مجمع الزوائد ومنبع الفوائد

سیدنا عبداللہ بن عمرو رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اور بولا: یا رسول اللہ ! جنت کا عمل کیا ہے ؟ آپ نے ارشاد فرمایا : سچ بولنا ، جب آدمی سچ بولتا ہے ، تو نیکی کرتا ہے ، اور جب وہ نیکی کرتا ہے ، تو وہ ایمان والا ہوتا ہے ، اور جب وہ ایمان والا ہوتا ہے ، تو وہ جنت میں داخل ہو گا ۔ اس کے بعد راوی نے پوری حدیث ذکر کی ہے ، جو کتاب العلم میں ، جھوٹ کی مذمت سے متعلق باب میں ، مکمل روایت کے طور پر آئے گی ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” آدمی اُس وقت تک مکمل طور پر مؤمن نہیں ہوتا ، جب تک وہ مذاق میں بھی جھوٹ بولنا ، اور جھگڑا کرنا ترک نہیں کر دیتا خواہ وہ سچا ہی ( یعنی جھگڑا کرنے میں حق پر ہی ) کیوں نہ ہو “ ۔
یہ روایت امام أحمد نے اور امام طبرانی نے معجم اوسط میں نقل کی ہے ، اس کی سند میں ایک راوی منصور بن اذین ہے ، میں نے کسی کو اس کا ذکر کرتے ہوئے نہیں دیکھا ہے ۔
( علامہ ہیثمی فرماتے ہیں : ) میں یہ کہتا ہوں : اس موضوع سے متعلق دیگر احادیث آگے آئیں گی ، جن میں سے کچھ علم سے متعلق باب میں آئیں گی اور کچھ ادب سے متعلق باب میں آئیں گی ، اگر اللہ نے چاہا ۔

سیدنا عمر بن خطاب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” آدمی صریح ایمان تک ، اُس وقت تک نہیں پہنچ سکتا ، جب تک وہ مزاح اور جھوٹ کو ترک نہیں کر دیتا ، اور جھگڑا کرنے کو ترک نہیں کر دیتا ، اگرچہ ( جھگڑا کرنے میں ) وہ حق پر ہی ہو “ ۔
یہ روایت امام ابویعلیٰ نے ” کبیر “ میں نقل کی ہے ، اس کی سند میں یہ مذکور ہے : اسے محمد بن عثمان نے ، سلیمان بن داؤد سے نقل کیا ہے ، اور میں نے کسی کو ان دونوں کا ذکر کرتے ہوئے نہیں دیکھا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مؤمن میں ہر عادت ہو سکتی ہے ، صرف خیانت اور جھوٹ نہیں ہو سکتے “ ۔
یہ روایت امام أحمد نے نقل کی ہے اور اعمش اور سیدنا ابوامامہ رضی اللہ عنہ کے درمیان میں یہ منقطع ہے ۔

سیدنا سعد بن ابی وقاص رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مؤمن میں ہر عادت ہو سکتی ہے ، سوائے خیانت اور جھوٹ کے ( یعنی اس میں خیانت اور جھوٹ کبھی نہیں ہو سکتے ) “ ۔
یہ روایت امام بزار اور امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مؤمن میں ، ہر اخلاق ( یعنی ہر عادت ) ہو سکتی ہے ، لیکن خیانت اور جھوٹ بولنا نہیں ہو سکتا “ ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک راوی عبیداللہ بن ولید ہے اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” کفر اور ایمان کسی ایک شخص کے دل میں اکٹھے نہیں ہو سکتے ہیں ، اور سچ اور جھوٹ اکٹھے نہیں ہو سکتے ہیں ، اور خیانت اور امانت دونوں ( کسی ایک شخص کے دل میں ) اکٹھے نہیں ہو سکتے ہیں “ ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : ” مؤمن ، ہر عادت میں مبتلا ہو سکتا ہے ، لیکن خیانت اور جھوٹ بولنے میں ( مبتلا نہیں ہو سکتا ہے ) “ ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا معاویہ بن ابوسفیان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سچائی کو تم ( لازمی ) اختیار کرو ! کیونکہ وہ نیکی کی طرف رہنمائی کرتی ہے ، اور وہ دونوں ( یعنی سچائی اور نیکی ) جنت میں ہوں گی اور جھوٹ سے بچنا تم پر لازم ہے ! کیونکہ وہ گناہوں کی طرف رہنمائی کرتا ہے ، اور وہ دونوں ( یعنی جھوٹ اور گناہ ) جہنم میں ہوں گے “ ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔

سیدنا مازن بن غضوبہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم پر سچ کو اختیار کرنا لازم ہے ، کیونکہ وہ جنت کی طرف لے جاتا ہے “ ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی یحیی بن کثیر ہے اور وہ متروک ہے ۔