السنن الكبرى للبيهقي

حسن عرنی حضرت عبداللہ بن عباس رضی اللہ عنہما سے نقل فرماتے ہیں کہ جب آپ رمی جمار کر لیں تو آپ کے لیے ہر چیز جائز ہے سوائے عورتوں کے، جب تک آپ بیت اللہ کا طواف نہ کر لیں۔ ایک آدمی نے کہا: کیا وہ خوشبو لگا لے؟ انہوں نے کہا: میں نے رسول اللہ ﷺ کو دیکھا کہ انہوں نے سر کو کستوری سے لیپ رکھا تھا، معلوم نہیں یہ خوشبو تھی یا نہیں۔

ابو نجیح رحمہ اللہ حضرت عطاء رحمہ اللہ سے نقل فرماتے ہیں کہ جب قربانی ذبح کرے اور سر منڈوائے اور طوافِ زیارت سے پہلے شکار کر لے، اس پر فدیہ ہے جب اس کے اوپر احرام کی کوئی چیز بھی باقی ہے۔ اللہ تعالیٰ کا ارشاد ہے: ﴿وَإِذَا حَلَلْتُمْ فَاصْطَادُوا﴾ [سورة المائدة: 2] الآیہ، ”اور جب تم حلال ہو جاؤ تو شکار کرو۔“

ابن ابی الزناد رحمہ اللہ اپنے والد سے اور وہ اہل مدینہ کے فقہاء سے نقل فرماتے ہیں کہ جس نے رمیِ جمرہ کے بعد شکار کر لیا اور طوافِ افاضہ نہ کیا ہو، اس پر فدیہ ہے۔

نافع بن عبدالحارث بیان کرتے ہیں کہ سیدنا عمر رضی اللہ عنہ جمعہ کے دن مکہ آئے اور دار الندوہ میں داخل ہوئے، ان کا ارادہ تھا کہ مسجد کے قریب پڑاؤ کریں، انہوں نے اپنی چادر بیت اللہ کے پاس کھڑے ہوئے شخص پر ڈالی، اس پر ایک کبوتر آکر بیٹھ گیا، اس کو اڑایا گیا، پھر وہ بیٹھ گیا، اس کو سانپ نے کھینچ لیا اور اس کو قتل کر دیا، جب انہوں نے نماز پڑھی تو میں اور سیدنا عثمان بن عفان رضی اللہ عنہ ان کے پاس گئے تو سیدنا عمر رضی اللہ عنہ نے فرمایا: ”میرے بارے میں فیصلہ کرو، جو آج میں نے کیا ہے۔ میں اس گھر میں داخل ہوا اور میں نے ارادہ کیا تھا کہ مسجد کے قریب پڑاؤ کروں، میں نے اپنی چادر اس پر ڈال دی۔ اس پر کبوتر بیٹھ گیا۔ میں ڈر گیا کہ وہ اس کو اپنی بیٹ سے آلودہ کر دے گا، میں نے اسے اڑا دیا۔ وہ دوسرے ستون پر بیٹھ گیا تو سانپ نے ڈس کر اس کو قتل کر دیا، میں نے اپنے دل میں پایا کہ میں نے اس کو امن والی جگہ سے اڑایا اور وہ ایسی جگہ چلا گیا جہاں اس کو موت کے گھاٹ اترنا پڑا۔“ میں نے سیدنا عثمان بن عفان رضی اللہ عنہ سے کہا: ”آپ کا کیا خیال ہے کہ ہم امیر المؤمنین کے بارے میں دو دانت والی بکری کے بچے کا فیصلہ کر دیں؟“