صحيح الادب المفرد

سیدنا براء رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا : ”سلام کو عام کرو، سلامت رہو گے۔“

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا : ”تم جنت میں داخل نہیں ہو گے یہاں تک کہ ایمان لاؤ، اور تم (کامل) مومن نہیں ہو گے یہاں تک کہ آپس میں محبت کرو۔ کیا میں تمہیں ایسی چیز نہ بتاؤں جس سے تم آپس میں محبت کرنے لگو؟“ صحابہ نے عرض کیا: کیوں نہیں، اللہ کے رسول! آپ نے فرمایا: ”آپس میں سلام کو عام کرو۔“

سیدنا عبداللہ بن عمرو رضی اللہ عنہما سے روایت ہے، انہوں نے کہا: رسول اللہ صلی اللہ علیہ وسلم نے فرمایا: ”رحمان کی عبادت کرو، کھانا کھلاؤ، اور سلام کو عام کرو، جنتوں میں داخل ہو جاؤ گے۔“