اور شخص بھی پیچھے چلا جائے اور آج یہ اس شخص کو کہا: جاتا ہے ، جو لوگوں کے لیے اپنے دین کو پس پشت ڈال دیتا ہے ، اور ہم ” جھوٹ “ کو ” سمر “ کہتے تھے اور آج اسے ” قیل وقال “ کہا: جاتا ہے ۔ یہ تمام روایات امام طبرانی نے معجم کبیر میں دو اسناد کے ساتھ نقل کی ہیں اور وہ دونوں ہی ضعیف ہیں ۔