مجمع الزوائد ومنبع الفوائد

سیدنا عبداللہ بن ابواوفی رضی اللہ عنہ بیان کرتے ہیں : جب سیدنا بلال رضی اللہ عنہ قَدْ قَامَتِ الصَّلَاةُ پڑھا کرتے تو نبی اکرم صلی اللہ علیہ وسلم تکبیر کہنے کے لئے اٹھ جاتے تھے ۔
یہ روایت امام بزار نے نقل کی ہے ، اس کی سند میں ایک راوی حجاج بن فروخ ہے ، اور وہ ” ضعیف“ ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہر چیز کا ایک خاص حصہ ہوتا ہے ، اور نماز کا خاص حصہ تکبیر اولیٰ ہے “ ۔ راوی بیان کرتے ہیں : اس کے بعد انہوں نے پوری حدیث ذکر کی ہے ۔
یہ روایت امام بزار نے نقل کی ہے ، اس کی سند میں ایک راوی حسن بن سکن ہے ، جسے امام أحمد نے ضعیف قرار دیا ہے امام ابن حبان رحمہ اللہ نے اس کا تذکرہ کتاب ” الثقات “ میں کیا ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ہر چیز کا کوئی آغاز ہوتا ہے ، اور نماز کا آغاز پہلی تکبیر ہے ، تو تم اس کی حفاظت کرو “ ۔ ابوعبداللہ کہتے ہیں : میں نے یہ روایت رجاء بن حیوہ کو سنائی تو انہوں نے یہ بات بتائی سیدہ ام درداء رضی اللہ عنہا نے سیدنا ابودردادء رضی اللہ عنہ کے حوالے سے نبی اکرم صلی اللہ علیہ وسلم سے یہ حدیث مجھے بیان کی ہے ۔
یہ روایت امام بزار نے نقل کی ہے امام طبرانی نے معجم کبیر میں اس کی مانند راوایت ” موقوف “ روایت کے طور پر نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سعید بن حارث بیان کرتے ہیں : سیدنا ابوہریرہ رضی اللہ عنہ بیمار ہو گئے ہیں ( راوی کو شک ہے شاید یہ الفاظ ہیں : ) غیر موجود رہے ، تو سیدنا ابوسعید خدری رضی اللہ عنہ نے ہمیں نماز پڑھائی وہ نماز کے آغاز میں بلند آواز میں تکبیر کہتے تھے رکوع میں جاتے ہوئے بلند آواز میں تکبیر کہتے تھے جب سمع اللہ لمن حمدہ پڑھ لیتے تھے اس وقت تکبیر کہتے تھے جب سجدے سے سر کو اٹھاتے تھے اس وقت تکبیر کہتے تھے جب سجدے میں جاتے تھے اس وقت کہتے تھے جب دو رکعات کے بعد کھڑے ہوتے تھے اس وقت ( بلند آواز میں تکبیر کہتے تھے ) یہاں تک کہ اسی طرح انہوں نے اپنی نماز مکمل کی جب انہوں نے نماز مکمل کر لی تو ان سے کہا: گیا لوگوں نے آپ کی نماز کے بارے میں اختلاف کیا ہے ، تو وہ گھر سے باہر نکلے اور منبر پر کھڑے ہوئے اور بولے : اے لوگو ! اللہ کی قسم میں اس بات کی پرواہ نہیں کرتا کہ تمہاری نماز کا طریقہ مختلف ہے یا مختلف نہیں ہے میں نے نبی اکرم صلی اللہ علیہ وسلم کو اسی طرح نماز ادا کرتے ہوئے دیکھا ہے ۔ علامہ ہیثمی کہتے ہیں : میں یہ کہتا ہوں :یہ روایت ” صحیح “ میں اختصار کے ساتھ منقول ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا براء رضی اللہ عنہ بیان کرتے ہیں : نبی اکرم صلی اللہ علیہ وسلم ہر مرتبہ جھکتے ہوئے اور اٹھتے ہوئے تکبیر کہتے تھے ۔
یہ روایت امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ۔