مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم خانہ کعبہ میں داخل ہوئے آپ کے ساتھ سیدنا بلال رضی اللہ عنہ سیدنا اسامہ رضی اللہ عنہ اور سیدنا عثمان رضی اللہ عنہ تھے دروازہ بند کر دیا گیا میں آیا اور زمین پر بیٹھ گیا یہ حضرات کچھ دیر اندر ہے پھر نبی اکرم صلی اللہ علیہ وسلم باہر تشریف لے آئے میں سیڑھی پر چڑھا اور بیت اللہ میں داخل ہوا میں نے دریافت کیا : نبی اکرم صلی اللہ علیہ وسلم نے کہاں نماز ادا کی تھی ؟ تو ان حضرات نے بتایا : یہاں ۔ راوی کہتے ہیں : میں یہ دریافت کرنا بھول گیا کہ نبی اکرم صلی اللہ علیہ وسلم نے کتنی نماز ادا کی تھی ۔ ( علامہ ہیثمی فرماتے ہیں : ) میں یہ کہتا ہوں : سیدنا بلال رضی اللہ عنہ سے منقول حدیث ” صحیح “ میں مذکور ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

عبدالرحمن بن زجاج بیان کرتے ہیں : میں نے سیدنا شیبہ بن عثمان رضی اللہ عنہ سے دریافت کیا : اے ابوعثمان لوگ یہ کہتے ہیں کہ نبی اکرم صلی اللہ علیہ وسلم خانہ کعبہ میں داخل ہوئے تھے لیکن آپ نے اس میں نماز ادا نہیں کی تھی تو انہوں نے جواب دیا وہ لوگ غلط کہتے ہیں : نبی اکرم صلی اللہ علیہ وسلم نے دو ستونوں کے درمیان دو رکعت ادا کی تھیں اور پھر اپنے پیٹ اور اپنی پشت کو ان دونوں کے ساتھ لگایا تھا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبدالرحمن بن زجاج ہے میں نے کسی کو اس کے حالات بیان کرتے ہوئے نہیں پایا ہے ۔

مسافع بن شیبہ نے اپنے والد سیدنا شیبہ رضی اللہ عنہ کا یہ بیان نقل کیا ہے ۔ نبی اکرم صلی اللہ علیہ وسلم خانہ کعبہ میں داخل ہوئے آپ نے دو رکعت ادا کیں آپ نے اس میں کچھ تصاویر دیکھیں تو فرمایا : اے شیبہ ان تصاویر کو ختم کر دو یہ بات سیدنا شیبہ رضی اللہ عنہ کے لئے مشکل کا باعث ہوئی تو شہسواروں میں سے ایک شخص نے آپ کی خدمت میں عرض کی اگر آپ چاہیں تو میں ان کے اوپر زعفران لگا دیتا ہوں تو انہوں نے ایسا ہی کیا ۔
یہ روایت امام طبرانی نے معجم کبیر میں نقل کی ہے مسافع نامی راوی کے حالات بیان کرتے ہوئے میں نے کسی کو نہیں پایا ہے ۔

مسافع بن شیبہ بیان کرتے ہیں : میرے والد نے میرے دادا کے حوالے سے یہ بات نقل کی ہے کہ انہوں نے نبی اکرم صلی اللہ علیہ وسلم کو دیکھا کہ آپ نے بیت اللہ کے درمیانی ستون کے پاس دو رکعت ادا کی تھیں راوی کہتے ہیں : بیت اللہ میں ( راوی کو شک ہے شاید یہ الفاظ ہیں : ) خانہ کعبہ میں تین ستون تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ایسا ہے ، جس سے میں واقف نہیں ہوں ۔

مسمع عجلی الرام بیان کرتے ہیں : حجبہ کے ایک بزرگ جن کا نام سمع تھا انہوں نے مجھے یہ حدیث بیان کی ۔ انہوں نے مجھے بیت اللہ کے درمیانی ستون کے پاس نماز ادا کرتے ہوئے دیکھا تو یہ بات بیان کی میرے والد نے میرے دادا کے حوالے سے یہ حدیث مجھے بیان کی ہے کہ انہوں نے نبی اکرم صلی اللہ علیہ وسلم کو اس ستون کے پاس دو رکعت ادا کرتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے اور اس میں راویوں کی ایک جماعت ایسی ہے جن سے میں واقف نہیں ہوں ۔

سیدنا عبدالرحمن بن صفوان رضی اللہ عنہ بیان کرتے ہیں : میں نے نبی اکرم صلی اللہ علیہ وسلم اور آپ کے اصحاب کو دیکھا میں ان میں سے دو آدمیوں کے درمیان داخل ہوا میں نے دریافت کیا نبی اکرم صلی اللہ علیہ وسلم جب بیت اللہ میں داخل ہوئے تھے تو آپ نے کیا کیا تھا ؟ انہوں نے جواب دیا نبی اکرم صلی اللہ علیہ وسلم نے بیت اللہ کے دائیں طرف دو ستونوں کے درمیان دو رکعت ادا کی تھیں ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا شیبہ رضی اللہ عنہ کی اُم ولد ، جنہیں نبی اکرم صلی اللہ علیہ وسلم دست اقدس پر بیعت کرنے کا شرف حاصل ہے ، وہ بیان کرتی ہیں : نبی اکرم صلی اللہ علیہ وسلم نے سیدنا شیبہ رضی اللہ عنہ کو بلایا ، انہوں نے دروازہ کھولا جب آپ اندر داخل ہوئے ، تو آپ نے رکوع کیا ( یا آپ جھک گئے ) اور اپنی پیشانی کو لگایا ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔ علامہ ہیثمی فرماتے ہیں : ) میں یہ کہتا ہوں : مسجد حرام میں یا اس کے علاوہ کسی جگہ نماز ادا کرنے سے متعلق روایات مدینہ منورہ کی فضیلت سے متعلق باب میں آئیں گی اگر اللہ نے چاہا ۔