مجمع الزوائد ومنبع الفوائد

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے نماز کے بعد احرام باندھا تھا ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں صرف امام بزار کے استاد کا معاملہ مختلف ہے ۔ امام ترمذی نے اس کی نقل کردہ حدیث کو حسن قرار دیا ہے ۔

سیدنا عبداللہ بن مسعود رضی اللہ عنہ بیان کرتے ہیں : جب نبی اکرم صلی اللہ علیہ وسلم کی سواری کھڑی ہوئی تو آپ نے تلبیہ پڑھنا شروع کیا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایسا راوی ہے ، جس سے میں واقف نہیں ہوں ۔

سیدنا امام حسن بن علی رضی اللہ عنہما بیان کرتے ہیں : نبی اکرم صلی اللہ علیہ وسلم نے ان میں سے ہر ایک کام کیا ہے آپ نے اس وقت بھی تلبیہ پڑھا تھا جب آپ کی سواری کھڑی ہوئی تھی اور آپ نے اس وقت بھی تلبیہ پڑھا تھا جب آپ کھلی جگہ میں موجود تھے ، اور ابھی آپ کی سواری کھڑی نہیں ہوئی تھی ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حماد بن شعیب ہے ، اور وہ ضعیف ہے ۔

سیدنا ابوداؤد مازنی رضی اللہ عنہ جنہیں غزوہ بدر میں شرکت کا شرف حاصل ہے وہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ روانہ ہوئے نبی اکرم صلی اللہ علیہ وسلم مسجد ذوالحلیفہ میں داخل ہوئے آپ نے اس میں چار رکعات ادا کیں پھر آپ نے مسجد میں تلبیہ پڑھا جو لوگ مسجد میں موجود تھے انہوں نے آپ کو سن لیا تو انہوں نے کہا: آپ نے مسجد سے تلبیہ پڑھنا شروع کیا ، پھر جب آپ سواری پر سوار ہوئے تو آپ نے تلبیہ پڑھا تو جو جو لوگ مسجد کے پاس موجود تھے انہوں نے یہ کہا: جب آپ کی سواری کھڑی ہوئی تھی اس وقت آپ نے تلبیہ پڑھا تھا پھر جب آپ کھلے میدان میں آ کے کھڑے ہوئے تو آپ نے تلبیہ پڑھا تو جو لوگ آپ کے پاس موجود تھے انہوں نے آپ کو سن لیا اور یہ بات بیان کی کہ آپ نے میدان سے تلبیہ پڑھنا شروع کیا ، تو ان سب لوگوں نے صحیح بات بیان کی ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی اسحاق بن سعید بن جبیر ہے ۔ امام ذہبی کہتے ہیں : یہ مجہول ہے ۔ اس روایت کی سند میں راویوں کی ایک جماعت ایسی ہے ، جن سے میں واقف نہیں ہوں ۔

عبداللہ بن عروہ بیان کرتے ہیں : میں نے سیدنا عبداللہ بن زبیر رضی اللہ عنہما کو سنا ہم اس وقت ان کے ساتھ تھے ، اور ہم عمرہ کرنے کے لئے نکلے تھے ، جب ہم وادی میں موجود ٹیلے کی طرف آ رہے تھے تو سیدنا عبداللہ بن زبیر رضی اللہ عنہما نے غسل کیا دو رکعات ادا کیں ان کے ساتھ ہم نے بھی غسل کیا ، اور ہم نے بھی دو رکعات ادا کر لیں پھر انہوں نے یہ تلبیہ پڑھنا شروع کیا : ” میں حاضر ہوں اے اللہ ! میں حاضر ہوں میں حاضر ہوں تیرا کوئی شریک نہیں میں حاضر ہوں بے شک حمد اور نعمت تیرے لئے مخصوص ہے ، اور بادشاہی بھی ، تیرا کوئی شریک نہیں ہے “ ۔ عبداللہ بن عروہ بیان کرتے ہیں : میں نے سیدنا عبداللہ بن زبیر رضی اللہ عنہما کو یہ بیان کرتے ہوئے سنا : اللہ کی قسم ! یہ اللہ کے رسول کے تلبیہ ( کے کلمات ) ہیں نبی اکرم صلی اللہ علیہ وسلم نے ایسا ہی کیا تھا آپ نے نماز کے بعد احرام باندھا تھا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : سیدنا موسیٰ علیہ السلام کے تلبیہ کے الفاظ یہ تھے : ” تیراہ بندہ اور تیرے دو بندوں ( یعنی تیرے بندے اور کنیز ) کا بیٹا حاضر ہے “ ۔ سیدنا عیسیٰ علیہ السلام کے تلبیہ کے الفاظ یہ تھے : ” تیرا بندہ اور تیری کنیز کا بیٹا حاضر ہے “ ۔ نبی اکرم صلی اللہ علیہ وسلم کے تلبیہ کے الفاظ یہ تھے : ” میں حاضر ہوں ، تیرا کوئی شریک نہیں ہے “ ۔
یہ روایت امام بزار نے نقل کی ہے ۔ اس کی سند میں ایک راوی عطاء بن سائب ہے وہ ثقہ ہے ، لیکن وہ اختلاط کا شکار ہو گیا تھا اس روایت کے بقیہ رجال ” صحیح “ کے رجال ہیں ۔

ضحاک بن مزاحم بیان کرتے ہیں : سیدنا عبداللہ بن عباس رضی اللہ عنہما جب تلبیہ پڑھتے تھے تو یہ پڑھتے تھے : ” میں حاضر ہوں میں حاضر ہوں اے اللہ ! میں حاضر ہوں تیرا کوئی شریک نہیں ہے میں حاضر ہوں بے شک حمد اور نعمت تیرے لئے مخصوص ہے ، اور بادشاہی بھی ، تیرا کوئی شریک نہیں ہے “ ۔ راوی بیان کرتے ہیں : سیدنا عبداللہ بن عباس رضی اللہ عنہما فرماتے تھے : تم صرف یہی پڑھو ! کیونکہ یہ اللہ کے رسول کا تلبیہ ہے ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا عمرو بن معدی کرب رضی اللہ عنہ بیان کرتے ہیں : مجھے اپنے بارے میں یہ بات یاد ہے کہ زمانہ جاہلیت میں جب ہم بیت اللہ کا حج کرتے تھے تو ہم یہ پڑھا کرتے تھے : ” زبید قبیلے کا ہذیان ، جو مجبور ہو کر تیرے پاس آیا ہے ، وہ بچ بچا کر ادھر ادھر دیکھتے ہوئے آیا ہے ، انہوں نے خوف کے عالم میں چٹیل زمین اور پہاڑ پار کیے ہیں ، اور وہ پیچھے ایسے بت چھوڑ کر آئے ہیں جو اکیلے رہ گئے ہیں اور خالی ( نا مراد ) ہیں “ ۔ اور آج ہم وہ پڑھتے ہیں جس کی تعلیم نبی اکرم صلی اللہ علیہ وسلم نے ہمیں دی ہے : ” میں حاضر ہوں اے اللہ ! میں حاضر ہوں میں حاضر ہوں اے اللہ ! تیرا کوئی شریک نہیں ہے میں حاضر ہوں بے شک حمد اور نعمت تیرے لئے مخصوص ہیں اور بادشاہی بھی اور تیرا کوئی شریک نہیں ہے “ ۔
یہ روایت امام بزار نے اور امام طبرانی نے معجم صغیر اور معجم اوسط میں نقل کی ہے ، تاہم انہوں نے یہ الفاظ نقل کیے ہیں : مجھے اپنے بارے میں یہ بات یاد ہے کہ ہم قرن سے تعلق رکھتے ہیں ہم جب حج کے لئے آتے تھے تو ہم یہ کہتے تھے : ” میں تعظیم کا اظہار کرتے ہوئے حاضر ہوں ، اور تیری بارگاہ میں عذر پیش کرتا ہو ، جو زبید قبیلے کا ہذیان ہے ، وہ مجبور ہو کر تیری طرف آئے ہیں ، انہوں نے گھبراہٹ کے عالم میں چٹیل زمین اور پہاڑ پار کیے ہیں ، اور وہ بتوں کو ایسی حالت میں چھوڑ کر آئے ہیں کہ وہ اکیلے اور نامراد رہ گئے ہیں “ ۔ اور مجھے اپنے بارے میں یہ یاد ہے کہ ہم وادی محسر کے نشیبی حصے میں پڑاؤ کیے ہوئے تھے اس اندیشے کے تحت کہ کوئی جن ہمیں اچک نہ لے تو نبی اکرم صلی اللہ علیہ وسلم نے ارشاد فرمایا : تم بطن عرنہ سے ذرا اوپر کی طرف ہو جاؤ جب یہ اسلام قبول کر لیں تو یہ ( جنات ) تمہارے بھائی ہیں ۔ نبی اکرم صلی اللہ علیہ وسلم نے ہمیں تلبیہ کی بھی تعلیم دی ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔ ؟ اس روایت کی سند میں ایک راوی شرقی بن قطامی ہے ، اور وہ ضعیف ہے ۔ امام بزار کہتے ہیں اس کی سند ثابت نہیں ہے ۔
امام طبرانی نے معجم کبیر میں یہ الفاظ زائد نقل کیے ہیں : ” ہم زمانہ جاہلیت میں لوگوں کو وقوف کرنے سے منع کرتے تھے تو نبی اکرم صلی اللہ علیہ وسلم نے ہمیں یہ حکم دیا کہ ہم ان کے اور عرنہ کے درمیان حائل ہو جائیں کیونکہ عرفہ کی شام ان کے وقوف کی جگہ ان کے وقوف کی جگہ وادی محسر کا نشیبی حصہ ہوتا تھا اس اندیشے کے تحت کہ کہیں جنات ان کو اچک نہ لیں ۔ ۔ ۔ ۔ ۔ ۔ ۔ ۔ ۔ ۔ ۔ باقی روایت حسب سابق ہے “ ۔

سیدنا انس رضی اللہ عنہ بیان کرتے ہیں : سیدنا اسماعیل علیہ السلام کے بعد لوگ اسلام پر گامزن رہے شیطان لوگوں کو مختلف باتیں سکھاتا رہتا تھا اس کا مقصد یہ تھا کہ وہ لوگوں کو اسلام سے ہٹا دے یہاں تک کہ شیطان نے ان لوگوں پر تلبیہ کے یہ کلمات داخل کیے : ” میں حاضر ہوں اے اللہ ! میں حاضر ہوں تیرا کوئی شریک نہیں ہے ، البتہ اس شریک کا معاملہ مختلف ہے ، جو تیری ملکیت ہو جس کا تو مالک ہو ، اور جس چیز کا وہ مالک ہے ( اس کا بھی تو مالک ہو ) “ ۔ سیدنا انس رضی اللہ عنہ بیان کرتے ہیں : تو شیطان مسلسل اسی طرح کرتا رہا یہاں تک کہ اس نے لوگوں کو اسلام سے نکال کر شرک کی طرف کر دیا ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : مشرکین کا تلبیہ یہ تھا : ” اے اللہ ! میں حاضر ہوں میں حاضر ہوں اے اللہ ! میں حاضر ہوں میں حاضر ہوں تیرا کوئی شریک نہیں ہے ، البتہ اس شریک کا معاملہ مختلف ہے ، جس کا تو مالک ہو ، اور جس چیز کا وہ مالک ہے اس کا بھی تو مالک ہے “ ۔ تو اللہ تعالیٰ نے یہ آیت نازل کی : ” کیا جو ( غلام اور کنیزیں ) تمہاری ملکیت ہیں ، جو رزق ہم نے تمہیں دیا ہے کیا وہ اس میں شراکت دار ہیں کہ تم ( اور تمہارے زیر ملکیت ) اس ( مال کی ملکیت ) میں برابر ہوں ، کیا تم ان کے بارے میں اسی طرح خوف رکھتے ہو جس طرح تم اپنے بارے میں خوف رکھتے ہو ۔ ۔ ۔ ۔ ۔ ۔ ۔ ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں حماد بن شعیب ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم یہ تلبیہ پڑھتے تھے : ” میں حاضر ہوں اے اللہ ! میں حاضر ہوں میں حاضر ہوں تیرا کوئی شریک نہیں ہے میں حاضر ہوں بے شک حمد اور نعمت تیرے لئے مخصوص ہے ، اور بادشاہی بھی ، تیرا کوئی شریک نہیں ہے “ ۔
یہ روایت امام ابویعلیٰ نے عبداللہ بن نمیر کی اسماعیل سے نقل کردہ روایت کے طور پر نقل کی ہے ۔ انہوں نے اس کا اسم منسوب بیان نہیں کیا ہے اگر تو وہ ابن ابوخالد ہے ، تو پھر وہ صحیح کے رجال میں سے ایک ہے اگر وہ اسماعیل بن ابراہیم بن مہاجر ہے ، تو پھر وہ ضعیف ہے ان سب راویوں سے اس نے روایات نقل کی ہیں ۔

عبداللہ بن ابوسلمہ بیان کرتے ہیں : سیدنا سعد رضی اللہ عنہ نے ایک شخص کو سنا جو یہ کہہ رہا تھا : اے عظمت والی ذات ! میں حاضر ہوں تو سیدنا سعد رضی اللہ عنہ نے فرمایا : بے شک وہ عظمت والی ذات ہے ، جب ہم نبی اکرم صلی اللہ علیہ وسلم کے ساتھ ہوتے تھے تو ہم یہ کلمات نہیں پڑھتے تھے ۔
یہ روایت امام أحمد اور امام ابویعلیٰ اور امام بزار نے نقل کی ہے ، اور اس کے رجال ” صحیح“ کے رجال ہیں البتہ عبداللہ نامی راوی نے سیدنا سعد بن ابی وقاص رضی اللہ عنہ سے سماع نہیں کیا ہے باقی اللہ بہتر جانتا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کے تلبیہ کے الفاظ یہ تھے : ” میں حاضر ہوں ایسے حج کے لئے جو حق ہے عبادت ہے ، اور نرمی کا باعث ہے “ ۔
یہ روایت امام بزار نے ” مرفوع“ اور ” موقوف “ دونوں طرح سے نقل کی ہے ۔ ” مرفوع “ روایت میں انہوں نے اپنے استاد کا نام بیان نہیں کیا ہے ۔

سیدنا ابوطفیل رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو اپنی اونٹنی قصوئی پر دیکھا آپ تلبیہ پڑھ رہے تھے ، اور لوگ ایک دوسرے کو ہلا رہے تھے ان کا مقصد یہ تھا کہ وہ نبی اکرم صلی اللہ علیہ وسلم کو دیکھ لیں ۔
یہ روایت امام بزار نے نقل کی ہے ۔ اس کی سند میں ایک راوی محمد بن مہزم ہے کسی نے اس پر جرح نہیں کی ہے ۔ ابن ابوحاتم نے اس کا ذکر کیا ہے اس کے بقیہ رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے عرفات میں وقوف کیا جب آپ نے یہ کہا: ” میں حاضر ہوں اے اللہ ! میں حاضر ہوں “ ۔ تو آپ نے یہ بھی کہا: ” بے شک بھلائی آخرت کی بھلائی ہے “ ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا عامر بن ربیعہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو بھی مؤمن چاشت کے وقت سے سورج غروب ہونے تک تلبیہ پڑھتا ہے یہاں تک کہ جب سورج غروب ہوتا ہے ، تو وہ اس کے گناہوں سمیت غروب ہوتا ہے ، اور وہ مؤمن دوبارہ یوں ہو جاتا ہے جیسے وہ اس وقت تھا جب اس کی والدہ نے اسے جنم دیا تھا “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عاصم بن عبیداللہ ہے ، اور وہ ضعیف ہے ۔

سیدنا خزیمہ بن ثابت رضی اللہ عنہ بیان کرتے ہیں : نبی اکرم صلی اللہ علیہ وسلم جب تلبیہ پڑھ کر فارغ ہوتے تھے تو اللہ تعالیٰ سے اس کی مغفرت اس کی رضا مندی اور جہنم سے بچاؤ کی دعا مانگتے تھے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی صالح بن محمد بن زائدہ ہے ، جسے امام أحمد نے ” ثقہ “ قرار دیا ہے “ اور ایک مخلوق نے ( یعنی کئی افراد نے ) اسے ضعیف کہا: ہے ۔

سیدنا ابوہریره رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تلبیہ پڑھنے والا جب بھی تلبیہ پڑھتا ہے ، اور تکبیر کہنے والا جب بھی تکبیر کہتا ہے ، تو اسے خوشخبری دی جاتی ہے عرض کی گئی : یا رسول اللہ ! کیا جنت کی ؟ آپ نے ارشاد فرمایا : جی ہاں “ ۔
یہ روایت امام طبرانی نے معجم اوسط میں دو اسناد کے ساتھ نقل کی ہے ، ان میں سے ایک کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جبرائیل میرے پاس آئے اور انہوں نے مجھے یہ ہدایت کی کہ میں بلند آواز میں تلبیہ پڑھوں“ ۔
یہ روایت امام أحمد نے نقل کی ہے ۔ اس کی سند میں ایک راوی جعفر بن عیاش ہے ، جو اہل مدینہ کے تابعین میں سے ایک ہے ابوحازم سلمہ بن دینار نے اس سے روایات نقل کی ہیں کسی نے اس پر جرح نہیں کی ہے ۔ اس روایت کے بقیہ رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جبرائیل نے مجھے تلبیہ پڑھتے ہوئے آواز بلند کرنے کی تلقین کی کیونکہ یہ حج کا مخصوص شعار ہے “ ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ حج ادا کرنے کے لئے نکلے جب ہم روحاء کے مقام پر پہنچے تو ہمارے حلق بیٹھ چکے تھے راوی کہتے ہیں : یعنی بلند آواز میں تلبیہ پڑھنے کی وجہ سے ایسا ہوا تھا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمر بن صھبان ہے ، اور وہ ضعیف ہے ۔

ابراہیم بن خلاد بن سوید خزرجی جن کا تعلق بنوحارث بن خزرج سے ہے وہ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کی خدمت میں حاضر ہوئے اور بولے : آپ عجاج اور شجاج ہو جائیں ( یعنی تلبیہ پڑھنے والے اور قربانی کرنے والے ہو جائیں ) ۔
یہ روایت امام طبرانی نے معجم کبیر میں ابراہیم نامی راوی کے حوالے سے نقل کی ہے ۔ جیسا کہ آپ ملاحظہ فرما سکتے ہیں انہوں نے اس کے حالات بھی بیان کیے ہیں پھر اس کے حوالے سے اس کے والد خلاد کے حوالے سے روایت نقل کی ہے ۔ جیسا کہ آگے آئے گا ہو سکتا ہے کہ انہوں نے نبی اکرم صلی اللہ علیہ وسلم سے اس کا سماع کیا ہو ، اور اپنے والد سے بھی کیا ہو اس روایت کی سند میں ایک راوی ابن اسحاق ہے ، اور وہ ثقہ ہے ، لیکن تدلیس کرنے والا ہے ۔

سیدنا خلاد بن سوید رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا جبرائیل علیہ السلام نبی اکرم صلی اللہ علیہ وسلم کے پاس آئے اور بولے : اے سیدنا محمد ! آپ عجاج اور شجاج ہو جائیں “ ۔
( راوی بیان کرتے ہیں ) عج سے مراد تلبیہ پڑھنا ہے ، اور شج سے مراد خون بہانا ( یعنی قربانی کرنا ہے ) ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابن اسحاق ہے ، لیکن وہ تدلیس کرنے والا ہے ۔

سیدنا سائب بن خلاد رضی اللہ عنہ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کے پاس آئے اور بولے : آپ عجاج اور شجاج ہو جائیں ۔ راوی کہتے ہیں : ) عج سے مراد تلبیہ پڑھنا اور شج سے مراد قربانی کا جانور قربان کرنا ہے ۔ ( علامہ ہیثمی فرماتے ہیں : ) میں یہ کہتا ہوں : ” سنن “ کے مولفین نے
یہ روایت نقل کی ہے ۔ سیدنا جبرائیل علیہ السلام میرے پاس آئے اور انہوں نے مجھے یہ ہدایت کی کہ میں اپنے اصحاب کو یہ حکم دوں کہ وہ بلند آواز میں تلبیہ پڑھیں ۔
یہ روایت امام أحمد نے نقل کی ہے ۔ اس کی سند میں ایک راوی ابن اسحاق ہے وہ ثقہ ہے ، لیکن وہ تدلیس کرنے والا ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سب سے زیادہ فضیلت والا حج ، عج اور شج ہے “ ۔ ( شاید راوی کہتے ہیں : ) عج سے مراد تلبیہ پڑھنا ہے ، اور شج سے مراد قربانی کا جانور قربان کرنا ہے ۔
یہ روایت امام ابویعلیٰ نے نقل کی ہے ، اور اس میں ایک ضعیف شخص ہے ۔