مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” نماز کی کنجی طہارت ہے تکبیر کے ذریعے یہ شروع ہوتی ہے ، اور سلام پھیر کر یہ ختم ہوتی ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی نافع ہے ، جو یوسف سلمی کا آزاد کردہ غلام ہے یہ ابوہرمز ہے یہ ضعیف اور ذاہب الحدیث ہے ۔

سیدنا عبداللہ بن زید رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” نماز کی کنجی طہارت ہے تکبیر کے ذریعے یہ شروع ہوتی ہے ، اور سلام پھیر کر یہ ختم ہوتی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی واقدی ہے ، اور وہ ” ضعیف“ ہے ۔

سیدنا عبداللہ بن مسعود رضی اللہ عنہ فرماتے ہیں : نماز کا آغاز تکبیر کے ذریعے ہوتا ہے ، اور یہ سلام پھیر کر ختم ہوتی ہے ، جب تم سلام پھیر لو اور تمہیں کسی کام کے سلسلے میں جلدی ہو ، تو تم سامنے کی طرف رُخ کیے بغیر اٹھ کر چلے جاؤ “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا رفاعہ بن رافع رضی اللہ عنہ بیان کرتے ہیں : ایک شخص مسجد میں داخل ہوا ۔ نبی اکرم صلی اللہ علیہ وسلم اس وقت تشریف فرما تھے اس نے نماز ادا کی نبی اکرم صلی اللہ علیہ وسلم نے اسے حکم دیا کہ وہ نماز کو دہرائے اس نے دو یا شاید تین مرتبہ نماز کو دہرایا پھر اس نے عرض کی : یا رسول اللہ ! میں نے کوئی کوتاہی نہیں کی ہے ( یعنی میں صرف اسی طرح نماز پڑھ سکتا ہوں ) ایسا اس نے دو یا شاید تین مرتبہ کے بعد کہا: ، تو نبی اکرم صلی اللہ علیہ وسلم نے ارشاد فرمایا : کسی بھی شخص کی نماز اس وقت تک مکمل نہیں ہوتی جب تک وہ وضو نہیں کر لیتا وہہ وضو کو صیح طریقے سے کرے گا ، پھر وہ اللہ اکبر کہے گا “ ۔ ( علامہ ہیثمی فرماتے ہیں : ) میں یہ کہتا ہوں : اس کے بعد راوی نے پوری حدیث ذکر کی ہے ، جو چاروں ” سنن “ میں منقول ہے ، تاہم اس میں اللہ اکبر کے الفاظ نہیں ہیں ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔