السنن الكبرى للبيهقي

عمار بن ابی عمار حضرت عبداللہ بن عباس رضی اللہ عنہما سے نقل فرماتے ہیں کہ حماد کا گمان تھا کہ رسول اللہ ﷺ نے خدیجہ بنت خویلد رضی اللہ عنہا کا تذکرہ کیا، لیکن ان کے والد آپ ﷺ سے ان کی شادی کرنے سے بے رغبت تھے۔ حضرت خدیجہ رضی اللہ عنہا نے کھانے پینے کا اہتمام کیا اور اپنے والد اور قریبیوں کے ایک گروہ کو دعوت دی۔ جب انہوں نے کھا پی لیا اور مدہوش ہو گئے تو حضرت خدیجہ رضی اللہ عنہا نے اپنے والد سے کہا: محمد بن عبداللہ (ﷺ) نے مجھے شادی کا پیغام دیا ہے، آپ میری شادی کر دیں، تو ان کے والد نے آپ ﷺ سے شادی کر دی، تو حضرت خدیجہ رضی اللہ عنہا نے اپنے والد کو خوشبو لگائی اور حلہ پہنایا۔ یہ اس وقت کرتے تھے جب والد اپنی بیٹیوں کی شادی کرتے تھے۔ جب ان کے والد سے نشے کی کیفیت ختم ہوئی تو انہوں نے اپنے اوپر خوشبودار حلہ دیکھا تو کہنے لگے: میری یہ کیا حالت ہے؟ تو حضرت خدیجہ رضی اللہ عنہا کہنے لگی: آپ نے میری شادی محمد بن عبداللہ (ﷺ) سے کر دی ہے۔ انہوں نے کہا: میں ابوطالب کے یتیم سے شادی کروں گا؟ نہیں، میری عمر کی قسم! حضرت خدیجہ رضی اللہ عنہا فرمانے لگیں: کیا آپ کو اس بات سے حیا نہیں آتی کہ آپ قریشیوں کے نزدیک بیوقوف ٹھہریں کہ آپ لوگوں کو اس بات کی خبر دیں کہ آپ نشہ کی حالت میں تھے؟ وہ یہی بات بار بار ان کو کہتی رہیں یہاں تک کہ انہوں نے اقرار کر لیا۔

سیدنا عبداللہ بن حارث رضی اللہ عنہ فرماتے ہیں کہ سیدنا عمار بن یاسر رضی اللہ عنہ نے سیدہ خدیجہ رضی اللہ عنہا کی شادی کا قصہ ذکر کیا کہ سیدہ خدیجہ رضی اللہ عنہا نے اپنے بھائی سے بات کی اور انہوں نے اپنے والد سے اور ان کے والد نے شراب پی رکھی تھی۔ اس نے رسول اللہ ﷺ اور آپ کے مرتبہ کا تذکرہ کیا اور سیدہ خدیجہ رضی اللہ عنہا کی شادی کے بارے میں پوچھا تو انہوں نے سیدہ خدیجہ رضی اللہ عنہا کی شادی کردی۔ پھر سوئے ہوئے اٹھے اور چیخ رہے تھے اور سیدہ خدیجہ رضی اللہ عنہا کی شادی سے انکار کردیا۔ پھر کہنے لگا: تمہارا وہ صاحب کہاں ہے کہ جس کے بارے میں تمہارا گمان ہے کہ میں نے اس سے شادی کردی ہے؟ جب نبی ﷺ سامنے آئے تو اس نے آپ کو دیکھا تو کہنے لگے: اگر میں نے شادی کردی ہے تو درست، اگر نہیں کی تو اب میں نے شادی کردی ہے۔
(ب) امام زہری رحمہ اللہ فرماتے ہیں کہ نبی ﷺ نے سیدہ خدیجہ رضی اللہ عنہا سے زمانہ جاہلیت میں نکاح کیا اور ان کا نکاح ان کے والد خویلد بن اسد نے کروایا۔

یحییٰ بن عبدالرحمن بن حاطب فرماتے ہیں کہ سیدہ عائشہ رضی اللہ عنہا نے فرمایا: جب خدیجہ بنت خویلد رضی اللہ عنہا فوت ہو گئیں تو خولہ بنت حکیم رضی اللہ عنہا رسول اللہ ﷺ کے پاس آئیں اور کہنے لگیں: اے اللہ کے رسول! کیا آپ شادی نہ کریں گے؟ آپ ﷺ نے پوچھا: ”کس سے؟“ کہنے لگی: کنواری سے چاہو یا بیوہ سے! آپ ﷺ نے پوچھا: ”کنواری کون؟ اور بیوہ کون؟“ خولہ بنت حکیم رضی اللہ عنہا کہنے لگی کہ کنواری تو عائشہ بنت ابی بکر (رضی اللہ عنہما) جو اللہ کی مخلوق میں سے سب سے زیادہ محبوب بیٹی ہے اور بیوہ سیدہ سودہ بنت زمعہ رضی اللہ عنہا جس نے ایمان قبول کرنے کے بعد آپ کی پیروی بھی کی ہے، آپ ﷺ نے فرمایا: ”ان کے پاس میرا تذکرہ کرنا۔“ خولہ بنت حکیم رضی اللہ عنہا کہتی ہیں: وہ ام رومان رضی اللہ عنہا کے پاس آئیں اور کہا: اے ام رومان! اللہ نے تمہارے گھر میں خیر و برکت کو داخل کر دیا ہے۔ ام رومان رضی اللہ عنہا نے پوچھا: وہ کیا؟ خولہ بنت حکیم رضی اللہ عنہا کہنے لگیں کہ رسول اللہ ﷺ نے سیدہ عائشہ رضی اللہ عنہا کا تذکرہ کیا ہے۔ ام رومان رضی اللہ عنہا کہنے لگیں: ذرا انتظار کرو، ابوبکر ابھی آجاتے ہیں۔ اتنی دیر میں سیدنا ابوبکر رضی اللہ عنہ بھی تشریف لے آئے تو ام رومان رضی اللہ عنہا نے اس بات کا تذکرہ سیدنا ابوبکر رضی اللہ عنہ سے کیا، سیدنا ابوبکر رضی اللہ عنہ فرمانے لگے: کیا یہ ان کے لیے درست ہے؟ یہ ان کے بھائی کی بیٹی ہے۔ خولہ بنت حکیم رضی اللہ عنہا فرماتی ہیں کہ رسول اللہ ﷺ نے فرمایا: ”میں اس کا بھائی اور وہ میرے بھائی، لیکن اس کی بیٹی سے نکاح درست ہے۔“ اس نے حدیث کو ذکر کیا کہ سیدنا ابوبکر رضی اللہ عنہ نے خولہ بنت حکیم رضی اللہ عنہا سے کہا کہ آپ رسول اللہ ﷺ سے کہیں کہ آپ آ جائیں۔ راوی کہتے ہیں کہ رسول اللہ ﷺ نے آ کر نکاح کر لیا۔ پھر سیدہ خولہ بنت حکیم رضی اللہ عنہا کہتی ہیں کہ میں سیدہ سودہ بنت زمعہ رضی اللہ عنہا کے پاس گئی۔ ان کے والد بوڑھے آدمی تھے، وہ کام کاج سے فارغ بیٹھے تھے۔ سیدہ خولہ رضی اللہ عنہا فرماتی ہیں کہ میں نے جاہلیت والا سلام کہا تو انہوں نے کہا: تو اچھی صبح کرے۔ وہ کہنے لگے: آپ کون؟ میں نے کہا: خولہ بنت حکیم، تو انہوں نے مجھے خوش آمدید کہا اور کہا: جو اللہ چاہے کہو۔ کہتی ہیں: میں نے کہا کہ محمد بن عبداللہ بن عبدالمطلب (ﷺ) سودہ بنت زمعہ رضی اللہ عنہا کا تذکرہ کرتے ہیں (یعنی نکاح کا ارادہ رکھتے ہیں) وہ کہنے لگے: اچھا کفو ہے، آپ اس کے بارے میں کیا کہتی ہیں؟ میں نے کہا: جی ہاں! وہ پسند کرتی ہیں۔ کہنے لگے: جاؤ ان سے کہہ دینا آ جائیں۔ خولہ رضی اللہ عنہا کہتی ہیں کہ رسول اللہ ﷺ نے سیدہ سودہ رضی اللہ عنہا سے نکاح کر لیا، جب عبد بن زمعہ رضی اللہ عنہ آیا تو اس نے اپنے سر پر خاک ڈالنا شروع کر دی کہ رسول اللہ ﷺ نے سودہ رضی اللہ عنہا سے نکاح کر لیا ہے۔ باقی حدیث کو بھی اس نے ذکر کیا ہے۔

حضرت عبداللہ بن عمر رضی اللہ عنہما بیان کرتے ہیں کہ حضرت عمر بن خطاب رضی اللہ عنہ کی بیٹی حضرت حفصہ بنت عمر رضی اللہ عنہما جب بیوہ ہوئیں، خنیس بن حذافہ سہمی رضی اللہ عنہ (جو رسول اللہ ﷺ کے صحابی اور بدری تھے) کی مدینہ میں وفات کی وجہ سے، تو حضرت عمر رضی اللہ عنہ فرماتے ہیں کہ میں نے حضرت عثمان بن عفان رضی اللہ عنہ پر اپنی بیٹی کو پیش کیا (یعنی نکاح کا کہا)۔ میں نے کہا: ”اگر آپ چاہیں تو میں آپ کا نکاح حفصہ بنت عمر رضی اللہ عنہما سے کر دوں۔“ حضرت عثمان بن عفان رضی اللہ عنہ نے کہا: ”میں اپنے معاملہ میں سوچ و بچار کر لوں۔“ حضرت عمر رضی اللہ عنہ فرماتے ہیں: میں چند دن ٹھہرا رہا، پھر عثمان بن عفان رضی اللہ عنہ کی مجھ سے ملاقات ہوئی تو انہوں نے کہہ دیا کہ: ”میں آج کے دن شادی نہ کروں گا۔“ حضرت عمر رضی اللہ عنہ فرماتے ہیں: میں نے حضرت ابوبکر صدیق رضی اللہ عنہ سے ملاقات کی اور کہا: ”اگر آپ چاہیں تو میں آپ کا نکاح حفصہ بنت عمر رضی اللہ عنہما سے کر دوں۔“ حضرت ابوبکر رضی اللہ عنہ خاموش ہو گئے، مجھے کچھ جواب نہ دیا۔ میں نے حضرت عثمان بن عفان رضی اللہ عنہ سے بڑھ کر اپنے اندر غم پایا۔ چند دنوں کے بعد نبی ﷺ نے نکاح کا پیغام دے دیا۔ میں نے آپ ﷺ سے ان کا نکاح کر دیا، تو ابوبکر رضی اللہ عنہ ملے اور فرمانے لگے: ”آپ کو پریشانی ہوتی ہوگی جب آپ نے حضرت حفصہ رضی اللہ عنہما کو نکاح کے لیے میرے اوپر پیش کیا اور میں نے کچھ بھی جواب نہ دیا۔“ حضرت عمر رضی اللہ عنہ فرمانے لگے: ”ہاں۔“ تو حضرت ابوبکر رضی اللہ عنہ فرمانے لگے: ”مجھے کسی چیز نے بھی جواب سے نہ روکا تھا جب آپ نے نکاح کے لیے کہا، البتہ میں یہ جانتا تھا کہ رسول اللہ ﷺ نے حضرت حفصہ رضی اللہ عنہما کا تذکرہ کیا تھا، لیکن میں رسول اللہ ﷺ کے راز کو ظاہر کرنا نہ چاہتا تھا، اگر رسول اللہ ﷺ چھوڑ دیتے تو میں قبول کر لیتا۔“