مجمع الزوائد ومنبع الفوائد

سیدنا سعید بن منذر انصاری رضی اللہ عنہ بیان کرتے ہیں : انہوں نے عرض کی : یا رسول اللہ ! کیا میں تین دن میں قرآن پڑھ لیا کروں ؟ نبی اکرم صلی اللہ علیہ وسلم نے ارشاد فرمایا : جی ہاں ! راوی کہتے ہیں : تو وہ صاحب ، انتقال تک اسی طرح قرآن پڑھتے رہے ۔
یہ روایت امام أحمد نے اور امام طبرانی نے معجم کبیر میں نقل کی ہے ، تاہم انہوں نے یہ الفاظ نقل کیے ہیں : آپ صلی اللہ علیہ وسلم نے فرمایا : ” جی ہاں ! اگر تم اس کی استطاعت رکھتے ہو“ ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

عثمان بن عمرو بن اوس نے ، اپنے والد کا یہ بیان نقل کیا ہے : میں ثقیف قبیلے کے وفد میں شامل ہو کر ، نبی اکرم صلی اللہ علیہ وسلم کی خدمت میں حاضر ہوا ۔ نبی اکرم صلی اللہ علیہ وسلم ہمارے پاس تشریف لاتے تھے ، آپ صلی اللہ علیہ وسلم ہمارے ساتھ بات چیت کرتے تھے ، ایک رات آپ کو ہمارے پاس آنے میں تاخیر ہو گئی ، ہم نے عرض کی : یا رسول اللہ ! آپ کو ہمارے پاس آنے میں تاخیر ہو گئی ؟ نبی اکرم صلی اللہ علیہ وسلم نے ارشاد فرمایا : میں قرآن کا جو حصہ ( روزانہ کے معمول کے طور پر ) تلاوت کرتا ہوں ، وہ میں پڑھ رہا تھا ، تو مجھے یہ اچھا نہیں لگا کہ میں اُسے ختم کرنے سے پہلے ہی اُسے درمیان میں چھوڑ دوں ، جب صبح ہوئی ، تو ہم نے نبی اکرم صلی اللہ علیہ وسلم کے اصحاب سے دریافت کیا : آپ لوگ قرآن کو مختلف حصوں میں کیسے پڑھتے ہیں ؟ انہوں نے جواب دیا : تین میں ، پانچ میں ، سات میں ، نو میں ، گیارہ میں ، تیرہ میں ، اور ق والقرآن المجید “ سے لے کر ” مفصل “ کے آخر تک کا حصہ ( روزانہ کا معمول ) بنا لینا عمدہ ہے ۔
یہ روایت امام طبرانی نے معجم کبیر میں نقل کی ہے ، وہ بیان کرتے ہیں : ولید بن مسلم نے اسے اسی طرح نقل کیا ہے ، جب کہ وکیع نے اسے اس کے برخلاف نقل کیا ہے ، کرام بن تمام اور دیگر حضرات نے اسے عبداللہ بن عبدالرحمن کے حوالے سے ، عثمان بن عبداللہ بن اوس کے حوالے سے ، اُن کے دادا سیدنا اوس بن حذیفہ رضی اللہ عنہ کے حوالے سے نقل کیا ہے ۔ عثمان بن عمرو کے حالات بیان کرتے ہوئے میں نے کسی کو نہیں پایا ہے ۔

سیدنا قیس بن ابوصعصعہ رضی اللہ عنہ بیان کرتے ہیں : انہوں نے عرض کی : یا رسول اللہ ! میں کتنے عرصے میں ( پورا قرآن ) پڑھ لیا کروں ؟ نبی اکرم صلی اللہ علیہ وسلم نے ارشاد فرمایا : پندرہ دن میں ، انہوں نے عرض کی : میں اپنے اندر اس سے زیادہ کی قوت پاتا ہوں ۔ نبی اکرم صلی اللہ علیہ وسلم نے فرمایا : ایک ہفتے میں ، انہوں نے عرض کی : میں اپنے اندر اس سے زیادہ کی قوت پاتا ہوں ، راوی بیان کرتے ہیں : وہ کافی عرصے تک اسی طرح تلاوت کرتے رہے ، یہاں تک کہ جب اُن کی عمر زیادہ ہو گئی اور ان کی نظر کمزور ہو گئی ، تو پھر وہ پندرہ دن میں پورا قرآن پڑھتے تھے ، اور یہ کہا: کرتے تھے : اے کاش ! میں نے نبی اکرم صلی اللہ علیہ وسلم کی عطا کی ہوئی ، پہلی رخصت کو قبول کر لیا ہوتا ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدنا معاذ بن انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص اللہ تعالیٰ کی راہ میں ایک ہزار آیات کی تلاوت کرتا ہے ، قیامت کے دن اُسے انبیاء ، صدیقین ، شہداء کے ہمراہ شمار کیا جائے گا اور یہ بہترین ساتھی ہیں“ ۔
یہ روایت امام ابویعلیٰ نے اور امام طبرانی نے معجم کبیر میں نقل کی ہے ، اس کی سند میں یہ مذکور ہے : ابن لہیعہ نے اسے زبان سے نقل کیا ہے ، اور ان دونوں کے بارے میں کلام کیا گیا ہے ۔

ابواحوص بیان کرتے ہیں : سیدنا عبداللہ رضی اللہ عنہ نے فرمایا : تین دن سے کم میں قرآن کو مکمل نہ پڑھا جائے ، تم لوگ اسے سات دن میں پڑھ لو ، اور آدمی کو اپنے روز کا حصہ باقاعدگی سے پڑھنا چاہیے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : وہ تین دن میں پورا قرآن پڑھ لیتے تھے ، اور وہ دن میں اس کا کم ہی حصہ تلاوت کرتے تھے ۔
یہ روایت امام طبرانی نے معجم کبیر میں دو حوالوں سے نقل کی ہے ، جن میں سے ایک کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ فرماتے ہیں : جو شخص تین دن سے کم دن میں پورا قرآن پڑھ لیتا ہے ، وہ رجز پڑھنے والا ہوتا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص نے سورت اخلاص کی تلاوت کی ، اُس نے ایک تہائی قرآن کی تلاوت کر لی “ ۔
یہ روایت امام طبرانی نے معجم کبیر میں نقل کی ہے ، اس کے رجال ” ثقہ “ ہیں ۔ ( علامہ ہیثمی فرماتے ہیں : ) میں یہ کہتا ہوں : سورت اخلاص کی تفسیر سے متعلق باب میں ، اس بارے میں بہت سی احادیث آئیں گی ، اگر اللہ نے چاہا ۔

سیدنا عبداللہ رضی اللہ عنہ فرماتے ہیں : جو شخص سورت بقرہ کی تین آیات کی تلاوت کر لے ، تو اس نے بکثرت اور عمدہ کام کیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یحیی بن عمرو بن سلمہ ہے ، میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ” صحیح “ کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ایک روایت اس بارے میں منقول ہے ، جو آگے چل کر سورت بقرہ سے متعلق باب میں آئے گی ، اور اس باب کے آخر میں آئے گی کہ ” آدمی کو صبح اور شام کے وقت کیا پڑھنا چاہیے ؟ “ اگر اللہ نے چاہا ۔