مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا حج کے سفر کے دوران وادی عسفان سے گزر ہوا تو آپ نے دریافت کیا : اے ابوبکر ! یہ کون سی وادی ہے ؟ سیدنا ابوبکر رضی اللہ عنہ نے عرض کی : یا رسول اللہ ! یہ وادی عسفان ہے نبی اکرم صلی اللہ علیہ وسلم نے فرمایا : سیدنا ہود علیہ السلام اور سیدنا صالح علیہ السلام سرخ اونٹنیوں پر سوار ہو کر یہاں سے گزرے تھے ان اونٹنیوں کی لگا میں پتوں سے بنی ہوئی تھیں ۔ ان حضرات کا تہبند عباء تھی اور انہوں نے اوپر اونی چادریں لی ہوئی تھیں ۔ وہ تلبیہ پڑھ رہے تھے ، اور بیت عقیق کا حج کرنے جا رہے تھے ۔
یہ روایت امام أحمد نے نقل کی ہے ۔ اس کی سند میں ایک راوی زمعہ بن صالح ہے اس کے بارے میں کلام کیا گیا ہے ویسے اس کی توثیق کی گئی ہے ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” روحاء میں موجود چٹان کے پاس سے ستر انبیاء گزرے ہیں جن میں سے ایک اللہ کے نبی سیدنا موسیٰ علیہ السلام بھی تھے یہ حضرات برہنہ پاؤں تھے ان کے جسم پر عباء تھی اور یہ بیت اللہ العقیق کی طرف جا رہے تھے “ ۔
یہ روایت امام ابویعلیٰ نے اور امام طبرانی نے معجم کبیر میں نقل کی ہے ۔ اس کی سند میں ایک راوی یزید رقاشی ہے ، اور اس کے بارے میں کلام کیا گیا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” روحاء میں موجود چٹان کے پاس ستر ابنیاء برہنہ پاؤں گزرے ہیں ان کے جسم پر عباء تھی اور وہ بیت اللہ العتیق کی طرف جا رہے تھے ان میں سے ایک اللہ کے نبی سیدنا موسیٰ علیہ السلام ہیں “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی سعید بن میسرہ ہے ، اور وہ ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا موسیٰ علیہ السلام نے ایک سرخ بیل پر حج کیا تھا ان کے جسم پر قطوانی عباء تھی “ ۔
یہ روایت امام طبرانی نے نقل کی ہے ۔ اس کی سند میں ایک راوی لیث بن ابوسلیم ہے ، لیکن وہ تدلیس کرنے والا ہے ۔ اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں اس وادی میں گویا ( اس وقت بھی ) سیدنا موسیٰ بن عمران علیہ السلام کو دیکھ رہا ہوں کہ انہوں نے دو قطوانی چادروں کا احرام باندھا ہوا ہے “ ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مسجد خیف میں ستر انبیاء آئے ہیں ان میں سے ایک سیدنا موسیٰ علیہ السلام ہیں میں گویا کہ ( اس وقت بھی ) دیکھ رہا ہوں ان کے جسم پر دو قطوانی عبائیں ہیں انہوں نے احرام باندھا ہوا ہے ، اور وہ شنوء ہ قبیلے کے اونٹ پر سوار ہیں جس کی لگام پتوں سے بنی ہوئی ہے ، اور ان کی دو مینڈھیاں ہیں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔

سیدنا عبداللہ بن عباس رضی اللہ عنہما بیان کرتے ہیں : عرفہ کے دن نبی اکرم صلی اللہ علیہ وسلم منی سے روانہ ہوئے جب آپ کی سواری کھڑی ہوئی تو اس وقت اس اونٹنی پر ایک ایسی چادر موجود تھی جو چار درہم کے عوض میں خریدی گئی تھی ۔ نبی اکرم صلی اللہ علیہ وسلم نے دعا کی : ” اے اللہ ! اسے ایسا حج بنانا جس میں ریاکاری اور شہرت کی خواہش نہ ہو “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی أحمد بن محمد بن ابوبزہ ہے ، اور میں اس سے واقف نہیں ہوں ۔