مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس گھر سے نفع حاصل کرو اسے دو مرتبہ منہدم کیا گیا ہے ، اور تیسری مرتبہ اٹھا لیا جائے گا“ ۔
یہ روایت امام بزار نے اور امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

محمد بن منکدر بیان کرتے ہیں : ایک شخص کی سیدنا عبداللہ بن عمر رضی اللہ عنہما سے ملاقات ہوئی جو اس وقت ایک کمزور اونٹنی پر سوار تھے جس کی قیمت دس درہم بھی نہیں تھی ، اس شخص نے ان سے کہا: اے ابوعبدالرحمن کیا آپ اس پر حج کرنے کے لئے جا رہے ہیں ؟ انہوں نے فرمایا : جی ہاں ۔ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم حج کو نہ چھوڑنا ، خواہ کمزور اونٹنی پر ہی کرو جو دس درہم کے برابر ہو “ ( پھر سیدنا عبداللہ بن عمر رضی اللہ عنہما نے فرمایا : ) اللہ کی قسم مجھے اس کے علاوہ کوئی اور سواری دستیاب نہیں ہوئی اور میں نے حج کو چھوڑنا نہیں ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبداللہ بن سنان زہری ہے ، اور وہ ضعیف ہے ۔

سیدنا امام حسین بن علی رضی اللہ عنہما بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : میں بزدل ہوں اور میں کمزور ہوں نبی اکرم صلی اللہ علیہ وسلم نے ارشاد فرمایا : تم اس جہاد کی طرف آؤ جس میں لڑائی نہیں ہوتی اور وہ حج ہے ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال ثقہ ہیں ۔

عثمان بن سلیم نے اپنی دادی کا یہ بیان نقل کیا ہے : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : میں اللہ کی راہ میں جہاد میں حصہ لینا چاہتا ہوں نبی اکرم صلی اللہ علیہ وسلم نے ارشاد فرمایا : کیا میں تمہاری رہنمائی ایسے جہاد کی طرف نہ کروں جس میں لڑائی نہیں ہوتی ؟ میں نے عرض کی : جی ہاں ! نبی اکرم صلی اللہ علیہ وسلم نے فرمایا : بیت اللہ کا حج کرنا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ولید بن ابوثور ہے ، جسے امام ابوزرعہ اور ایک جماعت نے ” ضعیف “ قرار دیا ہے ، اور شریک نے اسے پاکیزہ قرار دیا ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالی فرماتا ہے : جس شخص کے جسم کو میں نے تندرستی دی ہو ، اور رزق میں اسے کشادگی دی ہو پھر وہ چار سال میں ایک مرتبہ بھی میری طرف نہ آئے ، تو وہ محروم ہے “ ۔
یہ روایت امام طبرانی نے معجم اوسط میں نقل کی ہے ، اور امام ابویعلیٰ نے نقل کی ہے ، تاہم انہوں نے یہ الفاظ نقل کیے ہیں : ” پانچ سال“ ان تمام روایات کے رجال ” صحیح“ کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بڑی عمر کے شخص ، کمزور شخص اور عورت کا جہاد ، حج اور عمرہ ہیں “ ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔