مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” حیاء ایمان کا حصہ ہے اور ایمان ، جنت میں ہو گا ، اور بے حیائی ، جفاء کا حصہ ہے ، اور جفاء جہنم میں ہو گی “ ۔
یہ روایت امام أحمد نے نقل کی ہے ، ” صحیح “ میں اس کا یہ حصہ منقول ہے : ” حیاء ، ایمان کا حصہ ہے “ اس روایت کے رجال صحیح کے رجال ہیں ۔

سیدنا عبداللہ بن سلام رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” حیاء ایمان کا حصہ ہے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی ہشام بن زیاد ابومقدام ہے ، جس سے استدلال کرنا جائز نہیں ہے ، ایک جماعت نے اسے ضعیف قرار دیا ہے اور کسی نے بھی اُس کی توثیق نہیں کی ہے ۔

سیدنا ابوبکرہ رضی اللہ عنہ اور سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” حیاء ، ایمان کا حصہ ہے ، اور ایمان ، جنت میں ہو گا ، بے حیائی ، جفاء کا حصہ ہے اور جفاء جہنم میں ہو گی “ ۔
( علامہ ہیثمی فرماتے ہیں : ) میں یہ کہتا ہوں : سیدنا ابوبکرہ رضی اللہ عنہ سے منقول حدیث کو امام ابن ماجہ نے روایت کیا ہے اور ان دونوں روایات کو امام طبرانی نے معجم اوسط اور معجم صغیر میں نقل کیا ہے ، اس کی سند میں یہ بات مذکور ہے : اسے عبدالجبار بن عبداللہ نامی راوی نے مامون کے حوالے سے نقل کیا ہے ، اور میں نے کسی کو عبدالجبار نامی اس راوی کا ذکر کرتے ہوئے نہیں دیکھا ہے ۔

سیدنا عبداللہ بن مسعود رضی اللہ عنہ بیان کرتے ہیں : کچھ لوگ اپنے ایک ساتھی کو لے کر نبی اکرم صلی اللہ علیہ وسلم کی خدمت میں حاضر ہوئے اور عرض کی : اے اللہ کے نبی ! ہمارے ساتھی کو حیاء نے خراب کر دیا ہے ، تو نبی اکرم صلی اللہ علیہ وسلم نے فرمایا : بے شک حیاء ، اسلامی احکام کا حصہ ہے اور بے حیائی ، آدمی کی کمینگی میں سے ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال کو امام ابن حبان رحمہ اللہ نے ثقہ قرار دیا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک حیا اور عی ( یعنی بات کرتے ہوئے جھجک کا شکار ہونا ) ایمان کا حصہ ہیں ، اور یہ دونوں جنت کے قریب کر دیتے ہیں ، اور جہنم سے دور کر دیتے ہیں ، جبکہ فحش کلامی اور بے حیائی ، شیطان کی طرف سے ہیں ، یہ دونوں جہنم کے قریب کر دیتے ہیں ، اور جنت سے دور کر دیتے ہیں “ ایک دیہاتی شخص نے سیدنا ابوامامہ رضی اللہ عنہ سے کہا: ہم تو شاعری میں یہ کہتے ہیں : عی ، حماقت کا حصہ ہے ، تو سیدنا ابوامامہ رضی اللہ عنہ نے فرمایا : میں یہ بیان کر رہا ہوں کہ نبی اکرم صلی اللہ علیہ وسلم نے ارشاد فرمایا ہے : ، اور تم ( اُس کے مقابلے میں ) میرے سامنے اپنا بدبودار شعر پیش کر رہے ہو ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن محصن عکاشی ہے اور وہ ضعیف ہے ، اس سے استدلال نہیں کیا جائے گا ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” حیاء اور ایمان ، ایک دوسرے کے ساتھ ملے ہوئے ہیں ، اور یہ دونوں ( اگر کسی شخص سے جدا ہوں گے ) تو ایک ساتھ جدا ہوں گے “ ۔
یہ روایت امام طبرانی نے معجم اوسط اور معجم صغیر میں نقل کی ہے ، وہ بیان کرتے ہیں محمد بن عبیدہ قومسی نامی راوی اسے نقل کرنے میں منفرد ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” حیاء اور ایمان ملے ہوئے ہیں ، جب ان دونوں میں سے کوئی ایک سلب کیا جاتا ہے ، تو دوسرا بھی ، اُس کے پیچھے رخصت ہو جاتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یوسف بن خالد سمتی ہے ، جو کذاب اور خبیث ہے ۔