مجمع الزوائد ومنبع الفوائد

ہانی بن معاویہ صدفی بیان کرتے ہیں : سیدنا عثمان غنی رضی اللہ عنہ کے زمانے میں ، میں حج کے لئے آیا میں نبی اکرم صلی اللہ علیہ وسلم کی مسجد میں بیٹھ گیا وہاں ایک صاحب لوگوں کو حدیث بیان کر رہے تھے انہوں نے بتایا ہم لوگ نبی اکرم صلی اللہ علیہ وسلم کے پاس موجود تھے اسی دوران ایک شخص آیا اور اس ستون کے پاس نماز ادا کرنے لگا اس نے نماز مکمل طور پر ادا نہیں کی بلکہ جلدی سے ادا کر لی پھر وہ چلا گیا تو نبی اکرم صلی اللہ علیہ وسلم نے ارشاد فرمایا : اگر یہ شخص ( اسی حالت میں ) مر گیا تو وہ یوں مرے گا کہ اس کا دین کے ساتھ کوئی واسطہ نہیں ہو گا آدمی کو نماز مختصر ادا کرنی چاہیے لیکن اسے مکمل کرنا چاہیے راوی بیان کرتے ہیں : میں نے دریافت کیا : یہ صاحب کون ہیں ؟ ( جو یہ حدیث بیان کر رہے ہیں ) تو مجھے بتایا گیا یہ سیدنا عثمان بن حنیف رضی اللہ عنہ ہیں ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ، اس کی سند میں ایک راوی براء بن عثمان ہے ، جو معروف نہیں ہے ۔

سیدنا ابوعبداللہ اشعری رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کو دیکھا کہ وہ رکوع مکمل نہیں کر رہا تھا اور سجدے میں ٹھونگ مارتا تھا اور وہ نماز ادا کر رہا تھا نبی اکرم صلی اللہ علیہ وسلم نے ارشاد فرمایا : اگر یہ اس حالت میں مر گیا تو یہ سیدنا محمد صلی اللہ علیہ وسلم کی ملت کے علاوہ پر مرے گا پھر نبی اکرم صلی اللہ علیہ وسلم نے ارشاد فرمایا : جو شخص رکوع مکمل نہیں کرتا اور سجدے میں ٹھونگ مارتا ہے اس کی مثال اس بھوکے شخص کی مانند ہے ، جو ایک یا دو کھجوریں کھا لیتا ہے تو وہ اس کی ضرورت پوری نہیں کرتی ہیں ۔ ابوصالح بیان کرتے ہیں : میں نے ابوعبداللہ سے دریافت کیا : نبی اکرم صلی اللہ علیہ وسلم کے حوالے سے یہ حدیث کسی نے بیان کی ہے ۔ انہوں نے جواب دیا : لشکروں کے امیروں نے یعنی سیدنا عمرو بن العاص نے سیدنا خالد بن ولید نے اور سیدنا شرحبیل بن حسنہ نے ان حضرات نے نبی اکرم صلی اللہ علیہ وسلم کی زبانی یہ حدیث سنی ہے ۔
یہ روایت امام طبرانی نے معجم کبیر میں اور امام ابویعلیٰ نے نقل کی ہے ، اور اس کی سند حسن ہے ۔

سیدنا بلال رضی اللہ عنہ کے بارے میں یہ بات منقول ہے : انہوں نے ایک شخص کو دیکھا جو رکوع اور سجود مکمل نہیں کر رہا تھا تو انہوں نے فرمایا : کہ اگر یہ اسی حالت میں مر گیا تو یہ سیدنا محمد صلی اللہ علیہ وسلم کی ملت کے علاوہ پر مرے گا ۔
یہ روایت امام طبرانی نے معجم اوسط اور معجم کبیر میں نقل کی ہے ، تاہم انہوں نے معجم کبیر میں یہ الفاظ نقل کیے ہیں : ” تو یہ سیدنا عیسیٰ کی ملت کے علاوہ پر مرے گا “ ۔ اس روایت کے رجال ” ثقہ “ ہیں ۔

سیدنا ابوہریرہ رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم نے اپنے اصحاب سے ارشاد فرمایا ، میں اس وقت وہاں موجود تھا ( نبی اکرم صلی اللہ علیہ وسلم نے فرمایا : ) ” اگر کسی شخص کا یہ ستون ہو ، تو وہ اس بات کو ناپسند کرے گا کہ اس کے ساتھ دھوکہ کیا جائے تو پھر ایسا کیوں ہوتا ہے کہ کوئی شخص عمل کرتا ہے ، تو اس نماز میں دھوکہ کرتا ہے ، جو اللہ تعالی کے لئے مخصوص ہے تم لوگ اپنی نماز کو مکمل ادا کرو کیونکہ اللہ تعالیٰ صرف مکمل چیز کو قبول کرتا ہے “ ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے اس بات سے منع کیا ہے کہ میں رکوع کے عالم میں تلاوت کروں آپ نے ارشاد فرمایا : اے علی وہ شخص جو نماز میں اپنی پشت کو سیدھا نہیں کرتا ہے ، اس کی مثال حاملہ عورت کی مانند ہے ، جو حاملہ ہو جاتی ہے ، اور جب اس کے نفاس کا وقت قریب آتا ہے ، تو وہ اس وقت مردہ بچے کو جنم دیتی ہے ، تو اب وہ نہ تو حاملہ رہی ہے ، اور نہ ہی بچے والی رہی ہے۔
یہ روایت امام ابویعلیٰ نے نقل کی ہے میں یہ کہتا ہوں : ” صحیح “ میں اس روایت کا کچھ حصہ منقول ہے ، جو رکوع کے دوران قرأت کرنے کی ممانعت کے بارے میں ہے ، اس روایت کی سند میں ایک راوی موسیٰ بن عبیدہ ربذی ہے ، اور وہ ” ضعیف “ ہے ۔

سیدنا عبداللہ بن مسعود رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب بندہ نماز ادا کرے اور اپنی نماز کے خشوع اور اس کے رکوع کو مکمل نہ کرے اور بکثرت ادھر اُدھر توجہ کرے تو اس کی نماز قبول نہیں ہوتی ہے ، اور جو شخص تکبر کے طور پر اپنے کپڑے کو لٹکاتا ہے اللہ تعالی قیامت کے دن اس کی طرف نظر نہیں کرے گا اگرچہ وہ شخص اللہ تعالیٰ کی بارگاہ میں معزز ہو “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبیداللہ بن زحر ہے ، اور وہ انتہائی ” ضعیف “ ہے ۔

قتادہ یا شاید کسی اور کے حوالے سے یہ بات منقول ہے : سیدنا عبداللہ بن مسعود رضی اللہ عنہ نے دو آدمیوں کو نماز پڑھتے ہوئے دیکھا ان دونوں میں سے ایک نے تہبند کو لٹکایا ہوا تھا اور دوسرا رکوع اور سجود مکمل ادا نہیں کر رہا تھا تو سیدنا عبداللہ بن مسعود رضی اللہ عنہ ہنس پڑے لوگوں نے دریافت کیا : اے ابوعبدالرحمن آپ کس بات پر ہنسے ہیں انہوں نے فرمایا : مجھے ان دو آدمیوں پر حیرانگی ہو رہی ہے جہاں تک اس شخص کا تعلق ہے ، جس نے اپنے تہبند کو لٹکایا ہوا ہے اللہ تعالی اس کی طرف نظر نہیں کرے گا ، اور جہاں تک دوسرے شخص کا تعلق ہے ، تو اللہ تعالی اس کی نماز کو قبول نہیں کرے گا ۔
یہ روایت امام طبرانی نے نقل کی ہے سیدنا عبداللہ بن مسعود رضی اللہ عنہ اور قتادہ کے درمیان اس روایت کی سند منقطع ہے ، اس روایت کے رجال ” ثقہ “ ہیں ۔

سیدنا عبادہ بن صامت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب بندہ وضو کرتے ہوئے اچھی طرح وضو کرے پھر نماز کے لئے کھڑا ہو اور اس کے رکوع اور سجود اور اس میں قرأت کو مکمل کرے تو وہ نماز یہ کہتی ہے اللہ تعالیٰ تمہاری حفاظت کرے جس طرح تم نے میری حفاظت کی ہے پھر اس نماز کو آسمان کی طرف لے جایا جاتا ہے ، تو اس کی روشنی اور نور ہوتا ہے ، اس نماز کے لئے آسمان کے دروازے کھول دیے جاتے ہیں ، اور جب بندہ اچھی طرح سے وضو نہیں کرتا ہے رکوع سجود اور قرآءت کو مکمل نہیں کرتا ہے ، تو نماز یہ کہتی ہے اللہ تعالیٰ تمہیں اسی طرح ضائع کر دے جس طرح تم نے مجھے ضائع کیا ہے پھر اس نماز کو آسمان کی طرف بلند کیا جاتا ہے ، تو اس پر تاریکی طاری ہوتی ہے ، اور آسمان کے دروازے بند کر دیے جاتے ہیں پھر اس نماز کو یوں لپیٹا جاتا ہے ، جس طرح پرانے کپڑے کو لپیٹا جاتا ہے ، اور پھر اس نماز کو پڑھنے والے شخص کے منہ پر مار دیا جاتا ہے “ ۔
یہ روایت امام طبرانی نے معجم کبیر میں نقل کی ہے امام بزار نے اس کی مانند نقل کی ہے ، اس کی سند میں ایک راوی احوص بن حکیم ہے ، جسے علی بن مدینی اور عجلی نے ” ثقہ “ قرار دیا ہے ایک جماعت نے اسے ضعیف قرار دیا ہے ، اس روایت کے بقیہ رجال کی توثیق کی گئی ہے ۔

زید بن جبیر بیان کرتے ہیں : سیدنا عبداللہ بن عمر نے سیدنا عمر کو دیکھا کہ سیدنا عمر نے ایک نوجوان کو دیکھا جو نماز ادا کر رہا تھا اور طویل نماز ادا کر رہا تھا اور اسے کھینچ رہا تھا انہوں نے دریافت کیا : کون شخص اس سے واقف ہے ، تو ایک شخص بولا: میں تو سیدنا عبداللہ بن عمر نے کہا: اگر میں اس شخص سے واقف ہوتا تو میں اسے یہ ہدایت کرتا کہ یہ رکوع اور سجدے کو طویل ادا کرے کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بندہ جب نماز ادا کرنے کے لئے کھڑا ہوتا ہے ، تو اس کے گناہ لائے جاتے ہیں اور اس کے سر اور کندھوں پر رکھ دیے جاتے ہیں تو جب بھی وہ رکوع میں جاتا ہے یا سجدے میں جاتا ہے ، تو وہ گناہ گر جاتے ہیں “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبداللہ بن صالح ہے ، جو لیث کا کاتب ہے عبدالملک بن شعیب بن لیث بیان کرتے ہیں : یہ ” ثقہ “ اور مامون ہے ایک جماعت یعنی امام أحمد اور دیگر حضرات نے اسے ضعیف قرار دیا ہے ، اس نوعیت کی دیگر احادیث نماز کی فضیلت سے متعلق بات میں آئیں گی باقی اللہ بہتر جانتا ہے ۔

علقمہ رضی اللہ عنہ بیان کرتے ہیں : میں مسجد میں داخل ہوا تو میں نے سیدنا عبداللہ کو نماز ادا کرتے ہوئے پایا وہ رکوع میں چلے گئے میں نے سورت اعراف پڑھنی شروع کی تو ان کے سجدے میں جانے سے پہلے میں سورت مکمل پڑھ چکا تھا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یحیی بن العلاء ہے ، اور وہ کذاب ہے ۔