السنن الكبرى للبيهقي

سیدنا ابوہریرہ رضی اللہ عنہ فرماتے ہیں کہ رسول اللہ ﷺ نے فرمایا: ”اللہ کے ننانوے نام ہیں، جس نے ان کو یاد کر لیا وہ جنت میں داخل ہو گا۔ اللہ طاق ہے اور طاق کو پسند فرماتا ہے۔“

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”اللہ کے ایک کم سو نام ہیں، جو ان کو یاد کرلے گا وہ جنت میں داخل ہوجائے گا۔ اللہ «وِتْرٌ» ہے اور «وِتْر» کو پسند کرتا ہے، وہ معبود ہے اس کے علاوہ کوئی الٰہ نہیں۔ وہ «الرَّحْمٰنُ» ”بہت زیادہ مہربان“، «الرَّحِيْمُ» ”رحم کرنے والا“، «الْمَلِكُ» ”بادشاہ“، «الْقُدُّوسُ» ”پاکباز“، «السَّلَامُ» ”سلامتی والا“، «الْمُؤْمِنُ» ”امن دینے والا“، «الْمُهَيْمِنُ» ”نگہبان“، «الْعَزِيزُ» ”غالب“، «الْجَبَّارُ» ”زبردست“، «الْمُتَكَبِّرُ» ”بڑائی والا“، «الْخَالِقُ» ”پیدا کرنے والا“، «الْبَارِئُ» ”ٹھیک ٹھیک بنانے والا“، «الْمُصَوِّرُ» ”صورت بنانے والا“، «الْغَفَّارُ» ”بہت بخشنے والا“، «الْقَهَّارُ» ”سب پر قابو رکھنے والا“، «الْوَهَّابُ» ”بہت عطا کرنے والا“، «الرَّزَّاقُ» ”رزق دینے والا“، «الْفَتَّاحُ» ”کھولنے والا“، «الْعَلِيمُ» ”سب کچھ جاننے والا“، «الْقَابِضُ» ”تنگی کرنے والا“، «الْبَاسِطُ» ”فراخی کرنے والا“، «الْخَافِضُ» ”پست کرنے والا“، «الرَّافِعُ» ”بلند کرنے والا“، «الْمُعِزُّ» ”عزت دینے والا“، «الْمُذِلُّ» ”ذلت دینے والا“، «السَّمِيعُ» ”سب کچھ سننے والا“، «الْبَصِيرُ» ”سب کچھ دیکھنے والا“، «الْحَكَمُ» ”فیصلہ کرنے والا“، «الْعَدْلُ» ”سراپا انصاف“، «اللَّطِيفُ» ”باریک بین، مہربان“، «الْخَبِيرُ» ”خبر رکھنے والا“، «الْحَلِيمُ» ”بردبار“، «الْعَظِيمُ» ”عظمت والا“، «الْغَفُورُ» ”بخشنے والا“، «الشَّكُورُ» ”قدر دان“، «الْعَلِيُّ» ”بلند“، «الْكَبِيرُ» ”بڑا“، «الْحَفِيظُ» ”حفاظت کرنے والا“، «الْمُقِيتُ» ”روزی پہنچانے والا“، «الْحَسِيبُ» ”حساب لینے والا“، «الْجَلِيلُ» ”جلال والا“، «الْكَرِيمُ» ”کرم والا“، «الرَّقِيبُ» ”نگران“، «الْمُجِيبُ» ”دعا قبول کرنے والا“، «الْوَاسِعُ» ”وسعت والا“، «الْحَكِيمُ» ”حکمت والا“، «الْوَدُودُ» ”محبت کرنے والا“، «الْمَجِيدُ» ”بزرگی والا“، «الْبَاعِثُ» ”(مردوں کو) اٹھانے والا“، «الشَّهِيدُ» ”گواہ“، «الْحَقُّ» ”حق“، «الْوَكِيلُ» ”کارساز“، «الْقَوِيُّ» ”قوت والا“، «الْمَتِينُ» ”مضبوط“، «الْوَلِيُّ» ”حمایتی دوست“، «الْحَمِيدُ» ”تعریف کے لائق“، «الْمُحْصِي» ”ہر چیز کو شمار کرنے والا“، «الْمُبْتَدِئُ» ”پہلی بار پیدا کرنے والا“، «الْمُعِيدُ» ”دوبارہ پیدا کرنے والا“، «الْمُحْيِي» ”زندگی دینے والا“، «الْمُمِيتُ» ”موت دینے والا“، «الْحَيُّ» ”ہمیشہ زندہ“، «الْقَيُّومُ» ”سب کو قائم رکھنے والا“، «الْوَاجِدُ» ”ہر چیز کو پانے والا“، «الْمَاجِدُ» ”بزرگ“، «الْوَاحِدُ» ”اکیلا“، «الصَّمَدُ» ”بے نیاز“، «الْقَادِرُ» ”قدرت والا“، «الْمُقْتَدِرُ» ”پوری قدرت رکھنے والا“، «الْمُقَدِّمُ» ”آگے کرنے والا“، «الْمُؤَخِّرُ» ”پیچھے کرنے والا“، «الْأَوَّلُ» ”سب سے پہلا“، «الْآخِرُ» ”سب سے آخر“، «الظَّاهِرُ» ”ظاہر“، «الْبَاطِنُ» ”پوشیدہ“، «الْوَالِي» ”سب کا والی“، «الْمُتَعَالِي» ”سب سے بلند و برتر“، «الْبَرُّ» ”بہت احسان کرنے والا“، «التَّوَّابُ» ”توبہ قبول کرنے والا“، «الْمُنْتَقِمُ» ”بدلہ لینے والا“، «الْعَفُوُّ» ”معاف کرنے والا“، «الرَّؤُوفُ» ”بہت شفقت کرنے والا“، «مَالِكُ الْمُلْكِ» ”سلطنت کا مالک“، «ذُو الْجَلَالِ وَالْإِكْرَامِ» ”جلال اور عزت والا“، «الْمُقْسِطُ» ”انصاف کرنے والا“، «الْجَامِعُ» ”جمع کرنے والا“، «الْغَنِيُّ» ”غنی، بے پروا“، «الْمُغْنِي» ”غنی کرنے والا“، «الْمَانِعُ» ”روکنے والا“، «الضَّارُّ» ”نقصان پہنچانے والا“، «النَّافِعُ» ”نفع دینے والا“، «النُّورُ» ”نور“، «الْهَادِي» ”ہدایت دینے والا“، «الْبَدِيعُ» ”بے مثال پیدا کرنے والا“، «الْبَاقِي» ”ہمیشہ باقی رہنے والا“، «الْوَارِثُ» ”وارث“، «الرَّشِيدُ» ”سیدھی راہ دکھانے والا“، «الصَّبُورُ» ”بہت صبر کرنے والا“ ہے۔“

امام شافعی رحمہ اللہ فرماتے ہیں: جس نے اللہ یا اللہ کے ناموں میں سے کسی نام کی قسم کھائی، پھر وہ قسم توڑتا ہے تو اس پر کفارہ ہے۔

ربیع بن سلیمان رحمہ اللہ فرماتے ہیں کہ میں نے امام شافعی رحمہ اللہ سے سنا، وہ فرما رہے تھے: جس نے اللہ کے ناموں میں سے کسی کے ساتھ قسم اٹھائی اور پھر قسم توڑتا ہے تو اس پر کفارہ ہے، کیونکہ اللہ کا نام مخلوق نہیں ہے، لیکن جس نے کعبہ یا صفا اور مروہ کی قسم کھائی اس پر کفارہ نہیں ہے؛ کیونکہ یہ مخلوق ہیں۔