مجمع الزوائد ومنبع الفوائد

سماک بن حرب نے اہل مدینہ سے تعلق رکھنے والے ایک شخص کے حوالے سے یہ بات نقل کی ہے کہ انہوں نے نبی اکرم صلی اللہ علیہ وسلم کے پچھے نماز ادا کی تو انہوں نے نبی اکرم صلی اللہ علیہ وسلم کو فجر کی نماز میں سورہ ق والقرآن المجید کی تلاوت کرتے ہوئے سنا
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا جابر بن سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم فجر کی نماز میں سورت یسین پڑھتے تھے ۔

ان کے حوالے سے ایک روایت میں یہ بات منقول ہے ۔ نبی اکرم صلی اللہ علیہ وسلم صبح کی نماز میں سورۃ واقعہ اور اس جیسی دوسری سورتیں پڑھتے تھے یہ دونوں روایات امام طبرانی نے معجم اوسط میں نقل کی ہیں سورہ یسین والی روایت کے رجال ” صحیح “ کے رجال ہیں ، اور سورہ واقعہ والی روایت میں ایک راوی یعقوب بن حمید بن کاسب ہے ، جسے ایک جماعت نے ضعیف قرار دیا ہے بعض حضرات نے یہ کہا: ہے کہ اس کی وجہ یہ ہے کہ اس پر حد جاری ہوئی تھی ابن حبان نے اس راوی کا تذکرہ کتاب ” الثقات “ میں کیا ہے ، اس روایت کے بقیہ رجال ” صحیح “ کے رجال ہیں ۔

سیدنا اغرمزنی رضی اللہ عنہ بیان کرتے ہیں : نبی اکرم صلی اللہ علیہ وسلم نے صبح کی نماز میں سورت روم کی تلاوت کی تھی ۔
یہ روایت امام بزار نے نقل کی ہے ، اس کی سند میں ایک راوی مؤمل بن اسماعیل ہے ، اور وہ ” ثقہ “ ہے ، اس کے بارے میں یہ کہا: گیا ہے وہ بکثرت غلطی کرتا ہے ۔

سیدنا ابوہریرہ رضی اللہ عنہ بیان کرتے ہیں : میں مدینہ منورہ آیا نبی اکرم صلی اللہ علیہ وسلم خیبر میں موجود تھے بنوغفار سے تعلق رکھنے والے ایک صاحب ( مدینہ منورہ میں ) لوگوں کی امامت کرتے تھے انہوں نے پہلی رکعت میں سورت مریم کی اور دوسری رکعت میں سورت ویل للمطففین کی تلاوت کی راوی کہتے ہیں : میرا خیال ہے روایت میں یہ الفاظ بھی ہیں ” فجر کی نماز میں “ ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے یہ حکم دیا تھا کہ صبح کی نماز میں سورت واللیل اور سورت والشمس کی تلاوت کی جائے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدنا رفاعہ انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” صبح کی نماز میں دس آیات سے کم کی تلاوت نہ کرو اور عشاء کی نماز میں دس آیات سے کم کی تلاوت نہ کرو“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس سے استدلال کرنے کے بارے میں اختلاف کیا گیا ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : انہوں نے بنواسد کی کسی مسجد میں فجر کی نماز اد کی ان لوگوں کے امام نے انہیں نماز پڑھاتے ہوئے مفصل سورتوں سے تعلق رکھنے والی دو طویل سورتیں پڑھائیں تاکہ سیدنا عبداللہ تعالی کی دلجوئی ہو جب اس نے نماز مکمل کی تو سیدنا عبداللہ رضی اللہ عنہ نے فرمایا : میں تمہیں دیکھ رہا ہوں کہ تم نوجوان ہو اس نماز میں یہ دونوں سورتیں تم اس وقت پڑھ سکتے ہو جب تم نوجوان ہو۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عطاء بن سائب ہے وہ ” ثقہ “ ہے ، لیکن وہ عمر کے آخری حصے میں اختلاط کا شکار ہو گیا تھا ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے سفر کے دوران فجر کی نماز پڑھاتے ہوئے اس میں سورت الکافرون اور سورت اخلاص کی تلاوت کی پھر آپ نے ارشاد فرمایا : میں نے تمہارے لئے ایک تہائی قرآن اور ایک چوتھائی قرآن کی تلاوت کی ہے
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جعفر بن ابوجعفر ہے ، جس کے ضعیف ہونے پر محدثین کا اتفاق ہے ۔