مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” عورت کے لئے صرف اپنے چہرے پر احرام نہیں ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ایوب بن محمد یمامی ہے ، اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” احرام والی عورت نقاب نہیں پہنے گی دستانے نہیں پہنے گی برقعہ نہیں پہنے گی ، اگر وہ حیض کی حالت میں احرام باندھنا چاہتی ہے ، تو وہ احرام باندھ لے گی وہ تمام مواقف میں وقوف کرے گی ۔ صرف بیت اللہ کا طواف نہیں کرے گی ، اور صفا و مروہ کی سعی نہیں کرے گی “ ۔
( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ منقول ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمر بن صھبان ہے ، اور وہ متروک ہے ۔

سیدنا عبداللہ بن عباس رضی اللہ عنہما فرماتے ہیں : نبی اکرم صلی اللہ علیہ وسلم کی ازواج مہندی لگا لیتی تھیں ، جبکہ انہوں نے احرام باندھا ہوا ہوتا تھا اور معصفر کپڑا پہن لیتی تھیں ، جبکہ انہوں نے احرام باندھا ہوا ہوتا تھا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یعقوب بن عطاء ہے ۔ ابن حبان نے اسے ” ثقہ “ قرار دیا ہے ، جبکہ ایک جماعت نے اسے ضعیف کہا: ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کی ازواج بیت اللہ کا طواف کر رہی ہوتی تھیں اور انہوں نے سرخ رنگ کی چادر لی ہوتی تھی جو لٹکی ہوئی نہیں ہوتی تھیں ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابومعشر ہے ، اور اس کے بارے میں کلام کیا گیا ہے ۔

سیدہ اسماء بنت ابوبکر رضی اللہ عنہما بیان کرتی ہیں : نبی اکرم صلی اللہ علیہ وسلم کی ازواج معصفر قمیصیں پہن لیتی تھیں ، جبکہ وہ احرام میں ہوتی تھیں ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک جماعت ایسی ہے ، جن سے میں واقف نہیں ہوں ۔

سیدہ امیمہ بنت رقیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کی ازدواج ایسی پٹیاں باندھ لیتی تھیں جن پر ورس یا زعفران لگا ہوا ہوتا تھا وہ اپنے بالوں کے نیچے ( والے حصے میں ) انہیں باندھ لیتی تھیں اور احرام باندھنے سے پہلے باندھتی تھیں پھر وہ اسی حالت میں احرام باندھ لیتی تھیں ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی خاتون حکیمہ بنت امیمہ ہے ، جن سے ابن جریج نے روایت نقل کی ہے ۔ اس خاتون کے بارے میں کسی نے کلام نہیں کیا ہے ۔ امام ابوداؤد نے اس خاتون کی روایت سے استدلال کیا ہے ۔ اس روایت کے بقیہ رجال ” صحیح “ کے رجال ہیں ۔

سیده حبه بنت عمرو رضی اللہ عنہما جنہیں دونوں قبلوں کی طرف نبی اکرم صلی اللہ علیہ وسلم کے ساتھ نماز ادا کرنے کا شرف حاصل ہے ان کے بارے میں یہ بات منقول ہے : جب وہ احرام باندھنے کا ارادہ کرتی تھیں تو وہ تھیلی اپنی گود میں رکھتی تھیں ، اور جو لباس چاہتی تھیں وہ لباس پہن لیتی تھیں اور معصفر لباس بھی پہن لیتی تھیں پھر احرام باندھتی تھیں ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

سیدہ ام سلمہ رضی اللہ عنہا جو نبی اکرم صلی اللہ علیہ وسلم کی زوجہ محترمہ ہیں ، وہ بیان کرتی ہیں : ہم نبی اکرم صلی اللہ علیہ وسلم کے ساتھ تھیں ہم نے احرام باندھا ہوا تھا جب کوئی سوار ہمارے پاس سے گزرتا تو ہم اپنا کپڑا سر کے اوپر سے چہرے کی طرف لٹکا لیتی تھیں بعض اوقات انہوں نے یہ الفاظ نقل کیے ہیں : اوڑھنی کو چہرے پر ڈال لیتی تھیں ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یزید بن ابوزیاد ہے ، جسے عبداللہ بن مبارک اور دیگر حضرات نے ” ثقہ “ قرار دیا ہے ، اور ایک جماعت نے اسے ضعیف کہا: ہے ۔