مجمع الزوائد ومنبع الفوائد

سیدنا ابوہریرہ رضی اللہ عنہ صدقہ فطر کے بارے میں یہ فرماتے ہیں : یہ ہر آزاد اور غلام ، مذکر اور مؤنث ، چھوٹے اور بڑے ، غریب اور امیر پر لازم ہو گا ، جو کھجور کا ایک صاع ہو گا ، یا گندم کا نصف صاع ہو گا ۔ معمر بیان کرتے ہیں : مجھ تک
یہ روایت پہنچی ہے کہ زہری نے اسے نبی اکرم صلی اللہ علیہ وسلم کے حوالے سے روایت کیا ہے ۔ یہ روایت امام أحمد نے نقل کی ہے ، اور اس کا ” موقوف “ ہونا مستند ہے اس کا ” مرفوع “ ہونا مستند نہیں ہے ۔

سیدنا عمرو بن عوف رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : آپ صلی اللہ علیہ وسلم عید کی نماز ادا کرنے سے پہلے صدقہ فطر ادا کرنے کا حکم دیتے تھے ، آپ یہ آیت تلاوت کرتے تھے : ” تحقیق وہ کامیاب ہو گیا ، جس نے پاکیزگی اختیار کی ، اور اپنے پروردگار کا اسم یاد کیا ، اور نماز ادا کی “ ۔
یہ روایت امام بزار نے نقل کی ہے ، اس کی سند میں ایک راوی کثیر بن عبداللہ ہے ، اور وہ ضعیف ہے ۔

فصیلہ بنت وائلہ بیان کرتی ہیں : میں نے اپنے والد کو یہ آیت پڑھتے ہوئے سنا : ” تحقیق وہ کامیاب ہو گیا ، جس نے پاکیزگی اختیار کی ، اور اس نے اپنے پروردگار کے اسم کا ذکر کرتے ہوئے نماز ادا کی “ ۔ وہ فرماتے ہیں : عیدالفطر کے دن ، عیدگاہ میں نماز ادا کرنے سے پہلے گندم ادا کر دی جائے گی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن اشقر ہے ، اور وہ ضعیف ہے ۔

سیدنا عمرو بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” زکوۃ ( یعنی صدقہ فطر ) مسلمانوں پر ادا کرنا لازم ہے ، جو کھجور کا ایک صاع ، یا کشمش کا ایک صاع ، یا جو کا ایک صاع یا پنیر کا ایک صاع ہو گا “ ۔
یہ روایت امام بزار نے نقل کی ہے ، اس کی سند میں ایک راوی کثیر بن عبداللہ ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک شخص کو حکم دیا کہ وہ مکہ کے نشیبی علاقے میں بلند آواز میں اعلان کرے اور صدقہ فطر ادا کرنے کا حکم دے اور یہ کہے : ” یہ حق اور واجب ہے ، جو ہر مسلمان پر لازم ہے ، خواہ وہ مذکر ہو ، یا مونث ہو ، خواہ وہ چھوٹا ہو ، یا بڑا ہو ، آزاد ہو ، یا غلام ہو ، شہری ہو ، یا دیہاتی ہو ، یہ گندم کے دو مد ، یا اس کے علاوہ کسی بھی اناج کا ایک صاع ہو گا ، اور خبردار ! بچہ فراش والے کو ملے گا ، اور زنا کار کو محرومی ملے گی “ ۔ ایک روایت میں یہ الفاظ ہیں : ” یا گندم کا نصف صاع ہو گا ، جو شخص آٹا لے گا ، تو اس سے قبول کیا جائے گا ، اور جو شخص جو لے آئے گا ، تو اس سے قبول کیا جائے گا“ ۔ یہ تمام روایات امام بزار نے نقل کی ہیں ، اس کی سند میں ایک راوی یحیی بن عباد سعدی ہے ، اس کے بارے میں کلام کیا گیا ہے روایت کے یہ الفاظ : ” جو شخص آٹا لے آئے گا وہ اس سے قبول کیا جائے گا “ ۔
یہ روایت حسن نے سیدنا عبداللہ بن عباس رضی اللہ عنہما سے نقل کی ہے ، حسن نامی راوی تدلیس کرنے والا ہے ، لیکن وہ ثقہ ہے ۔

سیدنا زید بن ثابت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے زید ! تم اپنی ذات کی زکوۃ ( یعنی صدقہ فطر ) لوگوں کے ساتھ ادا کرو ، خواہ تمہیں گندم کا ایک صاع ملے “ ۔
یہ روایت امام طبرانی نے معجم کبیر اور اوسط میں نقل کی ہے ، تاہم انہوں نے یہ الفاظ نقل کیے ہیں : ” اگرچہ تمہیں ایک دھاگہ ملے “ ۔ اس روایت کی سند میں ایک راوی عبدالصمد بن سلیمان ازرق ہے ، اور وہ ضعیف ہے ۔

سیدنا اوس بن حدثان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” صدقہ فطر میں ، اناج کا ایک صاع نکالو “ ۔ راوی بیان کرتے ہیں : ان دنوں ہمارا اناج ، گندم ، انگور اور کشمش ہوتے تھے ۔ ایک روایت میں یہ الفاظ ہیں : ” پنیر ہوتا تھا “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبدالصمد بن سلیمان ازرق ہے ، اور وہ ضعیف ہے ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” صدقہ فطر ادا کرنا ہر انسان پر لازم ہے ، جو آٹے کے ، یا گندم کے دو مد ہوں گے ، جو کا ایک صاع ہو گا ، اور میٹھی چیز یعنی کھجور اور کشمش کا ایک صاع ہو گا“ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی لیث بن حماد ہے ، اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم دیہاتی علاقے کے رہنے والوں سے صدقہ فطر میں پنیر وصول کرتے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی کثیر بن عبداللہ ہے ، اور وہ ضعیف ہے ۔

اُن کے حوالے سے یہ بات منقول ہے : وہ بیان کرتے ہیں : میں نے کچھ عربوں کو دیکھا کہ وہ نبی اکرم صلی اللہ علیہ وسلم کی خدمت میں حاضر ہوئے اور عرض کی : یا رسول اللہ ! ہم جانوروں والے لوگ ہیں ، ہم ان کی زکوۃ ادا کرنا چاہتے ہیں ، تو کیا رمضان کی زکوۃ ہماری طرف سے کفایت کر جائے گی ؟ نبی اکرم صلی اللہ علیہ وسلم نے ارشاد فرمایا : جی نہیں ! تم اُس کو ( یعنی صدقہ فطر ) کو ہر چھوٹے اور بڑے آزاد اور غلام کی طرف سے ادا کرو ، کیونکہ یہ تمہارے لئے طہارت کا باعث ہو گا ۔
یہ روایت امام طبرانی نے معجم اوسط میں نقل کی ہے ، امام بزار نے اختصار کے ساتھ نقل کی ہے ، اس کی سند میں ایک راوی کثیر بن عبداللہ ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : ہم کھایا پیا کرتے تھے ، اور صدقہ فطر ادا کیا کرتے تھے ، پھر ہم عیدگاہ کی طرف چلے جاتے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابراہیم بن یزید خوزی ہے ، اور وہ ضعیف ہے ۔

سیدہ اسماء بنت ابوبکر رضی اللہ عنہ کے بارے میں یہ بات منقول ہے : نبی اکرم صلی اللہ علیہ وسلم کے زمانہ اقدس میں ، وہ اپنے اہل خانہ میں سے آزاد اور غلام ، ہر ایک کی طرف سے گندم کے دو مد ، یا کھجور کے دو صاع ادا کرتی تھیں ، یہ وہ ” مد “ تھا ، جس کے حساب سے لوگ لین دین کیا کرتے تھے ۔

ایک روایت میں یہ بات منقول ہے : وہ بیان کرتی ہیں : وہ لوگ نبی اکرم ﷺ کے زمانہ اقدس میں صدقہ فطر اس ’’ مد ‘‘ کے حساب سے ادا کرتے تھے ‘ جس ’’ مد ‘‘ کے حساب سے اہل مدینہ لین دین کیا کرتے تھے ‘ تمام اہل مدینہ ایسا ہی کیا کرتے تھے ۔
امام احمد نے صرف پہلی روایت نقل کی ہے ‘ باقی تمام روایات امام طبرانی نے معجم کبیر مں نقل کی ہیں ‘ معجم اوسط میں ان کا کچھ حصہ منقول ہے ‘ اور اس کی سند کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ صدقہ فطر کے بارے میں یہ فرماتے ہیں : یہ گندم کے دو مد ہوں گے ، یا کھجور ، یا جو کا ایک صاع ہو گا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبدالکریم ابوامیہ ہے ، اور وہ ضعیف ہے ۔