مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : انصار سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : آپ نے ہمیں زکوۃ یعنی صدقہ فطر کی ادائیگی کا حکم دیا ہے ہم نے اسے ادا کر دیا اس وقت ہمارا کیا بنے گا ؟ جب ہمیں ایسے حکمران ملیں گے کہ جو اس کو صحیح جگہ استعمال نہیں کریں گے ، نبی اکرم صلی اللہ علیہ وسلم نے فرمایا : تم اسے متعلقہ افراد کو ادا کر دینا ، اُن لوگوں سے اس کے حوالے سے حساب لیا جائے گا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالحکیم بن عبداللہ ہے ، اور وہ ضعیف ہے ۔

سیدنا سعد بن ابی وقاص رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم وہ ( زکوۃ ) ان ( حکمرانوں ) کو ادا کرنا ، جب تک وہ پانچ نمازیں ادا کرتے رہیں“ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ہانی بن متوکل ہے ، اور وہ ضعیف ہے ۔