مجمع الزوائد ومنبع الفوائد

سیدنا ابوقتادہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” لوگوں میں سب سے برا چور وہ ہے ، جو اپنی نماز میں چوری کرتا ہے لوگوں نے عرض کی : یا رسول اللہ ! وہ اپنی نماز کی چوری کیسے کرتا ہے ۔ نبی اکرم صلی اللہ علیہ وسلم نے فرمایا : وہ اس کے رکوع اور سجود کو مکمل ادا نہیں کرتا ہے ( راوی کو شک یا شاید یہ الفاظ ہیں : ) وہ رکوع میں پشت کو سیدھا نہیں کرتا ہے ، اور سجود میں بھی نہیں کرتا ہے “ ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک سب سے برا چور وہ ہے ، جو اپنی نماز کو چوری کرتا ہے لوگوں نے عرض کی : یا رسول اللہ ! وہ اس کو کیسے چوری کرتا ہے ۔ نبی اکرم صلی اللہ علیہ وسلم نے ارشاد فرمایا : وہ اس کے رکوع اور اس کے سجود کو مکمل ادا نہیں کرتا ہے “ ۔
یہ روایت امام أحمد اور امام ابویعلیٰ نے نقل کی ہے ، اور اس کی سند میں ایک راوی علی بن زید ہے ، جس سے استدلال کرنے کے بارے میں اختلاف کیا گیا ہے ، اس روایت کے بقیہ رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” سب سے برا چور وہ ہے ، جو اپنی نماز میں چوری کرتا ہے لوگوں نے عرض کی : یا رسول اللہ ! وہ اپنی نماز میں کیسے چوری کرتا ہے ۔ نبی اکرم صلی اللہ علیہ وسلم نے ارشاد فرمایا : وہ اس کے رکوع اور سجود کو مکمل نہیں کرتا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عبدالحمید بن حبیب بن ابوالعشرین ہے ، جسے امام أحمد امام ابوحاتم اور امام ابن حبان رحمہ اللہ نے ” ثقہ “ قرار دیا ہے ، جب کہ دحیم نے اسے ضعیف قرار دیا ہے امام نسائی رحمہ اللہ فرماتے ہیں یہ قوی نہیں ہے ، اس روایت کے بقیہ رجال ” ثقہ “ ہیں ۔

سیدنا عبداللہ بن مغفل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : سب سے بڑا چور وہ ہے جو اپنی نماز کو چوری کرتا ہے عرض کی گئی : یا رسول اللہ ! وہ اپنی نماز کو کیسے چوری کرتا ہے آپ نے فرمایا : وہ اس کے رکوع اور اس کے سجود کو مکمل نہیں کرتا ہے ، اور سب سے بڑا بخیل وہ ہے ، جو سلام کرنے کے حوالے سے بخیل ہو “ ۔
یہ روایت امام طبرانی نے تینوں کتابوں میں نقل کی ہے ، اور اس کے رجال ” ثقہ “ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ ایسے شخص کی نماز کی طرف نظر نہیں کرتا جو رکوع اور سجود کے درمیان اپنی پشت کو سیدھا نہیں رکھتا “ ۔
یہ روایت امام أحمد نے عبداللہ بن زید حنفی کی سیدنا ابوہریرہ رضی اللہ عنہ کے حوالے سے نقل کردہ روایت کے طور نقل کی ہے ، اور میں نے کسی کو اس شخص کے حالات بیان کرتے ہوئے نہیں پایا ہے ۔

سیدنا طلق بن علی حنفی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ ایسے بندے کی نماز کی طرف نظر نہیں کرتا ہے ، جو رکوع اور سجدے کے درمیان اپنی پشت کو سیدھا نہیں کرتا ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم تشریف لائے آپ نے مسجد میں ایک شخص کو دیکھا جو رکوع اور سجود مکمل ادا نہیں کر رہا تھا تو نبی اکرم صلی اللہ علیہ وسلم نے ارشاد فرمایا : ایسے آدمی کی نماز قبول نہیں ہوتی ہے ، جو رکوع اور سجود کو مکمل نہیں کرتا ہے “ ۔
یہ روایت امام طبرانی نے معجم اوسط اور معجم صغیر میں نقل کی ہے ، اس کی سند میں یہ بات مذکور ہے ، اسے ابراہیم نے عباد کرمانی سے نقل کیا ہے ۔ میں نے کسی کو اس کے حالات بیان کرتے ہوئے نہیں پایا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ آدمی اس طرح سے نماز ادا کرے کہ وہ اس کے رکوع اور سجود کو مکمل نہ کرے
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن شبیب ہے ، اور وہ انتہائی ” ضعیف “ ہے ۔